GALATIA DIM 6

1M ba'abiise, tuumbe'ed ya'a ke ka so' lu, yanam bane ka Siig Suŋ la bee ya ni bedego la suŋim o ne sumbugusum, ka o due ka lem a su'um. Ka me gu'usimini ya meŋ; ka ya pa'ati nye makir. 2Suŋimi taaba ya yeltood poogin, ka ala ka ya na dol Kiristo wada la. 3So' ya'a ten'es ye o a su'um, ka sid a one pu kpi'ema, o ma'ad o meŋ. 4So' mekama kpansim o meŋ yela. O ya'a nye ka li a su'um, o tun'e nwe'e nyo'og ne o meŋ yela. Ka li ka' ye o mak o meŋ ne o tiraan yela. 5So' wusa moom o meŋ yela. 6One zamis Kiristo labaar la on pudugim bunsum line ka o mor la ne one zamis o la. 7Da ma'a ya meŋa. So' ku nyaŋe ma' Wina'am wuu o ane zolugo. Nid na bun on but si'el la buudi. Ka li me ane ala nidib beilim ni. 8So' beilim ya'a dolne o ninsaalib boodim, li nyood ane ku'um. Ka so' beilim ya'a dol Wina'am Siig Suŋ la boodim, lin nyood me ane nyovur lin ka' naare. 9Dinzug, keli ka ti da genn ka bas tuumsumaa. Ka ti ya'a pu basi li saŋa na kena ka ti na nyee li nyood. 10Dinzugo ti ya'a nye suer, keli ka ti tum tuumsuma n tis so' mekama, ka tumi tisi ti ba'abiis bane niŋ Kiristo yadda la n gaad so' mekam wusa. 11Gosimi man sob ka li a sob beda si'em, li ane man Paul m meŋi yu'un sob bama. 12Nimbane pa'ane ba meŋ la bood ye ba mugusi ya ka ya kpen' baŋo la. Ka ba kudun niŋidi li ye ba da nye namisug Kiristo ku'um dapuudir zug la yelaa. 13Hale nimbane malima a baŋo kpen'eb la, ba pu niŋid wada la yel si'el laa, ka bood ye yanam kpen' baŋo ka ba na nyaŋe nwe'e nyo'og ne yanam siaki di'e bun line a niŋgbina malima la. 14Ka li ya'a a mam, man kudun ku nwe'e nyo'og ne si'el yelaa, asee ti Zugsob Yesu Kiristo ku'um dapuudir zug la ma'aa. Li ane o ku'um dapuudir zug la ke ka dunia yela pu lem so'e ma, ka m wenne m kpine, ka m ba'a lem kae' ne li yelaa. 15Li pu pak ye so' kpen' baŋo bee o pu kpen'ee, line pak ane ye ti mor vumpaal. 16Wina'am na tis nimbane dol suer kaŋa la sumalisim ka zoo ba nimbaanlig, la'am ne Wina'am nidib sieba la wusa. 17Keli ka so' so' da lem daami ma; ka isa bane be m niŋgbina ni mam dol Yesu la zug la pa'al ye m ane o nid. 18M ba'abiise, ti Zugsob Yesu Kiristo yelsum na be ne ya siis. Ami.

will be added

X\