EFESUS DIM 3

1Dinzug ka mam Paul n be sarega ni Yesu Kiristo zug yanam buudbane ka' Jew dim la yela. 2M ten'esid ye ya wum ye Wina'am tisi m tuuma line yi o popielimin ya yela, 3ne on nie o yelsua'adir tisi m ye m baŋi li gbin, wuu man deŋim sobi li giŋa si'em la. 4Ka ya ya'a karem lina ya na nye mam baŋ yelsua'adir la gbini a si'em line a Kiristo la. 5Ka Wina'am da pu nie li n tis kudimin dima, ka o Siig la yu'un nie li pa'al o Tumtumnib ne o nodi'esidib. 6Ka yelsua'adir la yela ane ye labasuŋ moolug la ket ka buudi wusa la'amid ne taaba pudugid Wina'am piini ka la'am di'ed line ka o zi'el noor tisi ti, tinam a yinni ne Yesu Kiristo la zug, ka la'am lem be niŋgbiŋ yinni ni. 7Li da ane Wina'am paŋ tuuma niŋir ka o gaŋi piinsuŋ n tisi m line ke ka m lieb labasuŋ la moon moon. 8Ka mam one a Wina'am nidib wusa kpaanr la di'e piinkaŋa, ye m mool labasuŋ la tis buudi bane ka'a Jew dim la, piintita'ar one a Yesu Kiristo la yela line ka'a ben ne, 9ka ke ka nidib wusa nye yelsua'adir suer line ka Wina'am one maal bun wusa la da sua' yuum pokudug ni. 10O nidib na ke ka na'anam ne paŋ dim bane be saazug baŋ Wina'am ya'am line ka'a ben la. 11Wina'am niŋ ne'enam ka li dolne on gban'e si'em, saŋkan ka dunia nam pu pin'ile, ka li yine ti Zugsob Yesu Kiristo sa'an ka li niŋ sida. 12Ka tinam siak o la ke ka ti nyees ka mor suer ye ti keŋ Wina'am sa'an. 13Dinzug ka m sosidi ya ye ya da ke ka ya sunya sa'am mane namisidi ya yela la zugo, ka m namisug ane ya sumalisim. 14Dinzug ka m igin duma zug ti Ba' Wina'am tuon, 15on kane tisid buudi wusa bane be saazug ne dunia ni ba yuda la. 16M sosid Wina'am ye o Siig Suŋ na tisi ya paŋi ya sunya ni line doli o na'am paŋ tita'ar, 17ye Kiristo bee ya sunya ni, ka ya yadda niŋir zug, ka ya noŋilim kpi'em ka pu tiakeda. 18Ye ka yanam la'am ne Wina'am nidib wusa na paam paŋ n na nyaŋe baŋ Yesu noŋilim wa'am ka labis ka du ka zulum si'em, 19ka baŋ o noŋilim line gat nidibi na tun'e baŋi li si'em. Hale bun line wusa yit Wina'am sa'an na la na pe'el ya. 20One tun'e maal si'elnam bedego, hale gat tiname na sos bee ten'es si'em la line zemisi o paŋ kane tumi ti ni la. 21Wina'am na nye na'asi Kiristo nidib sa'an saŋa dine ka' naare. Ami.

will be added

X\