TUUMA 26

1Ka Agrippa yel Paul ye, “Suer be ka fu yiis fu noor pian'ad.” Ka Paul uk o nu'ug, ka tu'a ye o yiis o meŋ, 2Ka yel ye, “Na'ab Agrippa, m ten'es ka li malis man ka m na tu'a yiis m meŋ fu tuon zina nwa lin wusa ka Jew dim ke ka ba gban'e m la ni. 3Fun sadigim mi' Jew dim malima ne ba gban'ar su'uŋa la zug, m sosid uf ye fu mor suguru ka kelisi m pian'ad la. 4“Jew dim wusa mi' man a si'em m biilimin sa, ka mi' m du'amin sa ye m bene m meŋ teŋin ne Jerusalem. 5Ba baŋiya ka li yuug. Ba ya'a bood, ba tun'e zi'eni di m kaset ye m ane Farisee dim nid yinni bane ti'a ba pu'usum la hale. 6Nannanna m zi'e saria kadib zin'igin kpela, mam mor ti'ir ne nozi'el kan ka Wina'am da yeli zi'eli ti yaanam la zug. 7Nozi'el kan ka ti buudi nidib pii na ayi bane pu'usid Wina'am nintaŋ ne yu'uŋ la mor ti'ir ye ba na nye li. Naa, li ane ti'ir kaŋa zug ka Jew dim ke ka ba gban'a m. 8Bo ka li toe tisi ya ye Wina'am na nyaŋe vu'ug ku'um? 9“Mam meŋ daa ten'es ye m niŋ si'el wusa line na sa'am Yesu one a Nazaret nid la yu'ur. 10Man tum ne'eŋa Jerusalem ni. Maalmaan kpeenmnam daa tis m paŋ ka m gban'e Wina'am nidib bedego kpen'es sarega ni. Ka bane ka ba daa kadi ba saria ye ba nar ne ku'um la, mam meŋ daa siaki ba kuub. 11Saŋa bedego ka m namisi ba la'asug doodin n kpe'eŋi fendigi ba ka ba basi ba pu'usum la. Ka m sunf daa pelig ne ba hale ka m keŋ teens bane ka' Jew dim so'olim ni, ye m namisi ba. 12“Li daa ane ne'eŋa zug ka m daa di'e noor maalmaan kpeenmnam sa'an n keŋ Damaskus teŋin. 13Naa, ka m be suer zug nintaŋ tisoos ka m nye neesim ka li nie gaad nintaŋ n yi saazug na n gilig m ne bane dol m la. 14Ka ti wusa lu teŋin ka m wum kukor ka li yel m ne Hibiru pian'ad ye, ‘Saul, Saul, bo ka fu namisid ma? Li na a toog n tis uf wenne naaf na ton' o daan balaar.’ 15“Ka m bu'os ye, ‘Naa, fu a ano'one?’ “Ka Zugsob la yel m ye, ‘M ane Yesu one ka fu namisid la. 16Amaa duom zi'en ka m nie m meŋi fu sa'an ka gaŋi uf ye fu lieb m tumtum. Fu na tu'as nidib fun nye si'el m sa'an zina ne m yela lin ka m na ti pa'al uf. 17M na suŋ uf ka fu yi Jew dim nu'usin ne bane ka' Jew dim buudi la nu'usin, bane sa'an ka m tum uf. 18M na lake ba potenda, ka fendigi ba n yiis likin n lebisi ba neesim ni, ka fendigi ba n yiis Sutaana nu'usin n lebisi ba Wina'am sa'an. M na ke ka ba niŋi m yadda ka Wina'am yiisi ba tuumbe'ed n bas, ka la'ase ba ne Wina'am nidib.’ 19“Na'ab Agrippa. M nye dau one yi arazana ni n nie si'el pa'al m la, ka m pu zan'as oo. 20Ka m pin'il Damaskus ne Jerusalem ne Juuda so'olim wusa ne buudi bane ka' Jew dim la sa'an n mool ye ba fendigim keŋ Wina'am sa'an, ka tum line pa'al ye ba tiakeya. 21Ne'eŋa zug ka Jew dim daa gban'a m Wina'am pu'usum yin n zig ye ba kuum. 22Lin paae zinkaŋa nwa Wina'am suŋi m, ala ka m zi'e kpela n tu'asid man nye si'el n tisidi ya wusa, kpi'emnam ne tadimnam. Man yel si'el wusa ane line ka Wina'am nodi'esidib ne Moses da yel ka li na niŋ la. 23Ye, asee ka Kiristo namis ka lieb one vu'ug kumin yiiga, ka mool labasuŋ n tis Jew dim ne bane ka' Jew dim buudi la.” 24Ka Paul n tu'ad ye o yiis o meŋ ne'eŋanam ni la, ka Festus tans Paul ye, “Fu geenm ne. Fune zamis zu'e hale la yela kpen'esid uf geenmis.” 25Ka Paul lebis ye, “Naa, m pu geenm. M pian'ade yelsida ne ya'am. 26“Na'ab Agrippa. M na nyaŋe pian'a tis uf ne sukpi'euŋ, fun mi' ne'eŋanam wusa la zug. M baŋ ye fu nye ne'eŋanam wusa line niŋ paalo ni. Li pu niŋ likin ne. 27Na'ab Agrippa, fu siak Wina'am nodi'esidib la yelaa? M mi' ye fu siakeya.” 28Ka Agrippa yel Paul ye, “Fu ten'es ye fu na ke ka m kilim Kiristo nid saŋa bi'ela nwaa?” 29Ka Paul yel ye, “Li ya'a yuug bee li pu yuuge, m pu'usid Wina'am ye fun ne bane wusa kelisidi man zina na kilim wuu man a si'em la. Amaa m pu bood ye ba loo ya ne bana wuu ban lo man si'em laa.” 30Ka gomena Festus ne na'ab la ne Benis ne nidib la wusa due 31yi ka yel taaba ye, “Dau kaŋa pu niŋ si'el ka li nar ye o kpi bee ba kpen'es o sarega nii.” 32Ka Agrippa yel Festus ye, “Dau kaŋa nwa ya'a pu yelin ye o bood ye o keŋ na'atita'ar la sa'ane, fu naani yiisin o.”

will be added

X\