1 Wina'am da ke ka o nodi'esidib pian'ade o yela kudumin tisidi ti yaanam saŋa bedego ne sueya kon'ob kon'ob bedego. 2 Amaa tinam saŋa nwa, Wina'am pian'ad tisidi ti yiti o Biig la sa'an, one ka o gaŋ o ye o so'e si'el wusa la, ka li yine o sa'an na ka Wina'am maal dunia ne line be saŋgbauŋin la wusa. 3 O Biig la nyeene ne Wina'am na'am la paŋ, ka Wina'am a si'em la, o me ane ala. Ka li yine o pian'ad line mor paŋ la ni ka o gosid bun wusa. Ka on pie ninsaal tuumbe'ed la, ka yu'un zin'i Wina'am one a kpi'euŋ sob n gat si'el wusa la datiuŋ. 4 Wina'am du'os o ka o gat maleknam. Ka yu'ur kan ka o di'e la gat maleknam yuda. 5 Ka Wina'am nan zi' yel malek ye, “Fune a m Biig, ka zina ka m liebi fu Ba'.” Ka me pu yel malek ye, “Mane na a fu Ba' ka fun na a m Biiga.” 6 Ka on tumi o bikpeŋ dunia ni na la, o lem yel ye, “Kel ka Wina'am maleknam wusa na'as o.” 7 Ka yel maleknam bane aa o tumtumnib la yela ye, “O ke ka o maleknam la a wuu pebisim ne, ka o tumtumnib la me a wuu bugum zilima ne.” 8 Amaa o Biig la yela, o yel ye, “Wina'am, fu na'am gbauŋ la na be saŋa line ka' benne. Ka zanli fu na'am duor ne popielim. 9 Fu noŋ yelsida, ka kis line a ziri. Dinzug ka Wina'am, one aa fu Wina'am la, zaŋ kpaam line a sumalisim suenn uf ka fu gaadi fu taaba.” 10 Ka lem ye, “Zugsoba, fune maal dunia pin'ilugin, ka saazug wusa ane fu nu'ug tuuma. 11 Li wusa na sa'am, ka kudig wuu fuugi kudigid si'em la, amaa fun na kpelim be. 12 Fu na kpilimi li wuu kparib ne, ka tiake a bunpaal. Amaa fu pu tiakeda, ka fu yuma ku mor benne.” 13 Ka malek kane ka Wina'am da yel o ye, “Zin'inim m datiuŋ, ka m ti ke ka fu no fu dataas ne noba?” 14 Ka maleknam a bo? Ba ane siis ne, ka tumne tisid Wina'am. Ka o tumi ba ye ba suŋ bane na ti paam faangir la.
