EFESUS DIM 1

1Mam Paul one ka Wina'am gaŋ ka m a Yesu Kiristo Tumtum la sobid gbauŋ kaŋa tisid Wina'am nidib bane be Efesus teŋin ka a yadda niŋidib Yesu Kiristo ni la. 2Ti Ba' Wina'am ne ti Zugsob Yesu Kiristo yelsum ne sumalisim na be ne ya. 3Wina'am one a ti Zugsob Yesu Kiristo Ba' di'em bareka pu'usum, tiname a Kiristo nidib ka a yinni ne o la zug, ka Wina'am tisi ti yelsum line aa o piini wusa ka yii o sa'an arazana ni la. 4Dunia da nam pu pin'il la, Wina'am da pun deŋim gaŋi ti ye ti aa o nidib n a yinni ne Kiristo ka a nyain o tuon ka gbada kae'. 5On noŋi ti la zug ka o gban'e ye o zaŋi ti ka ti lieb o biis, ka li yine Yesu Kiristo meŋ ni na. O gban'e line ne o meŋ ya'amboodim, 6ye o popielim piintita'ar line ka o tisi ti, tinam a yinni ne o Binoŋir la zug nye zun'or, 7one ka o ziim tisi ti yolisim ka yiisi ti tuumbe'edi bas. Ka li wusa doli o popielim tita'ar 8kan ka o tisidi ti la, 9ka ke ka ti mor ya'amsuŋ ne baŋir wusa, ye ti baŋ o poten'er line da a yelsua'adir ka yi o boodim suŋ kan ka o gban'e ti yela ka li yine Kiristo ni la. 10Wina'ami n gban'e saŋsi'a la ya'a ti paae li ben o na la'as bunam bane wusa be arazana ne dunia ni ka Kiristo a Zugsob. 11- 12Wina'am one ke ka si'el wusa niŋid wuu o boodim a si'em la, gaŋi ti ye ti aa o nidib ka a yinni ne Kiristo. Ka li dol o poten'er kan ka o deŋim gban'e ye tinam bane deŋim mor ti'ir ne Kiristo la, na ke ka nidib du'os o yu'ur tita'ar la. 13Yaname wum sida labasuŋ line ke ka ya nye faangir la, ya siak Kiristo ka a yinni ne o, ka Wina'am tisi ya o Siig Suŋ wuu on zi'el si'em. Ka Siig Suŋ la a zanbin 14ka li pa'al ye ti na nye line wusa ka o zi'eli tisi ti, n ti paae saŋkan ka ti na di'e li wusa. 15Ne'enam zug, ne mam wum ye ya niŋ ti Zugsob Yesu Kiristo yadda ka mor noŋir ne Wina'am nidib wusa la, 16m pu gu'e ka kpelim pu'usid Wina'am bareka ya zug ka tenri sosid Wina'am ya yela. 17Ye ti Ba' Wina'am one mor yu'ur tita'ar ka ti Zugsob Yesu Kiristo be o sa'an la na tisi ya ya'amsuŋ line pa'ani ya Wina'am a si'em ka ya baŋ o. 18Ka nie ya potenda ka ya baŋ yelsida ne ti'ir lin yela ka o gaŋi ya la. Ka lem baŋ zi'elsuŋ kane ka o tis o nidib la malisim a si'em, 19ka me baŋ o paŋ line a buntita'ar ka ka' makire ka be tinam bane siak o ni la. 20Paŋ tita'akaŋa ane yinni ne paŋ tita'akan ka o zaŋi vu'ug Kiristo kumin n zin'il o o datiuŋ arazana ni la. 21Ka Kiristo na'am gat na'anam wusa na'am ne paŋdim wusa, ka o a yu'ur daan n gat so' wusa, ka li ka'ane dunia kaŋa ma'anee, amaa la'am ne dunia kane na ti kena la. 22Wina'am gaŋ Kiristo ka o a Wina'am nidib la Zugsob n so'e si'el wusa, ka ke ka bunam wusa na zin'ini o tuon. 23Wina'am nidib la ane Kiristo niŋgbin, ka o ni ka si'el wusa maali naae.

will be added

X\