KOLOSE DIM 2

1Ka m bood ye ya baŋ mam kpe'eŋi m meŋ si'em wusa, ya yela ne bane be Laodisea ne bane pu nyee m ne nif nan la, 2ye ya la'am taaba ne noŋir n kpe'eŋi ya sunya, ka baŋ Wina'am yelsua'adir line a Kiristo la nyain nyain ka pu bi'esidi li yela baa bi'elaa. 3Ka Kiristo sa'an ka baŋir ne mi'ilim wusa wusa be. 4M yeli ya nwa ne ka so' da ma'a ya ne ya'am gonluŋo, 5ka m ba'a be ne ya, hale baa man ka'a ya sa'an la, ka m sunf malis ne ya suer la dolim ne yaname siak Kiristo kiŋ kiŋ la. 6Dinzugo yaname sadigim siak ye Yesu Kiristo a Zugsob la, bei ne o ne noor yinni, 7ka gban'e o wenne tiig nya'a gban' teŋ kiŋ kiŋ si'em la, ka ya yadda niŋir nobug, ka ke ka ya beilim Yesu ni a wuu tiname pa'ali ya si'em la, ka tisidi Wina'am bareka pu'usum bedego. 8Gu'usimi, ka so' da pan'asi ya ne pa'alug line wen wuu ya'am pa'alugo, ka a dama'a zaal, ka a pa'alkuda ne saalib yiiga pa'ala, ka pu yi Kiristo ni na laa. 9Ka Wina'am a si'em wusa la, Kiristo me da ane ala o niŋgbiŋin. 10Ka yaname a yinni ne o la zug ka ya nye nyovur bedego. Kiristo ane kpeenm ka so'e line wusa mor paŋ ne kpi'euŋ. 11Yanam a Wina'am nidib n a yinni ne Kiristo la, ka zanbin line pa'al ye ya a o nidib la, ka'ane baŋo kpen'esug niŋgbiŋinee, ka ane ye Kiristo yiisi ya poten'ebe'ed ya ni. 12Yaname daa di'e ku'om suub la, li nwaasne wuu ba la'am mumi ya ne Kiristo. Ka yaname niŋ Wina'am yadda on vu'ug Kiristo kumin si'em la, li me nwaasne wuu ya la'am vu'ugi ne o. 13Ya tuumbe'ed ne ya saalib boodim line pu dol suer la da ke ka ya zi' Wina'am ka wenne bane kpine. Ka Wina'am ke ka ya la'am vu'ug ne o. O da yiisi ti tuumbe'ed wusa bas. 14Yesu yiis wada kan daa sob, ka li kati ti saria la, ka li moŋidi ti buod la, n zaŋi li kpa'a tabil o dapuudir la zug. 15Kiristo ku'um dapuudir la yela ke ka o sa'am siisbe'ednam bane mor paŋ ne kpi'euŋ wusa ka diisi ba nyan paalo ni, on nyaŋe ba la zug. 16Dinzug, da ke ka so' yel ye ya niŋimi anwa ne anwaa, diib sieba yela bee nuub yela bee yuum yuum malima bee nwadipaalis malima bee daba ayopoi vu'usum daar yela. 17Bama nwa da nwaasne line na ti kena la, ka li ameŋa a Kiristo. 18Da ke ka one ma'a ye o kpi'em gat uf pan'as uf ka ma'a ye Wina'am nie si'el pa'al on ne, ka nyidigid n ma'adi siedi o meŋ ka pu'usid maleknama. Ninkaŋa du'osidi o meŋ ka li gbin kae', bozugo li ane ninsaalib ten'esug ka o dol, 19ka pu dol Kiristo yela. Kiristo wenne zugne, ka ket ka yadda niŋidib wusa a gumm ka nobugid wuu Wina'am bood si'em, wuu niŋgbiŋ duta ne giinla ke ka niŋgbiŋ a gumm ka mor paŋ si'em la. 20Yaname sadigim wen wuu ya la'am kpine ne Kiristo ka bas saalib yiiga pa'ala la, da niŋidi wuu ya beilim kudug la ka siak wada bama buudi bane ye, 21“Da di ne'enam, bee da lemi li, bee da si'isi li laa.” 22Ban yela ka lin ka ba dit la mor kpienr poogin la. Li ane saalib ma'aa wada tisib ne pa'alug. 23Ka wadkaŋa tu'asne wuu ya'am pa'alug ka ket ka namisug pu'usug ne meŋsier ne niŋgbiŋ namisug nobugid, amaa ka ka' paŋ ye li kad ninsaal boodim ya'amleogo.

will be added

X\