GALATIA DIM 3

1Yanam Galatia dim ane zon! M pa'ali ya Kiristo kum dapuudir la zug yela su'uŋa, ka li nie nyain ya nini ni. Ano'one ma'a ya? 2M bood ye m bu'osi ya yel yinni ma'aa, ya daa di'e Wina'am Siig Suŋ la ka li yi ne yaname dol wada la yel si'el la bee yanam wum labasuŋ la ka niŋ Kiristo yadda la? 3Ya ane zon bee? Ya daa pin'ili a Wina'am nidib, ka li yine Wina'am Siig Suŋ paŋin la. Ka ya yu'un bood ye ya naa li ne ya meŋ paŋ bee? 4Ya namisug la wusa ane zaalim bee? Ayei, li ka' zaalim. 5Wina'am tisidi ya o Siig Suŋ ka maan bunnyalima ya sa'an, yanam wum labasuŋ la ka niŋ Kiristo yadda la, ka ka' yanam niŋ wada la yel si'em laa. Bee m ma'ane? 6Li dolne lin da sob Wina'am gbauŋin Abraham yela si'em la ye, “On da niŋ Wina'am yadda, ka Wina'am gosi li ka siak ka o a popielim daan o tuon.” 7Baŋimi ye nimbane niŋ Wina'am yadda la sid ane Abraham yaas. 8Wina'am gbauŋ da pun nye ye Wina'am na ke ka bane ka' Jew dim la a popielim dim o tuon ba yadda niŋir zug, hale ka li da nam pu niŋe, ka dinzug ka ba da pun yel Abraham labasuŋ la moolug yela hale ka li nan pu paae, on zug ka dunia buudi wusa na nye yelsum. 9Abraham da niŋ Wina'am yadda ka di'e yelsum. Ka ala men bane me niŋ Wina'am yadda la na di'e yelsum wuu on men. 10Nopoor be nimbane tia' wada la ma'aa, bozugo li sobne ye, “Nopoor be ne bane wusa pu dol wada la yela zan'asa wenne lin sob Wada gbauŋin si'em la.” 11Li ane nyain ye so' kae' na di buod wada la dollim ma'ane, bozugo “Popielim daan na voe ne o yadda yela.” 12Ka li lem sob ye, “One niŋ wada la yel si'el wusa la, o niŋir la na ke ka o voe”. Ka dinzugo wada la siakir pu yine Wina'am yadda niŋir nii. 13Ka li me sob ye, “Nopoor be ne on mekama n kpi ka ba ya'al o tiig zug.” Ka dinzugo, Kiristo n da kpi dapuudir zug la, o da kpen' nopoor la ni, ka faaenn ti nopoor line ka wada la mor na la nu'usin. 14O faaenn ti ye yelsum kan ka Wina'am zi'el noor ye o na tis Abraham la me na a bane ka' Jew dim la din, ban a yinni ne Yesu Kiristo la zug, ka ye ti me na di'e Wina'am Siig Suŋ line ka o zi'el noor ye o na tisi ti la, ka ti di'er la yitne ti yadda niŋir ni na. 15M ba'abiise, m ye m zaŋ nidib beilim a si'em la n pa'ali ya si'el. Nidib ayi ya'a siak pian' si'el yela ka sobi li, ka tik nu'ug, so' kae' na tiake lii, bee pa'as si'ela. 16Aa to, Wina'am da zi'el noor tis Abraham ne o yaaŋ. Li da pu sob ye o zi'el noor n tis o yaase, ka li ane nidib bedegoo. Ka li lee sob ye o yaaŋ, ka li ane yinni. Ka one a Kiristo la. 17Lin ka m yeli li la, ane ye, Wina'am da zi'el noor ka yel ye o ku sa'ami lii. Ka yuma kobus anaasi ne piistan' da gaadeya, ka wada la nyaan kena, amaa li pu nyaŋe sa'am noor zi'elug laa. 18Bozugo faar la ya'a ane wada la dollim yela, li ku lem dolne noor zi'elig laa. Amaa Wina'am tisi Abraham yelsum la, li yi ne o noor zi'elig la zug. 19Ka ya na bu'osi m ye, bo zug ka Wina'am me da lem tis wada la? O da tisi li ye li pa'ali ti tuumbe'ed a si'em, ka bood ye li be n ti paae saŋkan ka Abraham yaaŋ la na kena, on ka o da zi'el noor n tis la. Ka maleknam da di'e wada la Wina'am sa'an n tis Moses, ka one tolisi li n tis nidib la, ka a nu'u nwe'ed daan. 20Ka nu'u nwe'ed daan pu zi'e nid yinni ma'aa yelle. Amaa Wina'am ane o kon' ka da tis noor zi'elug la ka nu'u nwe'ed daan la kae'. 21Ya ten'es ye wada la ne Wina'am noorzi'elug la ki'isidi taaba bee? Ayei baa bi'elaa. Wina'am ya'a da tisin wad line nyaŋedin ketin ka nidib voen, nidib naan sid aan popielim dim o tuon ba wada siakir la zug. 22Ka li lee da sob Wina'am gbauŋin ye dunia dim wusa bene tuumbe'ed nu'usin. Ka linzug li ane bane niŋ Yesu Kiristo yadda na di'e Wina'am noorzi'elug line ka o tisid so' on niŋ Yesu Kiristo yadda la zug. 23Ka saŋa kan ka nidib niŋid Yesu Kiristo yadda la da nam pu kena la, ka wada la da loo ti zi'el, wuu ti bene sarega ni ne, n ti paae saŋa kan ka li nie nyain ye nidib na nyaŋe niŋ Yesu Kiristo yadda. 24Dinzugo, wada la da zamisi ti ka aa ti tuon sob n ti paae saŋa kan ka Kiristo kena ka ti a popielim dim Wina'am tuon tiname niŋ o yadda la zug. 25Ka nannanna ka yadda niŋir saŋa la paa na, tuon sob la pu lem so'e ti ya'asa. 26Ka yanam a yinni ne Yesu Kiristo la, ya wusa ane Wina'am biis, ka li yine ya yadda niŋir la ni na. 27Bane wusa di'e ku'om suub la pa'al ye ba ane Kiristo nidib, ka Kiristo bee ba sa'an ka wenne on meŋ ne. 28Ka yanam a yinni ne Kiristo la, ke ka ya wusa a yinni. Ka bakir kae' ne Jew dim ne bane ka' Jew dima, ka me kae' ne yamis ne bane so'e ba meŋa, ka me kae' ne po'ab ne dapaa. 29Fu ya'a a Kiristo nid fu ane Abraham yaaŋ ka na di'e line ka Wina'am da zi'el noor ye o na tis la.

will be added

X\