GALATIA DIM 4

1Man yet si'el la ane ye, ba gosid biig kane na ti di o saam faar la wuu o ane yamug ne, o biilim saŋa, hale la'am ne on sid so'e si'el wusa la. 2Ka on a biig la, nidib be n gosid o yela wusa hale n ti paae saŋkan ka o saam zi'el o la. 3Ala men tinam daa nan a biis Wina'am yela ni la ti daa ane yamis ninsaalib yiiga pa'alug ni. 4Ka saŋa kan ka Wina'am daa zi'el la daa ti paa na la, Wina'am tum o meŋ Biig. Ka po'a so' du'a o, ka o be Jew dim wada la nu'usin. 5O tum o ye o faaenn bane ka wada la so'e ba la, ka ke ka ti lieb Wina'am biis. 6Wina'am da ye o pa'ali ti ye ti aa o biis la, ka tum o Biig Siig Suŋ ye o bee ti sunfin ka ke ka ti buol Wina'am ye, “M Ba'.” 7Ka dinzug fu len ka' yamugo, ka ane Wina'am biig. Ka fun sadigim aa o biig la, o na tis uf on zi'el si'el wusa ye o tis o biis la. 8Saŋsi'en la ka ya da zi' Wina'am la, ka dol si'elnam line ka' Wina'am, ka aa li yamis. 9Amaa nannanna ya yu'un mi' Wina'am, (ka li ka' ye yaname mi' oo, ka ane ye Wina'am lee mi'i ya,) wala ka ya na lem dol line ka'a paŋa ka a zaalim? Bo ka ya bood ye ya lem aa li yamis ya'asa? 10Ya doli dabis sieba ne nwadis sieba ne saŋa sieba ne yuma sieba la malima. 11M zot dabiem ye m tuuma kan ka m daa tumi ya zug la ane zaalim. 12M ba'abiise, m belimi ya ye ya aa wuu mam ne; ka mam me aa wuu yanam ne. Ya pu tum mam be'ede. 13Ya mi' ye man daa mool labasuŋ la ya sa'an yiiga daan la, li daa ane man daa ben'ed la zug. 14Amaa ya pu ne'esi ma ka la'am ne m niŋgbina la daa a si'em la hale li daa daami ya, ya daa lee di'e m wuu m ane Wina'am malek bee Yesu Kiristo ne. 15Ya daa mor sumalisim mam zug. Ka bo len niŋ ka ya tiake? Mam na nyaŋe yel ya yela ye, li ya'a nyaŋedin, ya daa naan fue ya nini n tisin mam. 16Ka m yu'un liebne ya dataa man yeti ya line a sida la bee? 17Nimbama la boodi ya yela. Amaa ba more poten'er be'ed. Ba bood ye ba baki ya ne tinam ka ya lee boodi ba yela. 18So' ya'a ten'es suŋ o taaba yela, li a su'um ye o boodi ba yela. Lina yiti a sida, m ya'a bee ya sa'an bee m ya'a ka'a ya sa'anee. 19M binoŋa, m lem mor toog m sa'an ya zug n ti paae saŋkan ka ya a wuu Kiristo a si'em la, ka toog la wenne wuu po'a yiti sa'a bood du'am la. 20M naan boodin ye m be ne ya sa'an nannanna nwa, ka na nyaŋe tiake man pian'ad si'em ne ya la. Ya yela ke ka m zi' man na niŋ si'em. 21M ye m bu'os yanam bane bood ye wada la so'e ya la ye, ya pu wum wada la yel si'el laa? 22Li ye Abraham da du'a biis ayi. Ayinni a yamug biig, ka yinni a po'a kane ka' yamug biiga. 23Ka ba da du'a o bikane a po'a yamug biig la wuu ban yiti du'ad si'em la. Ka li lee ane Wina'am noorzi'elug la ke ka ba du'a biig kane a po'a kane ka' yamug la biig la. 24Ne'e ane nwaasug ne. Ka po'ab ayi la nwaasne wada la ne noorzi'elug line ka Wina'am tis o nidib la. One du'a biig ka mor yaas ka ba a yamis la nwaasne wada line da yi Sinai zuerin la, zin'ig kan ka Wina'am tisi li la, ka one a po'a kane yu'uri buon Haga la. 25Ka Haga nwaasne Sinai zuer line be Arabia teŋin, ka me nwaasne Jerusalem ne Jew dim wada line be nannanna nwa la. Ka Jerusalem ne nidib bane doli li malima la ane yamis wuu Haga ne o yaas la a si'em la. 26Amaa Jerusalem line be agol la ka'a yamuga ka lee aa ti ma. 27Ka li sob Wina'am gbauŋin ye, “Po'a kundu'are mor sumalisim. Ka on one me pu nyet du'am toog la maalim vuud ne sumalisim. Ka po'a one a kundu'ar ka o sid bas o la na mor biis bedego n gaad po'a kan ka o sid mor o la. Dinzug kundu'ar la na mor sumalisim.” 28M ba'abiise, yanam ane Wina'am biis, ka li yine o nozi'elugin, wuu po'a kane ka' yamug la biig du'am la da yi Wina'am nozi'elugin si'em la. 29Abraham saŋa la, biig kane ka ba da du'a wuu ban yiti du'ad si'em la, namisid biig kane ka ba du'a ka li yi Wina'am Siig Suŋ ni na la. Li me ane ala nannanna. 30Ten'esimi Wina'am gbauŋ la yel si'em la ye, “Kadim po'a kane a yamug la ne o biig; ka o biig ne po'a kane ka' yamug la biig la ku ti la'am pudug ba saam faar laa.” 31Ala, m ba'abiise, tinam wenne po'a kane ka' yamug la biis ne, ka pu wenne yamug la biis laa.

will be added

X\