TUUMA 27

1Ka ba gban'e ye ti kpen' aaruŋ keŋ teŋ kane yu'ure buon Itali la, ka nok Paul ne sarega nidib sieba n niŋ sogia kpeenm yinni one yu'ure buon Julius la nu'ugin, one a Ogestus sogianam kpeenm. 2Ka aaruŋ kane yi Adramitium teŋin na daa be anina ye li keŋ Asia ateuk gbeug teŋ sieba ni. Ka ti kpen' wa'ae. Ka Aristarkus one a Masedonia nid one yi Tesalonika na la, doli ti. 3Ka beog nie ka ti paae Sidon teŋin, ka Julius maal Paul su'uŋa bas o noor ka o keŋ o zuanam sa'an ka ba tis o diib. 4Ka ti kpen' aaruŋ anina. Ka pebisug tu'usidi ti. Ka ti kpi'e Saipuros teŋin ka dol zin'ig kane na lusi ti lebis pebisugin la, 5ka gaad ateuk la line kpi'e Silisia ne Pamfilia teensin n paae Mira teŋin line be Lisia so'olimin. 6Anina ka sogia kpeenm la nye Alekizandria teŋ aaruŋ ka li bood ye li keŋ Itali teŋin. Ka ti wusa kpen'. 7Ka li ka'a na'ana ka ti keŋ ku'omin la bi'el bi'el dabisa bi'ela n paae Nidus teŋin na. Ka pebisug pu ke ka ti nyaŋe keŋ tuone, ka luaki keŋ kpi'e Salmone teŋ kane be Krete so'olimin. Ka Krete teŋ lusi ti lebis pebisugin. 8Ka ti kene kpi'e ateuk gbeug. Ka li mu'e ka ti paae zin'i kane buon “Zin'isuŋ kan ka Aaruŋ Zi'e la.” Ka li kpi'e Lasea teŋin. 9Ka dabisa yuug ka li lieb yeli tisi ti ne tinam na keŋ ku'omin la n tugis, noor loob dabisir n gaad la zug. Ka Paul sa'ali ba ye 10“M baŋeya ka ti ku'omin ken la na niŋ yel be'ed tisi ti. La'ad la bedego na sa'am, la'am ne aaruŋ la meŋ ne nidib nyovuya.” 11Amaa ka sogia kpeenm la kelis aaruŋ la sob pian'ad, ka pu kelis Paul n yel si'el laa. 12Ka pebisug saŋa ka zin'ig la ka'a su'uŋa ka aaruŋ na zi'en. Lin zug ka nidib la sieba bedego yel ye, li a su'um ka ti keŋ, ka li ya'a a si'em ti na paae Foenik teŋin n zin'in teŋkan ni, teŋ kane be Krete so'olim n gosid tuon la. 13Ka pebisug yi dagobug na da'ad. Ka ba ten'es ye ba nye ba meŋ ka teeg aaruŋ la kunt line kpen' teŋin la n fue ne nwiig. Ka ti kene n kpi'e ateuk gbeug Krete teŋin. 14Ka li pu yuuge ka sisi'etita'ar yi Krete teŋin line buon nya'aŋ sisi'em 15n kena da'ae aaruŋ la bedego. Ka ba ku nyaŋe ke ka aaruŋ la kpa' sisi'em la ka bas li morem ka ke ka sisi'em la n mor aaruŋ la ken. 16Ka ti paae teŋbil zin'ig kan ka ku'om gilig ka li buon Kauda. Ka teŋ la lusi ti sisi'emin. Ka ti kpe'eŋi ti meŋ ka gban'e aaruŋbil la su'uŋa 17n du'os aaruŋ tita'ar zugin. Ka ba nok nwiis n lo kiŋkiŋ n vilig aaruŋ tita'ar la n tisi li paŋ, ka zo dabiem ye ti na paae zin'ig kan ka titanbi'isug be ka li buon Sirtis ka ku'om pu zulum la. Lin zug ka ba sigis aaruŋ la futita'ar ka ke ka sisi'em la zeedi li ken. 18Ka beog nie ka sisi'em la kpelim da'ad. Ka ba pin'ili yiisid la'ad bane be aaruŋin la n basid ku'omin. 19Ka beog lem nie ka ba meŋ yiis aaruŋ la meŋ la'ad la n bas ku'omin. 20Dabisa bedego ka saŋgbana ligil winig ne nwadibibis, ka sisi'em kpelim da'ad ne paŋ. Ka ti pu lem