TUUMA 4

1Ka ban nam tu'asid ne nidib la, ka maalmaan kpeenmnam ne Wina'am pu'usum yir gurib kpeenm, ne Sadusii dim keenn ba sa'an na. 2Ka ba sunya pelig ne Tumtumnib la ban pa'an nidib ka mooni Yesu ku'um vu'ugir labaar tisidi ba la, line na nie pa'al ye ku'um vu'ugir be. 3Ka ba gban'e ba n kpen'es sarega ni ye beog nie, lin daa a zasisobir saŋa la zug. 4Amaa nidib bane daa wum Wina'am labaar la bedego sa daa niŋ o yadda. Ba dap kal daa a wuu tusa anu. 5Ka beog nie la, ka na'anam ne kpeenmnam ne gbauŋmi'idib la la'as taaba Jerusalem ni. 6Ka Annas, on a maalmaan kpeenm, ne Kaifas ne Joon ne Alekizanda ne nidib bedego bane a maalmaanib buudi la daa la'as taaba. 7Ka ba more ba na n zi'el ba tuon ka bu'osi ba ye, “Ano'on tisi ya paŋ ne noor ye ya maalim nwa?” 8Ka Wina'am Siig Suŋ pe'el Piita ka o yeli ba ye, “Yanam bane so'e nidib laa, ne Israel kpeenmnama, 9li ya'a ane ye ya bu'osi ti zina daar nwa n baŋ tuumsuŋ kan ka ti sa maal n tis pon'or la ne line ke ka o nye laafe la 10ya wusa ne Israel dim wusa baŋim ye li ane Yesu Kiristo one yi Nazaret na la zug, ka nid nwa zi'e ya tuon ka mor laafe la. On ka ya daa kpa' tabil dapuudir zug n ku, ka Wina'am daa vu'ug o kumin la. 11Li sob Wina'am gbauŋin, Yesu n tu'as o meŋ yela ye, ‘Kugir kan ka tanmeedib daa ne'es la, lieb lodigin kugir.’ 12So' lem kae' a faangire. Ka yu'ursi'a lem ka' dunia nwa zug ya'as n na tis nidib ka ba nye tiligire.” 13Ban wum ka Piita ne Joon tu'as ne sukpi'euŋ la, ka ba mi' ye ba ane tadimnam, ka pu zamis si'el si'ela, li lidigi ba hale ka ba baŋ ye ba daa bene Yesu sa'an. 14Ban nyet dau kane sa nye laafe ka o zi'e ba sa'an la, ba pu baŋ ban na tu'as si'em n tisi ba ka li a yele. 15Amaa ba yeli ba ye, ba yim kpeŋ. Ka ba yi. Ka ba bu'os taaba ye, 16“Ti na niŋ wala ne nimbama nwa? Nidib bane wusa be Jerusalem nwa baŋi ba nyalima tuumtita'ar la yela. Ti ku tun'e n ki'isi lii. 17Amaa tiname na niŋ si'em ka bane n tum si'el la da yadigi n keŋ tuon ane ye, ti volisi ba ye ba mit ka ba lem tu'as yu'ur nwa yela n tisi nidib ya'as.” 18Dinzug ba buoli ba n yeli ba ye, ba mit ka ba lem tu'as bee pa'al nidib Yesu yela ya'as. 19Amaa ka Piita ne Joon lebis n yeli ba ye, “Li ya'a a su'um Wina'am tuon ye ti siak ya noor n gaad Wina'am noore, yanam tu'asim. 20Ka tinam ku tun'e n niŋ si'ela, asee ti tu'as bun lin ka ti nye ka wum la.” 21Ka ba volisi ba ya'as ka basi ba ye ba kem, ka pu nye yela kan na ke ka ba daami ba, nidib wusa du'osid Wina'am yu'ur su'uŋa, bun lin ka ba sa maal la zug. 22Dau kane ka ba maal nyalimkaŋa ka o nye laafe la, daa gaad yuma piisnaasi. 23Ban basi ba la, ka ba keŋi ba taaba sa'an n tu'asi ba maalmaan kpeenmnam ne kpeenmnam la n yeli ba si'el wusa. 24Ban wum li naae la, ka du'osi ba kukoya n yet Wina'am ne ya'am yinni ye, “Zugsob, one ka' tiraana, one maal agol ne dunia ne ku'otita'ar ne bun line be li wusa poogin. 25One da ke ka ti yaab David, on da a on tumtum la, tu'as ne Siig Suŋ paŋ n yel ye, ‘Bo niŋ ka dunia buudi wusa sunya pelig, ka nidib tu'asid bun yaalis yela ? 26Ka dunia na'anam due n zi'e, ka bane so'e teŋ la'as taaba n zan'as Zugsob la ne Kiristo la men.’ 27Li ane yelmeŋir ye Herod ne Pontus Pilate daa la'as taaba teŋ kaŋa nwa ni, ne bane ka' Jew dim, ne Israel nidib n zan'as Yesu, fu tumtumsuŋ, on ka fu ke ka o a Kiristo la. 28Ba maal bun line wusa ka fu pun niŋi zi'el ne fu paŋ ne boodim la. 29Zugsoba, nannanna gosim ban volisid tinam bane a fu tumtumnib la si'em, dinzugo tisimi ti sukpi'euŋ wusa ka ti mooli fu labasuŋ la. 30Fu paŋ yela kel ka bane ben'ed paam laafe, ka Yesu one a fu tumtumsuŋ la yu'ur zug, tuumnyalima ne zanbina na maal.” 31Ban sos Wina'am naae la, ka zin'ig kan ka ba la'as la n damid. Ka Wina'am Siig Suŋ pe'eli ba wusa. Ka ba tu'as Wina'am pian'ad la ne sukpi'euŋ. 32Ka nidib bedego bane niŋ yadda la, mor ya'am yinni la'am ne ten'esa yinni. Ka nid baa yinni pu yel ye on mor si'el la, one so'e lii. Li ane ba wusa din. 33Ka Tumtumnib la pian'ad Zugsob Yesu ku'um vu'ugir la ne paŋtita'ar ka yelsum bedego be ba wusa zutin. 34Ba nidib bedego ban mor pood la, kuos li n mor ligidi la na, 35n niŋ Tumtumnib la nu'usin. Ka ba pudug li n tis so' mekama wusa boodim a si'em. Ka nid baa yinni ka' ba sa'an la, ka si'el po'og o. 36Ka Josef kane a Levite buudi n yi Saipuros teŋin na, ka Tumtumnib la pud o yu'ur Barnabas. (Ka li gbin yel ye, “One kpe'eŋid.”) 37O daa kuosi o poog ka zaŋ ligidi la na niŋ Tumtumnib la nu'usin.

will be added

X\