TUUMA 9

1Ka Saul kpelim kpen'esid Zugsob nya'andolib la dabiem ye o kuu ba, ka keŋ maalmaan kpeenm sa'an 2n bood ye maalmaan kpeenm la sob gbana n tis o ka o more keŋ Jew dim la'asug doodin line be Damaskus teŋin, ka o ya'a nye so' ka o dol Yesu suer ka a dau bee po'a, on gban'e o loo more o keŋ Jerusalem. 3On be suer zug n ti li'el Damaskus la, ka neesim yi arazana ni na n nie nyain n gilig o. 4Ka o lu teŋin, ka wum kukor ka li yel o ye, “Saul, Saul, bo ka fu namisidi ma?” 5Ka Saul lebis ye, “Naa, fu a ano'one?” Ka kukor la lebis yel ye, “M ane Yesu on ka fu namisid la. 6Duom n kpen' teŋ poogin la, ka fu na wum fun na niŋ si'em.” 7Ka dap bane dol o la zi'e ka ku nyaŋe ya'ae noor yel si'ela, ka lee wum kukor, amaa ka pu nye so'o. 8Ka Saul due n lak o nini ka pu tun'e nyet si'ela. Ka ba ve' o n mor o keŋ Damaskus. 9Dabisa atan' ka o nini pu nyeta. Ka o me pu di diib bee nu si'ela. 10Ka nya'andolib ayinni daa be Damaskus, ka o yu'ur buon Ananias. Ka o nye si'el ka li wenne zaansuŋ ne, ka Zugsob la buol o ye, “Ananias.” Ka o lebis ye, “Mane nwa, Zugsoba.” 11Ka Zugsob la yel o ye, “Duom n dol suer lin ka ba buon sapi suer la, n keŋ Judas yin ka bu'os dau kane yi Tarsus, ka o yu'ur buon Saul la yela. Ka o be anina ka sosid Wina'am. 12Ka o sosug la poogin ka o nye si'el ka li wenne zaansuŋ ne, ka dau kpen'e na n tik o ne nu'us, ye o nini la lak. O yu'ur daa buon Ananias.” 13Amaa ka Ananias lebis ye, “Zugsoba, m pun wum dau nwa yela bedego on tum Wina'am nidib be'ed si'em Jerusalem ni. 14Nannanna ka o di'e noor maalmaan kpeenmnam sa'an ye o gban'e ban wusa pu'usid ne Zugsob yu'ur la.” 15Amaa ka Zugsob la yel Ananias ye, “Kem ka m gaŋ o ne ye o tum m tuuma n zaŋ m yu'ur n keŋ nimbane ka' Jew dim buudi la ni, ne na'anam ne Israel yaas sa'an. 16Mam meŋ na pa'al o, one na namis si'em Zugsob la yu'ur zug.” 17Ka Ananias keŋ n kpen' yin la ka tik Saul ne o nu'us n yel o ye, “M ba'abiig Saul, Zugsob Yesu one nie o meŋ n pa'al uf suer kan ni ka fu yi na la, one tum man fu sa'an na ye fu nini la lak, ka Wina'am Siig Suŋ la pe'el uf.” 18Ka si'el line wenne pa'ad kpelim yi Saul nini la ni. Ka o nini lak ka o nyet. Ka o due di'e Wina'am ku'om suub, 19ka di diib ka o paŋ leb na. Saul daa kpelim ne nya'andolib la dabisa bi'ela Damaskus teŋin. 20Ka li pu yuuge ka o kpen' la'asug doodin la n moon n yet ye, Yesu ane Wina'am Biig. 21Ka li lidig bane wumi li la wusa. Ka ba yel ye, “Ka'a dau kaŋa nwa daa be Jerusalem ni n kpe'eŋidi o meŋ n namisid nimbane pu'usid ne yu'ur kaŋa nwa laa? Lin yela ka o kenn kpela na ye o gban'e ba lo n more ba keŋ maalmaan kpeenmnam sa'an.” 22Amaa ka Saul kpelim paasid ne paŋ, ka nyaŋ Jew dim bane be Damaskus la n nie pa'ali ba ye, Yesu la a Kiristo. 