KOLOSE DIM 1

1Mam, Paul one ka Wina'am gaŋ ka m a Yesu Kiristo Tumtum, ne ti ba'abiig Timoti 2n sobid gbauŋ kaŋa tisid yanam bane a Wina'am nidib, ka a yinni ne Kiristo ka be Kolose teŋin ka a ti ba'abiis bane a yadda dim la. Ti Ba' Wina'am na tisi ya yelsum ne sumalisim. 3Tinam yiti pu'usid Wina'am one aa ti Zugsob Yesu Kiristo Ba' la tisidi ya saŋa mekama. 4Ti pu'usid o bareka tiname wum ye ya niŋid Yesu Kiristo yadda ka noŋ Wina'am nidib wusa la, 5yaname mor ti'ir ne line ka Wina'am digil arazana ni n guri ya la zug. Ya pun deŋim wum ti'ir la yela sida pian'adin line a Wina'am labasuŋ la, 6ka ba mooli tisi ya la. Ka zin'is bedego ka nidib bedego siak Wina'am labasuŋ la, ka ba kal pe'esid. Ala men ka li me niŋidi ya sa'an saŋa kan ka ya wum Wina'am popielim yela ka sid baŋi li n ti paae nannanna la. 7Ya zamis ne'eŋa Epafras sa'an one aa ti tumtum tiraan Yesu Kiristo ni, ka lem a Kiristo tumtum yelmeŋir ka zi'e ti noba zug ya yela la. 8O yeli ti yanam mor noŋilim Wina'am Siig Suŋ ni si'em la. 9Dinzug ka ti pu basi ka kpelim sosid Wina'am tisidi ya, saŋa kan ka ti wum ya labaar la n ti paae nannanna, ka sosid Wina'am ye ya baŋ o poten'er bood si'em su'uŋa, ne ya'amsuŋ ne baŋir line ka Wina'am Siig la tisid. 10Ti sosid ye ya tuuma n nar Zugsob la, ka li ma'ae o suunr bedego, ka ya tum tuumsuŋ wusa, ka ya Wina'am yela baŋir pe'es. 11Ka Wina'am paŋ tita'ar la zug ka ya na mor paŋ bedego men, ye ya tun'e modig su'uŋa ne sumalisim 12ka na pu'usidi ti Ba' Wina'am bareka. On maali ya ka ya nar ye yanam la'am ne ya Wina'am nidib taaba n di'e line a ya din ka be Wina'am so'olim line a nyain la ni. 13Wina'am faann ti Sutaana so'olimin line a likine n ta'asi ti o Binoŋir so'olimin. 14On zug ka ti nye yolisim ka Wina'am yiisi ti tuumbe'edi bas la. 15Wina'am one ka ba pu nyet la a si'em la Yesu me sid ane ala. O ane bun kane maal wusa la kpeenm. 16Ka li yine o sa'an na ka Wina'am maali li wusa, bun bane be dunia ni bee saazug, bee bun nyeta, bee bane pu nyetaa, bee bane mor na'am bee so'olim, bee paŋ, bee kpi'euŋ la. Ka bun wusa maalug yine o sa'an ka ane o meŋ yela. 17O pun deŋim be ka si'el si'el nam kae', ka o paŋ ket ka li wusa a gumm. 18One a Wina'am nidib kpeenm wuu zugu a yiiga si'em niŋgbiŋin la, ka lem a yiiga sob bane vu'ug kumin la, ye o a si'el wusa kpeenm. 19Ka li malis Wina'am ye on a si'em la wusa Yesu me ane ala. 20Li yine o sa'an ka Wina'am zaŋ o ziim kane yi ku'um dapuudir zug la naal noor ne bun line be saazug ne dunia ni wusa. 21Saŋsi'en la ya daa ane bi'emnam ne Wina'am, ka mor poten'ebe'ed ne tuumbe'ed. 22Amaa Yesu Kiristo ku'um la yela o naal noor ne yanam, ka na zi'el ya nyain Wina'am tuon ka ya ku lem mor gba'ar bee taale. 23Ala zug ya ya'a kpelim mor ya yadda la kiŋ kiŋ wuu eenb suŋ ne, ka pu bas ti'ir line ka ya wum labasuŋin laa, li na niŋi ala. Nwa ane labasuŋ kane ka ba daa mool tis so' wusa one be dunia ni. Labaar kan la ka mam Paul liebi li tumtum la. 24Li malis man Paul ne mane namisidi ya yela la. Namisug kan ka m namisid la ye li niŋne paae li ben wenne Kiristo n daa yel ye m na namis la. Ka li ane o niŋgbiŋ line a o nidib la yela ka m namisid. 25Ka ya yela ka Wina'am gaŋi m ye m liebi o nidib la suŋid ka mooni o labaar la su'uŋa. 26Labaar la da ane yelsua'adir saŋa kane gaad la wusa, amaa nannanna li yu'un nie tis o nidib. 27Ka Wina'am gban'e ye o ke ka o nidib baŋ ye yelsua'adir la ane yelsum tita'ar n me tis buudi wusa. Yelsua'adir la ane ye Kiristo a yinni ne ya ka tisi ya ti'ir ka ya na be ne Wina'am. 28Ti moon Kiristo yela, ka sa'an so' mekama, ka pa'ani ya ne ya'amsuŋ ye ya bi' Kiristo ni ka ti zaŋi ya n pa'al Wina'am. 29Linzug ka m kpe'eŋi m meŋ n mo hale ne paŋ tita'ar line ka Kiristo tisi m la.

will be added

X\