KOLOSE DIM 3

1Yaname la'am sadigim vu'ug kumin ne Kiristo la, more boodim ne bun line be arazana ni, zin'ikan ka o zin'i Wina'am datiuŋ la. 2Keli ka ya poten'er gban'e ne bun line be arazana ni, ka ka'ane bun line be dunia nii; 3ka ya kpiya ka mor nyovur paal, ka Kiristo guri li Wina'am sa'an. 4Ka Kiristo one a ti nyovur la ya'a nie ya na la'am nie ne o, n be o na'amin. 5Basimi ya niŋgbiŋ boodim line a po'asa'uŋ bee dian'ad tuuma bee ya'amleog galisug bee poten'ebe'ed bee fufum, ka fufum a be'ed wenne ba'amaanib ne. 6Tuum ban yela ka Wina'am supeen ken bane zan'asidi o noor la ni na. 7Ya da niŋidi ala men yaname da la'am be ne ba la. 8Amaa nannanna, basimi supeen, ne endug, ne poten'ebe'ed, ne yu'usa'uŋ, ne pian'ayaalis wusa. 9Da ma'adi tisidi taaba yaname basi ya beilim kudug tuuma la, 10ka tiak beilim paal line ka Wina'am kpelim maani li saŋa mekama, ka ti wenne o meŋ ka baŋi o yela n paasid su'uŋa. 11Beilim paalin la, li ba'a kae' ye oŋa a Greek nid, bee Jew nid, bee o kpen' baŋo, bee o pu kpen'e, bee o a saan bee o yi moogin na, bee o a yamug bee o ka' yamuga, amaa Kiristo ma'aa gaad si'el wusa ka be o nidib wusa ni. 12Yaname a bane ka Wina'am gaŋ ye ya a o nidib bane ka o noŋ la, more nimbaanlzoor, ka suŋidi nidib, ka siedi ya meŋ, ka a poten'esuŋ dim, ka a suguru dim 13ne bane gban'adi ba meŋ ka ket taaba tuumbe'edi basid wuu Zugsob la yiisi ya tuumbe'edi bas si'em la, niŋimini ala men. 14Ka line gaad li wusa ane ye ya mor noŋilim ka line la'ased si'el wusa ka li a gumm. 15Keli ka Kiristo sumalisim la so'e ya sunya ka li ane sumaliskan yela ka Wina'am buoli ya, ka ya a niŋgbiŋ yinni. More Wina'am bareka pu'usug. 16More Kiristo labaar la su'uŋa ya sunya ni, n zamisid ka sa'an taaba ne ya'amsuŋ ka yuum yuuma line be Wina'am gbauŋin la, ne Wina'am nidib yuuma ne yuumbane ka Wina'am Siig Suŋ tisi ya la, ka kpelim mor Wina'am bareka pu'usug ya sunya ni. 17Line mekama ka ya niŋid, li ane tuuma bee pian'ade, niŋimi li Zugsob Yesu Kiristo yu'urin, ka pu'usidi ti Ba' Wina'am bareka ne Yesu Kiristo yu'ur zug. 18Po'aba, siakimi ya sidib noya, ka li nar ka po'ab bane dol Zugsob la niŋidi ala. 19Sidiba, noŋimi ya po'ab, ka da toe ne baa. 20Biise, siakimi ya saamnam ne ya manam noya wusa ka line malis Zugsob la. 21Du'adiba, da san'asi ya biis galise, ka ba na sin'ig. 22Yamise, siakimi ya zugsobnam noya wusa ka da tummi ban na be ne ya ma'anee, ka ba ten'es ye ya ane tuumsuma dima, amaa ka lee tumi li ne poog yinni, Zugsob la na'asi yela. 23Lin wusa ka ya tumid, tumi li ne poog yinni wen wuu ya tumne tisid Zugsob la, ka ka' nidiba. 24Ya mi' ye Zugsob la na tisi ya nyood lin ka o da yeli zi'el ye o na tis o nidib la. Li ane Kiristo one a Zugsob la ka ya tumi tisid. 25Tuumbe'ed sob la na di'e o tuumbe'ed la yood bozugo Wina'am pu mor baragaŋa.

will be added

X\