23Ka dabisa bedego n gaad la ka Jew dim gban'e noor yinni ye ba kuu o. 24Ka Saul daa baŋ ban gban'e ye ba niŋ si'em la. Ba daa gur teŋ la yaŋa ni nintaŋ ne yu'uŋ ye ba kuu o. 25Amaa o nya'andolib la daa zaŋ o yu'uŋ n ke ka o zin'in peogin n sigis o zaŋguom zug. 26Ka o daa paae Jerusalem ni la n bood ye o la'as ne nya'andolib la. Amaa ba daa zot o dabiem, ban daa pu niŋ o yadda ye o ane nya'andol la zug. 27Amaa ka Barnabas zaŋ Saul n mor o keŋ Tumtumnib la sa'an n pa'ali ba Saul daa nye Zugsob la sueren, ka Zugsob la tu'as o si'em, ne Saul daa mool Yesu yela la ne sukpi'euŋ Damaskus teŋin si'em. 28Ka Saul daa be ne ba Jerusalem ni, ka yiti goond, 29ka moon Zugsob Yesu yela ne sukpi'euŋ ka tu'as ka nwa'as nonwa'ar ne Jew dim bane wum Greek pian'ad la. Ka ba bood ye ba kuu o. 30Ka yadda niŋidib la baŋ li yela ka mor o n keŋ Sizerea teŋin n ke ka o yi keŋ Tarsus teŋin. 31Ka yadda niŋidib la wusa bane be Juuda ne Galilee ne Samaria daa mor sumalisim. Ka ba kal paasid. Ka ba yadda niŋir nobugid. Ka ba na'asid Zugsob la ne ba sunya wusa. Ka Wina'am Siig Suŋ suŋidi ba. 32Ka Piita daa goond zin'ig zin'ig ba soogin la, ka saŋa si'a ka o keŋ Wina'am nidib bane be Lidda teŋin la ni. 33Anina ka o nye dau ka o yu'ur buon Aeneas. Ka o ben' n pon'olim digi yuma anii. 34Ka Piita yel o ye, “Aeneas, Yesu Kiristo tis uf laafe. Duom n maal fu digisig la digil.” Ka o due yimmo. 35Ka ban wusa be Lidda ne Saron teensin la nye o la, ba noki ba meŋ n tis Zugsob la. 36Ka nya'andolib la yinni be Joppa ni, ka o yu'ur buon Tabita. Li gbin ane Dorkas bee Molif. Ka o a tuumsuma daan, ka suŋid noŋ dim. 37Ka saŋkan la ka o lu ban'as n kpi. Ka ba su o n zaŋ o du n digil girimbiisa doogin. 38Joppa daa pu lal ne Lidda. Ka nya'andolib la wum ye Piita be anina la ka tum nidiba ayi ye ba buol o na, ye o da yuuge ka kena. 39Ka Piita due n doli ba keŋ. Ka ba paae n mor o du girimbiisa la ni. Ka pokonya la wusa zi'e kpi'e ne Piita ka kum kuur ka pa'an fuud ban ka Dorkas daa maal n tisi ba on daa be ne ba la. 40Amaa Piita daa yiisi ba wusa yiŋ, ka igin n sos Wina'am ka yel kpi'im la ye, “Tabita, duom.” Ka o lak o nini n nye Piita ka due n zin'in. 41Ka Piita gban'e o nu'ug n due o n zi'el, ka buol yadda niŋidib ne pokonya bane niŋ yadda la n zaŋ o tisi ba. Ka o voe. 42Ka Joppa teŋ dim wusa daa wum yelkaŋa nwa la, ka ba bedego niŋ Zugsob la yadda. 43Ka Piita daa kpelim Joppa teŋin la dabisa bedego. O daa bene Simon on a gbanzab la yin.

will be added

X\