TUUMA 7

1Ka maalmaan kpeenm la bu'os Sitivin ye, “Ala bee?” 2Ka o lebis ye, “M zuanam ne m saamnama, kelisimi. Wina'am one a na'am tita'ar daan la, daa nie o meŋ ti yaab Abraham sa'an on da be Mesopotamia teŋin ka nam pu keŋ n zin'in Haran teŋin la, 3ka yel o ye, ‘Yiim ka bas fu teŋ ne fu buudi, ka keŋ teŋ kan ka m na pa'al fu la.’ 4“Ka Abraham yi Kaldea teŋin la n keŋ zin'in Haran teŋin. Ka o saam ku'um nya'aŋ ka Wina'am lem yiis o keŋ teŋ kan ka ya be nwa ni, 5ka pu tis o paalo teŋ la ni ka li siak o nobir tienri, amaa ka len yeli zi'el ye, o na tis o teŋ kan. Ka o ku'um nya'aŋ ka o yaas me na ti so'e li. Ka saŋkan la ka o nam pu du'a biiga. 6Ka Wina'am da yel o ne'eŋa ye, ‘Fu yaas la na ti keŋ teŋ si'a ni n lieb saam ne yamis anina, ka ba na namisi ba yuma kobus naasi. 7Amaa m na ti namis so'olim kan ka ba na ti a yamis la ka li nya'aŋ ka ba na yi anina na n pu'us m kpela.’ 8Ka Wina'am tis Abraham noor ye, on ne o yaas wusa kpen'em baŋo. Ka li pa'al ye Wina'am ne Abraham siak taaba noor. Ka Abraham n da du'a Isaak li daba anii daar la ka o kpen'es o baŋo. Ka Isaak du'a Jakob. Ka Jakob du'a ti Jew dim yaanam piina ayi la. 9“Ka ba da nen Josef ka kuos o n tis Egipiti teŋ dim. Amaa ka Wina'am da be o sa'an, 10ka yiis o namisug wusa poogin n ke ka o tuuma malis Egipiti teŋ na'ab Faaro ka tis Josef ya'am na'ab la tuon. Ka na'ab la tis o noor ka o so'e Egipiti teŋ ne on yir wusa. 11“Ka ko'omtita'ar lu Egipiti so'olim ne Keinan teŋin hale ka li a toog. Ka ti yaanam la da ka' diibo. 12Amaa Jakob n da wum ye, diib be Egipiti la, ka tumi ti yaanam. 13Ka ba lebug line paas abuyi la ka Josef ke ka o ba'abiis la baŋ o. Ka Faaro me baŋ Josef ba' yidim. 14Ka Josef tum buol o ba' Jakob ne o yidim wusa. Ba kal da paae piisyopoi ne anu. 15Ka Jakob due n keŋ Egipiti teŋin. Anina ka on ne ti yaanam da kpi. 16Ka ba zee ba n keŋ Sekem teŋin n mumi ba yaug kan ka Abraham da da' ne ligidi Hamor biis sa'an la. 17“Amaa Wina'am noor zi'elug ne Abraham saŋa n da li'el la, nidib da paasne n lebig bedego Egipiti teŋin. 18Hale ka so' ti di Egipiti na'am ka pu mi' Josef yele, 19ka maal ya'ambe'ed ne ti buudi la, ka mugusi ti yaanam ka ba bas bilies ka ba kpi. 20“Saŋkaŋa nwa ka ba da du'a Moses ka o a bivenliŋ ka paae Wina'am ya'am. Ka ba ugus o nwadisa atan' o ba' yin. 21Ka ban da bas o la, Faaro bipuŋ da nok o ugus. Ka o lieb o meŋ biig. 22Ka Moses zamis Egipiti dim ya'am wusa ka da a nintita'ar, o pian'ad ne o tuuma wusa ni. 23“On da paae yuma piisnaasi la, li da kenn o suunrin na ka o bood ye o keŋ kaae o buudi bane a Israel yaas la, 24ka nye ba nid yinni ka ba namisid o. Ka o suŋi ti nid la n ku one a Egipiti nid ka namisid o la n lebis sam, 25ka ten'esid ye o buudi la na baŋ ye Wina'am bood ye o ke ka on yiisi ba, ba fara la ni. Amaa ka ba pu baŋi. 26Ka beog nie ka o nye nidiba ayi ka ba zabid ne taaba. Ka o bood ye o ke ka ba naal noor la ka bu'osi ba ye, ‘M zuanama, ya ane ba'abiis, ka bo niŋ ka ya zabid taaba?’ 27“Ka one maal o kpi'e be'ed la da'e o, ka bu'os ye, ‘Ano'on tis uf noor ye fu so'e ti ka tu'as ti antu'a? 28Fu bood ye fu ku m wenne fu sa ku Egipiti dim dau si'em laa?’ 29Pian'ad kaŋa zug, ka Moses zo keŋ Midian teŋin n lieb saan. Anina ka o du'a biis ayi. 30“Ka yuma piisnaasi n gaad la ka o da be moogin line kpi'e Sinai zuer, ka nye ka bugum pielim be tituugin ka Zugsob malek nie o meŋ anina. 31Moses n nye li la ka li lidig o, ka o li'el ye o gosi li. Ka kukor yi Zugsob la sa'an na 32n yel ye, ‘Mane a Wina'am on ka fu yaanam Abraham ne Isaak ne Jakob da pu'usid la.’ Ka Moses kirid ka pu nyaŋe gosi lii. 33“Ka Zugsob la yel o ye, ‘Pidigimi fu ta'ada la, ka zin'ikan ka fu zi'e la a zin'isuŋ. 34M nye m nidib bane be Egipiti teŋin n namisid si'em, ka wumi ba fabulug ka sig na ye m faaenn ba. Ala zug kem na ka m tum uf Egipiti teŋin.’ 35“Moses kan ka ba da zan'as la, ka yel o ye, ‘Ano'one tis uf noor ye fu so'e ti ka tu'as ti antu'a?’ On la ka Wina'am da ke ka o malek pian' tis o tituugin la. On la ka Wina'am tum ye o so'e o nidib ka yiisi ba namisug poogin la. 36Ka o more ba yi Egipiti teŋin maal o nyalima tuuma anina, ne ateuk zen'ugin la, hale yuma piisnaasi moogin. 37“Moses kan la n da yel Israel dim ye, ‘Zugsob Wina'am na yiis o nodi'esid ba buudi sisoogin wenne wuu on daa yiis mam ba ni si'em la.’ 38One da be Wina'am nidib sa'an moogin ka da bee ti yaanam sa'an, ne malek kan da tu'as n tis o Sinai zuerin la, ka da di'e Wina'am pian'ad ka li voe n tisi ti la. 39“Amaa ti yaanam da pu bood ye ba siak o noore, ka zan'as o, ka ten'esi ba sunya ni n da bood ye ba leb Egipiti teŋin. 40Ba da yel Aaron ye, ‘Maalim wina n tisi ti ka li bee ti tuon. Ka Moses kan more ti yi Egipiti teŋin na la, ti pu baŋ bun line niŋ o.’ 41Ka ba ya'ab na'abil ka li a ba win ka maan ba'ar, ka maan sumalisim ne ba meŋ nu'us n maal si'el la. 42Dinzug ka Wina'am basi ba ka ba pu'usid bun line be agol wusa, wuu lin sob Wina'am nodi'esidib gbana poogin si'em ye, ‘Israel nidiba, li ka'a mam ka ya ku bunkonbid n maal maana yuma piisnaasi moogin n tis laa, 43Lin ka ya da zee keŋ la, da ane Win Molek fudoog ne Win Refan nwadibil. Lin la ka ya da maal n pu'usid la. Alazug m na yiisi ya ka ya keŋ hale n gaad Babilon teŋin.’ 44“Ti yaanam da mor fudoog moogin la ka Wina'am wada la da be li poogin. Ba da maali li hale Wina'am da pian' n tis Moses n yel o ye o maalimi li wenne wuu on nye si'em la. 45Ti yaanam bane di'e fudoog la ba saamnam sa'an la, da zee li keŋ ne Josua ka so'e so'olim kan ka Wina'am da kad nidib n yiisi ba tuon la. Ka li kpelim be n paae David saŋa. 46David da paae Wina'am ya'am ka sos o ye o kel ka o me yir n tis on kan ka o yaab Jakob da pu'usid la. 47Amaa li ane Solomon n da me' yir n tis Wina'am. 48“Amaa Wina'am one gaad bun zan'asa la pu zin'i ya ban ka ninsaalib n me' ne nu'us ma'aa nii, wuu Wina'am nodi'esidib yinni da yel ye, 49‘Zugsob yel ye, “Arazana ane man na'am gbauŋ, ka dunia me a mam noba kuk. Bo yir ka ya na me' n tis mane? Ka yaani n a mam vu'usum zin'iga? 50Li ka' mam nu'usi maal si'elnam wusa bee?” ’ 51“Yanam bane zuti kpi'em ka ya pu dol Wina'am ne ya sunya, ka pu kelisid Wina'am labaar la, ya kpe'eŋid n zan'asid Wina'am Siig Suŋ daar wusa wenne ya yaanam me da niŋ si'em la. 52Wina'am nodi'esid kane da be, ka ya yaanam la da pu namis o? Ba da ku sieba bane da pun mool Wina'am popielim tumtum daan la ken na la yela. On la men ka ya zam o ka ku o la. 53Ya ane bane da di'e Wina'am wada ban ka Wina'am tisi ya maleknam sa'an la. Amaa ya pu siaki lii.” 54Ban wum ne'eŋa la, ba sunya pelig ka ba ga'adi ba nyina o yela. 55Amaa Sitivin daa pe'el ne Wina'am Siig Suŋ la, ka gorig n gosid arazana ni kii, ka nye Wina'am na'am nie nyeen pil pil ka Yesu zi'e Wina'am datiuŋ. 56Ka o yeli ba ye, “Gosimi ya, m nye ka arazana yo'og ka Ninsaal Biig la zi'e Wina'am datiuŋ.” 57Ka ba endi ba toba ka tans ne kukotitada n niŋ noor yinni la'as taaba n zo n gban' o, 58ka ve'eg o yiis teŋ poogin n lob o ne kuga. Ka kasetib zaŋi ba fuud n gu'ul dasaŋ ka o yu'ur buon Saul. 59Ka ban lobid Sitivin ne kuga la, ka o sos Zugsob n yel ye, “Zugsob Yesu di'emi m siig” 60Ka igin teŋin n tans ne paŋ n yel ye, “Zugsoba, da niŋ nimbama nwa taale ba tuumbe'ed kaŋa zugo.” On yel ne'eŋa la ka bas o meŋ.

will be added

X\