GALATIA DIM 2

1Ka yuma piinanaasi daa gaad la, ka man ne Barnabas nyaan leb Jerusalem, ka Titus me la'am doli ti. 2Wina'am n daa pa'ali m ye o bood ye m keŋ la zug ka m daa keŋ. Ka mam ne Wina'am nidib bane a kpeenmnam la la'ase gban'e gban'ar. Ka li ane man ne ban ma'aa ka ka' nidib sooginee. Ka m yeli ba labasuŋ kan ka m moon tisid bane ka' Jew dim la sa'an la a si'em; ka m pu bood ye tuumkan ka m daa tum ka nan tumi li la a zaalim. 3Hale la'am ne m dolim taab Titus a Greek nid la, ba daa pu mugus o ye o kpen' baŋo, 4hale baa ninsieba bane daa ma'a ye ba ane Wina'am nidib ka sua' kpen' ti soogin la, n bood ye ba ke ka o kpen' baŋo la. Nimbama daa la'as ne ti ye ba baŋ tinam a yinni ne Yesu Kiristo la ke ka ti so'e ti meŋ Jew dim malima ni si'em la, ka bood ye ba ke ka ti dol malima la, ka aa li yamis. 5Ti daa pu siak ba boodim la baa fiinn mene, ye labasuŋ la ku tiake ka na kpelim a su'um ya sa'an. 6Ka nimbane ka ya ten'es ye ba a nintitada la pu paas si'el m pa'aluginee. Ban a si'em la pu paki ma. Bozugo Wina'am n nye ninsaal ka o a si'em la, ninsaal pu gosid o tiraan ka o a alaa. 7Ba yu'un nye ka Wina'am gu'uli m labasuŋ la ye m mool li tis bane ka' Jew dim la, ka li a wuu on me gu'ul Piita labasuŋ la ye o mool li tis Jew dim la. 8Ka Wina'am paŋ ke ka Piita a Kiristo Tumtum n tum Jew dim la sa'an, ka me ke ka man me tum bane ka' Jew dim la sa'an. 9Ka Jemes ne Piita ne Joon, bane ka ya gos ka ba a kpeenmnam la baŋ ye Wina'am gu'ul m tuumsuŋ kaŋa, ka gban'e man ne Barnabas nu'us n pa'al ye ti mor noor yinni na tum Wina'am tuuma, ka ti siak taaba ye tinam na tum bane ka' Jew dim la sa'an, ka ban me na tum Jew dim la sa'an. 10Yel yinni ka ba daa sosi ti ye ti tenr ye ti suŋi ba tadimnam la. Ka lina ka m daa pun tia' bedego ye m niŋ. 11Ka man daa be Antiok teŋin la ka Piita kenn anina la m daa yel o nidib soogin ye o pu niŋ su'um, lin daa nie nyain ye o tum taal la zug. 12Saŋkan ka nimbane ka Jemes tum la nam pu kena la, ka Piita yiti dit ne bane ka' Jew dim la. Ka nimbama la daa ti paae na la, o daa weligi o meŋ ka pu lem dit ne baa, bozugo o daa zot dabiem ne nimbane yel ye li nar ka ba'abiis bane ka' Jew dim la kpen' baŋo la zug. 13Ka ba'abiis bane a Jew dim la daa pa'as Piita zam la ni, ka ba zam la daa me ve'eg Barnabas ka o yidigi dol ban niŋ si'el la. 14Ka man daa nye ka ban tum si'em la pu dolne labasuŋ la yela la, ka m yel Piita ba wusa tuon ye, “Fu ane Jew nid, bo ka fu tum wuu one ka' Jew nida? Wala ka fun na nyaŋe mugus bane ka' Jew dim la ye ba dol Jew dim malima?” 15Tinam bane ka ba du'a ka ti a Jew dim, ti ka'a bane ka' Jew dim, ka a tuumbe'ed dim laa. 16Hale ti mi' ye so' yadda niŋir Kiristo ni ma'aa ka Wina'am na ke ka o a popielim daan o tuon, ka ka' on na niŋ wada la yel si'em laa. Ka tinam me niŋ Yesu Kiristo yadda ye Wina'am ke ka ti a popielim dim o tuon, ka li yine ti yadda niŋir Kiristo ni na, ka ka' tiname niŋ wada la yel si'em laa. So' wada siakir kudin ku ke ka o a popielim daan Wina'am tuone. 17Ti bood ye Wina'am ke ka ti a popielim dim o tuon, tiname a yinni ne Kiristo la zug. Ka lin ya'a ke ka ti baŋ ye ti a tuumbe'ed dim wuu bane ka' Jew dim la a si'em la, ya ten'es ye Kiristo du'osidne tuumbe'ed dimaa? Ayei baa bi'elaa. 18M ya'a daa dol Jew dim wada ka basi li, ka ti lem pin'ili doli li, li pa'al ye m sa'amid wada la. 19Wada la paŋ zugoo, m ane ku'um ne wada la, ka m na tun'e voe ne Wina'am zug. 20Ba da la'am kpa'a m dapuudir zug ne Kiristo, ka m kpi. Ka li ku lem aa ye m voe ne m meŋ vum, ka ane Kiristo vum be m sa'an. Ka m yadda niŋir Wina'am Biig la ni one noŋi m ka kpii m yela la, ke ka m be vum kan ka m nam be nwa ni. 21M pu ket ka Wina'am popielim la a zaalim. So' ya'a aan popielim daan Wina'am tuon, ka li yiinne o wada siakir la ni, Kiristo kum la aane zaalim.

will be added

X\