HIBIRU DIM 10

1Wada kan ka Wina'am da tis Jew dim la nwaasne bunsuma line a ameŋa ka na kena la, ka lee ka' yinni ne line a ameŋa laa. Bozugo ba da maan maana yuum yuum ka li pu ke ka bane li'el Wina'am la lieb su'um nyain ne. 2Li ya'a ka'a ala, ba naani basin maana tisib, ka maluŋ ya'a da keen ka bane pu'usid la liebin nyain, ba ku lem mi'in tuumbe'ed si'a ba potenda nii. 3Amaa ka maan bama tiensidi ba tuumbe'ed yela yuum yuum; 4ka na'araad ne buus ziim ku nyaŋe kad tuumbe'ede. 5Dinzug Kiristo n da kenn dunia ni na la, o da yel Wina'am ye, “Fu pu bood maana ne piini, amaa ninsaal niŋgbiŋ kane a man la. 6Fu pu mor sumalisim ne konbid piini line nyu'ed ne bugum bee maana line a tuumbe'ed yela. 7Ala ka m yel ye m Zugsoba, man kena ye m tum fu boodim a si'em la wuu lin sob si'em fu gbauŋ puugin mam yela la.” 8Ka o yel yiiga ye, “M pu bood konbid piini line nyu'ed ne maan ne piini wusa, ka li pu malis man suunre.” O yel ne'eŋa hale baa ban dol wada suer maani li laa. 9Ka yu'un yel ye, “Gosima, m kena ye m niŋ fu boodim.” Wina'am kpiis yiiga malima la, ka zi'el line tia'al la. 10Ka Yesu n niŋ Wina'am boodim ka noki o meŋ niŋgbiŋ maal maan tis o vuguri zug la, ka ti lieb Wina'am nidib ka a nyain. 11Ka maalmaanib wusa zi'e ba tuuma ni daar wusa n maan maan kane a yinni noor si'em pendigid ka lin ku nyaŋe yiis tuumbe'ede. 12Ka Kiristo da tis o meŋi n maal maan vuguri, nidib tuumbe'ed yela line na siak saŋa wusa, ka yu'un zin'i Wina'am datiuŋ, 13n ti paae saŋkan ka o dataas lieb o noba gbauŋ. 14Ka maan vuguri la ke ka bane ka o ke ka ba lieb Wina'am nidib la a su'um nyain saŋa wusa. 15Ka Wina'am Siig Suŋ me dii o kaset n tisi ti ka ye man Zugsob yel ye, 16“Ne'eŋa a nonaar kan ka m na maal ne ba, dabis ban nya'aŋ. M na niŋi m wada la ba sunya ni ka sobi li ba ya'amin.” 17Ka lem pa'as ye, “Man kudum ku lem ten'esi ba tuumbe'ed ne ba taal yela ya'ase.” 18Ka Wina'am n yiisi ba tuumbe'ed n bas la, li pu len nar ye ba maal maan tuumbe'ed yela. 19M ba'abiise, tinam baŋ ye ti yu'un mor sukpi'em n na kpen' Wina'am zin'igin Yesu ziim la yela, 20line ka o noki maal suepaal ameŋa line gat lin daa giŋ Wina'am doog la line aa o niŋgbiŋ. 21Ka tiname mor maalmaan tita'ar one gur Wina'am yidim. 22Dinzugo keli ka ti li'el Wina'am ne ti sunf ne yadda niŋir line kpi'em ne ti sunya line ka ziim zu'asug ke ka si'el line a be'ed ten'esug da be ti potenda ni, ne ti niŋgbina pier ne ku'osuŋ. 23Ka ti gban'e kiŋ kiŋ ti'ir kan ka ti yel paalo la, bozugo Wina'am one zi'el noor la a sida sob. 24Ti ten'esimi ti taab yela ka kpe'eŋidi taaba n mor noŋilim ne tuumsuma. 25Ka da bas taaba la'asug wuu sieba niŋid si'em laa, amaa ka kpe'eŋ taaba, bedego yaname nye ka Yesu ken daar la li'el la. 26Ka maana pu lem be n na kad tuumbe'ede, ti ya'a di'e Wina'am sida la ka kpelim niŋid tuumbe'ed ne pon'osim. 27Asee ka ti mor dabiem poten'er ne saria kadib ne bugum line ye li di Wina'am dataas ne nimmua la. 28So' ya'a da sa'am Moses wada la, ka kasetib ayi bee atan' be, ba ku zo o nimbaanliga, asee o daana kpi. 29One ne'es Wina'am Biig la, ka nok nonaar ziim line ket ka o a Wina'am nid la niŋid yoo yoog ka tu'ud Siig Suŋ line pa'an Wina'am yelsum la, namisug na a wala. Asida, on din na gaad ala. 30Ka ti mi' one yel ye, “Sam yier ane m din ka man na yo li.” Ka len yel ya'as ye, “Zugsob la na kadi o nidib saria.” 31Li ane yeltoog tis one lu Wina'am one voe la nu'usin. 32Ka ten'esimi saŋsi'en yanam n da nye Wina'am yelsida la. Ya modig ne sukpi'em ka nye namisug bedego ka nyaŋe zi'en kiŋ kiŋ. 33Ka saŋsi'a ka ba tu'udi ya ka namisidi ya nidibin. Ka ya lem zi'en ne ya taaba bane ka ba namisi ba ala la. 34Ka ya zo bane be sarega ni la nimbaanlig, ka maal sumalisim ne bane faann ya la'ad, ka ya mi' ye ya meŋ mor la'asuma line gat ne'eŋa line ku sa'am. 35Dinzugo da basi ya sukpi'em line mor nyood bedego la. 36Ka li nar ye ya mor sumodigir ye ya niŋ Wina'am boodim ka di'e o nozi'elug la. 37Ka li sob ye, Wina'am yel ye, “Li kpelim bi'ela, ka one ken na la, kena, ka li ku yuuge. 38Ka man popielim dim na voe ne ba yadda niŋir zug. Ka so' ya'a nyobugidi lebid nya'aŋ, man sunf ku malis ne on daana.” 39Tinam ka'a bane nyobugid lebid nya'aŋ ka sa'am la, amaa ti ane bane niŋ yadda ka paam faangir.

will be added

X\