mor poten'er ne vum. 21Ka nidib la yuug ka pu di diibo. Ka Paul zi'eni ba soogin n yel ye, “Ya ya'a da siakini m noor ka da duon Krete teŋine, ti naani yiin yelbama nwa wusa ni. 22Amaa m sosidi ya ye ya kpe'eŋi ya sunya. Ka hale baa yinni ku kpii ti soogine. Asee aaruŋ la ma'aa na sa'am. 23Yu'uŋ ka Wina'am malek sa zi'e m sa'an, ye Wina'am one so'e man ka m pu'usid o la, 24yel m ye, ‘Paul, da zo dabiem. Sida fu na zi'en na'atita'ar Kaisa la tuon, fu saria kadib yela. Ka Wina'am na tis uf bane dol uf la wusa vum.’ 25Dinzugo, kpe'eŋimi ya sunya; ka man niŋ Wina'am yadda ye li sid na niŋ wuu malek la yel m si'em la. 26Amaa sisi'em na da'ae ti keŋ zin'ig kan ka ku'om gilig la n fir.” 27Li daa ane dabisa pii na anaasi yu'uŋ ka sisi'em da'adi ti ateukun ken. Ka ateuk la yu'ur buon Adria. Ka yu'uŋ sisoos ka nidib bane tum aaruŋ la tuuma ten'es ye ti tu'ae teŋ 28ka nok line makid ne li kal wusa n mak ku'om la nye ka ku'om la zuluŋ a maka kobuga ne piisi. Ka li niŋ bi'ela ka ba lem maki gos, ka li a piiswai. 29Ka ba zo dabiem ye aaruŋ la na tu'os tampiins, ka sigis aaruŋ la kunt line kpen' teŋin la anaasi ne nwiis aaruŋ la nya'aŋ ka pu'us ye beog nie. 30Ka nidib bane tum aaruŋ la tuuma la ma' ye ba sigis kunt ku'omin aaruŋ la tuon, ka sigis aaruŋbil la ku'omin kpe'eŋid ye ba yi aaruŋin la. 31Ka Paul yel sogia kpeenm ne sogianam la ye, “Nimbama nwa ya'a pu zin'in aaruŋin la, ti wusa ku nyaŋe tilige.” 32Ka sogianam la kensig nwiis bane lo aaruŋbil la ka kee li ka li keŋ. 33Ka beog bood nier, ka Paul belimi ba wusa ye ba dim diib ka yel ye, “Zina dabisa piina anaasi nwa ka ya bi'esid ku'um ne vum ka pu di si'ela. 34Dinzugo m belimi ya ne ye ya di diib ka nye paŋ; ka ya zuobug baa yinni ku bodige.” 35On yel ne'eŋa naae la, ka nok bodobodo n pu'us Wina'am bareka ba wusa tuon ka ko'og bodobodo la n di. 36Ka ba wusa kpe'eŋi ba meŋ sunya n di diib la ba meŋ. 37(Ti wusa daa ane nidib kobus yi ne piisyopoi ne ayuobu aaruŋ la poogin.) 38Ban dii siak la ka nok line kpelim la lob ku'omin, ye aaruŋ la fak. 39Ka beog nie ka bane tum aaruŋ la tuuma pu baŋ teŋ laa. Amaa ka ba nye zin'ig kane a kukun ka gban'e ye ba ya'a nyaŋ, ba na ke ka aaruŋ la kpa' anina. 40Ka ba lodig aaruŋ la kunt n bas ateukun ka lodig daad bane ket ka aaruŋ la keŋ ban bood zin'isi'a la, ka du'os fuug line be aaruŋ la tuon ye pebisug da'ae aaruŋ la n keŋ tuon. 41Ka aaruŋ la tu'os titanbi'isduur. Ka li tuon fir n gu'uŋ ken. Ka ku'opila nwe'edi li nya'aŋ, ka li sa'am. 42Ka sogianam la gban'e ye ba ku sarega nidib la wusa ka so' da nyaŋe sua' lub ku'om du gbeugo. 43Amaa ka sogia kpeenm la bood ye o yiis Paul kumin ka zan'as, ka tis noor ye bane mi' lub la iankim yi aaruŋin la yiiga n lubu du gbeug, 44ka bane kpelim la n doli gban'e daad ne aaruŋ la dakoolima n lubu du. Ala ka ti wusa daa tiligi du gbeug.

will be added

X\