TUUMA 28

1Ne'eŋa nya'aŋ ka ti baŋ ye teŋ la yu'uri daa buon Malta. 2Ka teŋ la nidib maali ti zuod bedego. Ka saa pin'ili niid ka waad be ka ba nyu'e bugum n di'e ti ka ti uosid. 3Ka Paul la'as dabobir n niŋid bugumin. Ka tuulug wum waaf. Ka o yi na ga' Paul nu'ug. 4Ka teŋ la nidib nye waaf la ga' o nu'ug la ka yel ba taaba ye, “Bi'esug kae', oŋa ane niŋkuud. Yelsida ku ke ka o vu'ugi, hale baa ne on nyaŋe yi ku'omin la na.” 5Amaa ka Paul misig o nu'ug ka waaf la lu bugumin ka pu niŋ o si'ela. 6Ka nidib la gu'us ye ba na nye ka o niŋgbina mot bee o na kpelim lu teŋin n kpi. Amaa lin yuug ka ba pu nye ka si'el niŋ o la ka ba tiake ba potenda ye o ane ba'ar. 7Ka zin'ig kan ka ba be la ka poog kpi'e anina yamin n a teŋ la na'ab poog. Ka na'ab la yu'ur buon Publius. Ka o di'e ti ne sumalisim. Ka ti be o yin a o saan daba atan'. 8Ka o saam ben'ed n digi ka o niŋ tul ka o saand. Ka Paul kpen' o doogin n pu'us Wina'am ka pa'al o nu'us o ni ka o nye laafe. 9Ne'eŋa niŋ la ka teŋ la nidib bane a ban'adnam wusa kena. Ka Paul sos Wina'am ka ba nye laafe. 10Ka ba tisi ti piini bedego. 11Ka nwadisa atan' nya'aŋ ka ti wa'ae ka kpen' Alekizandria teŋ aaruŋin line daa be Malta teŋin sisi'etita'ar saŋa, ka aaruŋ la yu'ur buon “Lieba.” Ka ba niŋ aaruŋ la poogin tiname bood si'el la. 12Ka ti keŋ paae Sirakuse teŋin ka zin'ini anina daba atan', 13ka naami anina n keŋ paae Regium teŋin na. Ka beog nie ka sisi'em yi ti nya'aŋ na n da'adi ti. Ka daba ayi daar ka ti paae Puteoli teŋin 14n nye yadda niŋidib sieba anina. Ka ba sosi ti ka ti zin'i ne ba daba ayopoi, ka ken Room teŋin na. 15Ka yadda niŋidib bane be Room teŋin la wumi ti yela la, ka yi na. Ka sieba paae zin'ig kane buon Saam Dooda Atan' teŋin na. Ka sieba paae zin'ig kane buon Appius Da'an teŋin na n tu'osi ti. Ka Paul n nyee ba la ka pu'us Wina'am ka o sunf kpe'eŋ. 16Tiname kpen' Room teŋin na la, ka sogia kpeenm ke ka Paul zin'ini o kon' ka sogia gur o. 17Ka daba atan' nya'aŋ ka Paul buol Jew dim kpeenmnam bane be teŋin la n la'as ka yeli ba ye, “M zuanama, hale la'am ne mam daa pu niŋ si'el be'ede ti nidibin bee wada bane ka ti di'e ti yaanam sa'an laa, ba daa gban'e m Jerusalem ni n nok m n tis Room sogianam. 18Ka ba bu'os m bu'osa ka bood ye ba bas m, ban daa pu nye ka m tum tuumbe'ed si'a line nar ne ku'um la zug. 19Amaa Jew dim zan'as. Ka man pu tun'e niŋ si'ela ka sos noor sogia kpeenm sa'an ye o tis m suer ka m keŋ Room na'atita'ar koto ni, hale ka ka' ye m mor antu'a si'a ne m meŋ nidiba. 20Dinzug ka m buoli ya ye m nyee ya n pian' ne ya. Nid kan yela ka Israel dim mor ti'ir la zug ka ba lo m ne bana.” 21Ka ba yel o ye, “Ti pu di'e gbana Juuda teŋin ka li sob fu yelaa. Jew dim bane kenn kpela na la, ba so' pu tisi ti fu labaar bee pian'a fu tuumbe'ed yelaa. 22Amaa ti bood ye ti wum fu sa'an fun ten'es si'el pu'usum kan ka fu dol la. Ti mi' ye zin'ig wusa nidib pian'ad pu'usum la pian'abe'ed.” 23Ka ba zi'el dabisir ne Paul. Ka li daar paae la ka nidib bedego la'as Paul zin'igin na. Ka Paul tu'asidi bigisidi ba Wina'am na'am yela, yi beogin ti ma'ae zaam. Ka o kpe'eŋidi nyaŋe pa'ani ba Yesu yela Moses wada gbauŋin ne Wina'am nodi'esidib gbana ni. 24Ka o pian'ad la nyaŋe ke ka sieba siak ka sieba pu siake. 25Ka Paul naan pian'a pian'uk yinni ye, “Wina'am Siig Suŋ daa mor yelsida ka yel n tisi ya yaanam Wina'am nodi'es Azaya pian'ad poogin ye, 26‘Kem buudi bama nwa sa'an n yeli ba ye, “Ba na wum ka lem wum, amaa ka ku baŋ li gbin ne. Ba na gos ka lem gos, amaa ka ku nye si'ela.” 27Buudi bama nwa, zibisug lusi ba potenda, ka ba toba zian'as ne wum. Ka ba lusi ba nini. Ka ya'a ka' ala, ba naani nyeen ne ba nini, ka wumin ne ba toba, ka baŋin ne ba potenda, ka fendig m sa'an na ka m ti'ebini ba.’ ” 28“Dinzugo, baŋimi ne'eŋa ye Wina'am tum labaar line a faangir n tis bane ka' Jew dim la. Bama na kelis.” 29Ka nidib la ka' noor yinni ka widig. 30Ka Paul zin'in yir kan ka o yood li yela la ni yuma ayi, ka di'esid ban wusa kene o sa'an na, 31ka pa'ani ba Wina'am na'am yela ne Zugsob Yesu Kiristo yela, ka pian'ad ne sukpi'euŋ ka so' pu giŋid oo.

will be added

X\