TUUMA 8

1Ka Saul daa siak Sitivin ku'um la yela. Ka ba pin'il saŋkan la, n namis bane niŋ Yesu yadda ka be Jerusalem la, hale ka ba wusa zo widig n keŋ Juuda ne Samaria so'olim ni, ka Tumtumnib la gullim kpelim. 2Ka nimbane zot Wina'am daa ze Sitivin keŋ mum o, ka maal susa'aŋ ka kum o kuur hale bedego. 3Amaa Saul daa kpe'eŋ o meŋ ye o sa'am bane niŋ Yesu yadda la wusa ka kpen'ed yaan n gban'ad po'ab ne dap n kpen'esid sarega ni. 4Ka bane daa zo widig la daa kenne ka moon Wina'am labaar la zin'is wusa. 5Ka Filip daa keŋ Samaria teŋ si'a n mool Kiristo labaar la n tisi ba. 6Ka nidib bedego daa maal noor yinni ka kelisid Filip n tu'asidi ba si'el la, ban wum ka nye tuumnyalima ban ka o maal la. 7Kikiris daa tans ne paŋ ka yi ka bas ban daa mor sieba la. Ka nidib bedego ban nu'us ne noba kpi la, daa nye laafe. 8Ka sumalisim bedego daa be teŋ la poogin. 9Ka dau so' daa be teŋ la ni ka o yu'ur buon Simon. O daa bugid ba'akolug ka li lidigid Samaria teŋ nidib. Ka o du'osi o meŋ ye o ane nintita'ar. 10Ka nidib wusa siakid o su'uŋa, tadimnam ne kpi'emnam wusa n yet ye, “Dau kaŋa mor Wina'am paŋ tita'ar.” 11Ka nidib siak o su'uŋa ka li yuug on daa ke ka ba lidigid ne o ba'akolug bugib la zug. 12Amaa Filip n mool Wina'am na'am ne Yesu Kiristo labasuŋ la, ba daa niŋ yadda ka o suu ba ku'om, po'ab ne dap wusa. 13Ka Simon meŋ me niŋ Yesu yadda, ka di'e ku'om suub ka be Filip sa'an, ka nyet tuumnyalima line maan la, ka li lidig o. 14Ka Tumtumnib bane be Jerusalem la n wum ye Samaria dim pun di'e Wina'am pian'ad la, ka ba tum Piita ne Joon ba sa'an. 15Ka ban n paae anina la ba sos Wina'am tisi ba ye ba di'e Wina'am Siig Suŋ la, 16Wina'am Siig Suŋ la daa nam pu sigi ba zutin la zug. Ba lee daa di'ene ku'om suub ne Zugsob Yesu yu'ur la gullim. 17Ka ba zaŋi ba nu'us n pa'al ba zutin ka ba di'e Wina'am Siig Suŋ la. 18Simon n nye ka li ane Tumtumnib nu'us pa'alug la zug ka ba di'e Siig Suŋ la, o daa bood ye o tisi ba ligidi, 19ka yeli ba ye, “Tisi m paŋ kaŋa nwa ka on mekama ka m na pa'al m nu'us o zug, na di'e Siig Suŋ la.” 20Amaa Piita daa yel o ye, “Fun ne fu ligidi la na ba'as yori, fun ten'es ye Wina'am piini la da'ad ne ligidi la zug. 21Fu ba'atoog kae' tuuma nwa ni, bee fu poor ka' li ni, bozugo fu suunr ka'a su'uŋa Wina'am sa'ane. 22Tiakim fu suunr ne tuumbe'ed kaŋa nwa, ka sos Zugsob la ka o yiisi fu tuumbe'ed lin ka fu ten'esid fu suunrin la n bas; 23ka man nyeya ka fu mor ne sutoog ka tuumbe'ed lo uf.” 24Ka Simon lebis n yel ye, “Sosim Zugsob la tisi m, ka bun line ka ya yel la baa yinni da paae ma.” 25Piita ne Joon di kaset ka mool Zugsob Wina'am labaar anina. Ka daa lebid Jerusalem ka moon labasuŋ la Samaria teens bedego ni. 26Ka Zugsob malek tu'as n tis Filip ye, “Duom n kpa'a nintaŋ dagobug n keŋ kidig pipirig suer kane yit Jerusalem n ken Gaza la.” 27Ka o du'e n keŋ, ka nye Etiopia dau so' ka o a nintita'ar Etiopia teŋin ka gur po'ana'ab Kandase ligidi. Ka o keŋ Jerusalem n sos Wina'am, 28ka lebidi n kun ka zin'i teroko kane ka widi teed la ni n karem Wina'am nodi'es Azaya gbauŋ. 29Ka Wina'am Siig la yel Filip ye, “Kem n li'el teroko la, ka doli li.” 30Ka Filip zo n paae n wum ka o karem Wina'am nodi'es Azaya gbauŋ. Ka Filip bu'os o ye, “Fu baŋ fun karem si'el nwa gbin ne?” 31Ka o lebis ye, “M na niŋ wala n baŋi li ka ninso' pu pa'ali ma?” Ka o sos Filip ye, “Dum na n zin'in m sa'an.” 32Wina'am gbauŋ zin'ig kan ka o karem la da sob ne ye, “Ba da mor o na wuu pe'og kan ka ba ken kuub ne, ka wenne pebil kan ka ba kiesidi o konbid, ka o pu kaas ye o faaenn o meŋa. 33Ka ba po'og o ka pu kat o saria la ka li dol suer su'uŋa. Ka so' kae' na yel o, o yaas yelaa, o nyovur n naae dunia nwa ni la zug.” 34Ka po'ana'ab ligidgur la yel Filip ye, “M bood ye m baŋi, Wina'am nodi'es Azaya tu'asidi o meŋ yel bee ninso' yela?” 35Ka Filip ya'ae o noor n pin'il ne Wina'am gbauŋ kan ka o karem la, n mool Yesu labasuŋ la n tis o. 36Ka ba dol suer n keŋ paae zin'isi'a ka ku'om be. Ka ligidgur la yel Filip ye, “Gosima, ku'om nwa kpela. Bo na vi'i m suer ne ku'om suubo?” 37Ka Filip yel o ye, “Fu ya'a niŋ yadda ne fu suunr wusa fu na tun'e di'e ku'om suub.” Ka o lebis n yel ye, “Man siak ye Yesu Kiristo la ane Wina'am Biig.” 38Ka o ke ka teroko la zi'en. Ka Filip ne on babayi wusa sig ku'omin la ka Filip suu o Wina'am ku'om. 39Ka ban du ku'omin na la, ka Zugsob Siig la daa zaŋ Filip n gaad. Ka ligidgur la pu lem nye o ya'ase, ka gban'e o suer n ken ne sumalisim. 40Ka nidib nye Filip Azotus teŋin. Ka o gaad ka moon labasuŋ la teens la wusa ni, hale n paae Sizerea teŋin.

will be added

X\