TUUMA 6

1Ka dabisa bama saŋa ka nya'andolib kal n daa paasid la, Jew dim bane daa pian'ad Greek daa nwa'asid ne Jew dim bane daa pian'a Hibiru pian'ad ye ban n suŋid nidib ne diib daar wusa la, ba pu tisid ban pokonya la si'ela. 2Ala zug ka Tumtumnib piinayi la buol nya'andolib la wusa n yeli ba ye, “Li pu nar ye ti bas Wina'am labaar moolug ka tum diib tuuma. 3Dinzugo ti zuanama, gosimi ya sisoogin la n gaŋ dapa ayopoi bane a ninsuma nidib sa'an, ka a ya'amdim, ka Wina'am Siig Suŋ bee ba ni bedego, ka ti zaŋ tuumkaŋa nwa n niŋi ba nu'usin. 4Ka tinam na kpelim pesigi ti meŋ Wina'am sosugin ne labasuŋ la moolug tuuma ni.” 5Ka ban yel si'em la daa niŋ nidib la wusa malisim. Ka ba gaŋ Sitivin one niŋ yadda bedego, ka Wina'am Siig Suŋ bee o ni bedego, ne Filip, ne Prokorus ne Nikanor ne Timon ne Parmenos ne Nikolas one yi Antiok teŋin na ka dol Jew dim pu'usum maluŋ la. 6Ban ka ba more keŋ Tumtumnib la sa'an ka ba pa'ali ba nu'us ba zutin n sos Wina'am n tisi ba. 7Ka Wina'am pian'ad la yadigid ka nya'andolib la kal me paasid bedego Jerusalem ni. Ka maalmaanib la bedego daa siak n niŋ Yesu yadda. 8Ka Sitivin daa mor Wina'am yelsum bedego ne paŋ la, ka tum nyalima tuumtitada nidib sisoogin. 9Amaa ka ninsieba bane pu'usid la'asug doog si'a, ka li yu'ur buon So'e M Meŋ dim ka ba yi Sairene teŋin ne Alekizandria teŋin, ne Jew dim sieba bane yi Silisia ne Asia teensin na, ka ba nwa'as nonwa'ar ne Sitivin, 10ka ku tun'e lebis o pian'a kan ka o pian'ad ne ya'am kan ka Wina'am Siig Suŋ tis o laa, 11ka maal zam n bo nidib bane yel ye, “Ti wum ka o pian' pian'abe'ed n tu'u Moses ne Wina'am.” 12Ka ba ke ka nidib la sunf due la'am ne kpeenmnam ne gbauŋmi'idib la ka keŋ gban' o mor o keŋ kpeenmnam la'asug sa'an, 13ka buol ziri kasetib ka ba tu'as n zuol o zugin ye, “Dau kaŋa nwa tu'ud Wina'am pu'usum yisuŋ ne Wina'am wada ka pu basida. 14Ti wum ka o yel ye, Yesu one yi Nazaret na la, na sa'am Wina'am pu'usum yir la ka tiak malima ban ka Moses tisi ti la.” 15Ka ban wusa zin'i kpeenmnam la'asugin la, gosid Sitivin kii, ka nye ka o nindaa wenne malek nindaa ne.

will be added

X\