KOLOSE DIM 4

1Zugsobnama, niŋimini line a su'um ne line zemis tisi ya yamis. Ka baŋi ya potenda ni ye ya me mor Zugsob one be arazana ni. 2Kpen sosimi Wina'am saŋa wusa ka tis o bareka pu'usum. 3La'am sosi tisi ti ye Wina'am na tisi ti suer ka ti mool o labaar la, n nie o yelsua'adir line a Kiristo la. Ka li yela, ka m be sarega ni. 4Sosimi Wina'am ye m nyaŋe pian' n nie li nyain, bozugo li nar ka m niŋi ala. 5More ya'amsuŋ ne yaname niŋid si'em n tisid bane ka' yadda niŋidib la, ka noki ya saŋa la n tum line a su'um. 6Keli ka ya noor pian'ad more mimilim wuu yaarum ne, ka baŋ yaname na lebis line nar n tis so' mekama. 7Tikikus one a ti ba'abinoŋir ne ti sida suŋid ne ti tumtum tiraan n a yinni ne Zugsob la na yeli ya m yela. 8Lin yela ka m tum o ya sa'an na, ye ya baŋ tiname a si'em, ka kpe'eŋi ya sunya. 9Ka m tum on ne Onesimus one a ti sida ba'abinoŋir ka aa ya teŋ nid la. Ba na yeli ya line wusa naamid kpela. 10Aristarkus one ka ti la'am be sarega ni la pu'usidi ya. Maak one a Barnabas ansiŋ me pu'usidi ya. M pun deŋim pa'ali ya o yela, ka o ya'a kena yanam on di'em o ne nu'usa ayi'iŋa. 11Ka Josua one ka ba buon Justus la me pu'usidi ya. Nidib atan' bama ma'aa a Jew dim bane la'am tum ne man ye Wina'am so'olim la yela keŋ tuon. Ban niŋid si'em la bugun ne m suunr. 12Epafras one a ya teŋ nid ka a Yesu Kiristo tumtum la me pu'usidi ya. O ten'esidi ya yela saŋa mekama ka sosid Wina'am ne nimmua, ye ya zi'e kiŋ kiŋ ka bi' ka baŋ su'uŋa line ka Wina'am bood. 13M nye on tum namisi ya yela ne Laodisea dim ne Hierapolis dim la. 14Luuk one a du'ata kan ka ti noŋ la ne Demas pu'usidi ya. 15Pu'usimi ti ba'abiis bane be Laodisea teŋin, ne Nimfa ne Wina'am nidib bane la'ased o yin la. 16Ya ya'a karem gbauŋ kaŋa nidibin n naae, keli ka ba karemi li n tis Wina'am nidib bane be Laodisea men. Ka yanam me karem Laodisea dim gbauŋ la. 17Yelimi Arikipus ye on a yinni ne Zugsob la, o gosimi o tuuma line ka o di'e Zugsobin la ka tum li naae. 18Mam Pauli sob pu'uskaŋa ne m meŋ nu'ug. Ten'esimi man be sarega ni la yela. Wina'am yelsum na be ne ya.

will be added

X\