GALATIA DIM 1

1Man Paul one a Kiristo Tumtum sobid gbauŋ kaŋa. Li ka' nidibi daa gaŋi m ka m a Kiristo Tumtum laa, ka li me pu yi ninsaal so' ni naa. Ka li ane Yesu Kiristo ne ti Ba' Wina'am one vu'ug o kumin la n gaŋi m. 2Ti ba'abiis bane wusa la'am be ne mam kpela la pu'usid yanam Wina'am nidib bane be Galatia teensin la. 3Ti Ba' Wina'am ne ti Zugsob Yesu Kiristo na tisi ya yelsum ne sumalisim. 4Kiristo da pesigi o meŋ tis ye ba ku o tinam tuumbe'ed zug, wuu ti Ba' Wina'am boodim a si'em la, ye o faaenn ti dunia be'ug nwa ni. 5Wina'am na nye zun'or ka li ka' naare. Ami. 6Li paki m ye yanam ta'am bas Wina'am one buoli ya Kiristo popielim zug la ka ya lee bas o ka di'e labaar si'a la, 7la'am ne lin ka' labasuŋ la. Amaa ninsieba be ka daamidi ya ka mood ye ba tiak Kiristo labasuŋ la. 8Hale la'am ne tinam bee malek one yi arazana ni la ya'a mool labaar si'a line bee li kon' ne tinam mool si'el ya sa'an la, Wina'am nopoor na be on sob zug. 9Ti daa pun yeli li, ka m lem yeti ya'as ye, so' ya'a mool labaar si'a ka li bee li kon' ne yanam di'e si'el la, Wina'am nopoor na be on sob zug. 10Ya ten'es ye m mood ye m ke ka nidib pian' m yela su'um bee? Ayei, m bood ye Wina'am pian' m su'um. Ka ya ten'es ye m mood ye m ma'ae nidib sunya bee? Ayei, m ya'a moodin ye m ma'en nidib sunya, m naan ku aan Kiristo tumtum na. 11M ba'abiise, m bood ye ya baŋ ye labasuŋ line ka m moon la pu yit ninsaalib potenda ni naa. 12Ka m me daa pu di'e li so' nii, ka so' daa pu yeli li pa'ali m mene. Ka li lee daa ane Yesu Kiristo meŋ daa nie li n pa'ali m. 13Ya daa wum man daa dol Jew dim malima la ka daa yiti niŋid si'em la n daa namisid Wina'am nidib bedego, ka mood ye m sa'ami ba suer la. 14Ka m mi'ilim ne m su'um niŋir ti Jew dim malima yela, daa gaad m Jew dim taaba bane zem ne man la. Ka m poten'er daa gban'e hale ye m doli ti yaanam malima. 15Ka Wina'am lee daa gaŋi m ka ba nam pu du'a ma, ka buoli m o sa'an o popielim zug. 16Ka saŋkan ka Wina'am daa gban'e ye o nie o Biig la pa'ali m ye o ke ka m mool o Biig la labaar n tis bane ka' Jew dim la, m daa pu keŋ so' sa'an ye o zamisi ma. 17Ka m me daa pu keŋ Jerusalem bane pun deŋ man a Tumtumnib la sa'anee. Amaa m daa keŋ ne Arabia so'olimin, ka lin nya'aŋ ka m leb Damaskus teŋin. 18Ka li daa gaad yuma atan' nya'aŋ ka m nyaan keŋ Jerusalem ye m kaae Piita, ka daa bee o sa'an n paae dabisa piinanu, 19ka pu nye Tumtum so' ya'asa, asee Jemes one a Zugsob pitu la ma'aa. 20Wina'am mi' ye lin ka m sobid o tuon nwa la ane sida, ka ka' dama'are. 21Ka m nyaan yi Jerusalem n keŋ zin'is sieba bane be Siriya ne Silisia teensin. 22Ka Wina'am nidib bane be Juuda teŋin la wum m yela ka lee nam pu nyee m ne ba ninii, 23ka ba lee daa wum ne ka sieba yeti m yela ye, “One daa namisidi ti la, yu'un moon yadda niŋir pa'alug line ka o daa mood ye o sa'am la.” 24Ka mam zug ka ba zun'e Wina'am.

will be added

X\