TUUMA 25

1Ka Festus paae teŋ kane ka o so'e la ni ka zin'i anina daba atan', ka naam Sizerea teŋin n keŋ Jerusalem. 2Anina ka maalmaan kpeenmnam ne Jew dim tuongatib mor Paul na tis Festus, 3ka sos o ye o suŋi ba yiis Paul lebis Jerusalem, ka ba gban'e ye ba su'a n ku o sueren. 4Ka Festus lebis ye, “Paul be sarega ni Sizerea teŋin. Mam meŋ na leb anina daba ayi nwa. 5O ya'a tum tuumbe'ed si'a, yanam kel ka ya tuongatib n dol m keŋ Sizerea ka ba pian' o pian'ad.” 6Ka Festus zin'i ne ba ka li pu gaad dabisa piigaa, ka naan keŋ Sizerea teŋin. Ka beog nie ka o kpen' koto ni n zin'in, ka tis noor ye ba mor Paul na. 7Ka Paul n kpen' na la ka Jew dim bane yi Jerusalem du'e zi'en gilig o, ka pian'a ye o tum taal bedego, taal bane ka ba ku nyaŋe nie li gbin nyain ne. 8Ka Paul tu'a ye o yiis o meŋ ka yel ye, “M pu niŋ si'el ka li a be'ed Jew dim wada ni bee Wina'am pu'usum yir bee Room na'atita'ar sa'ane.” 9Ka Festus n bood ye o niŋ line na malis Jew dim la zug, o bu'os Paul ye, “Fu siak ye fu na keŋ Jerusalem ka m kad uf saria ne antu'a bama yelaa?” 10Amaa ka Paul lebis yel ye, “M be ne Room na'atita'ar meŋ koto ni; ka anina nar ne ban na kadi man saria. Fu meŋ mi' su'uŋa ye m pu tum be'ed n tis Jew dima. 11Ka m ya'a sa'amin wada ka niŋin si'el line ka m narin ne ku'um, m naani ku zan'asinee. Amaa m antu'a lin ka ba mor la ye ba pian' la ya'a ka'a sidaa, so' ku nyaŋe noki m n tisi baa. M bood ye ba kadi m saria Room na'atita'ar koto ni.” 12Ka Festus ne o suŋidib pian'a gban'e, ka o lebis Paul ye, “Fu yel ye, fu bood ye ba kad uf saria Room na'atita'ar koto ni. Dinzugo na'atita'ar la sa'an ka fu na keŋ.” 13Ka dabisa bi'ela gaad la ka na'ab Agrippa ne o taunn Benis kenn Sizerea na ye ba pu'us Festus. 14Ka ban be anina n yuug bi'ela la, ka Festus tienn na'ab Agrippa Paul antu'a yela ye, “Dau be kpela, ka Felik bas o ka o kpelim be sarega ni. 15Ka man keŋ Jerusalem la, ka Jew dim maalmaan kpeenmnam ne teŋ la kpeenmnam mor o antu'a kena tienn m, ka sos m ye, m koosim ye o tum tuumbe'ed. 16“Amaa ka m lebisi ba ye, li ka'a Room dim malima ye niŋkan ka ba ke ka ba gban'e o la ye ba niŋ o si'el la, asee on ne bane ke ka ba gban'e o la kpa'a taaba, ka o nye suer kan ka o na nyaŋe ki'is bane yel si'el zi'il o la. 17Bane ke ka ba gban'e dau la daa kenn kpela na la, m pu ke ka li yuuge, amaa beog nie la, ka m kpen' zin'in koto ni, ka tis noor ka ba mor o kpen' na, 18ka ten'es ye ba na yel ye o tum tuumbe'ed. Amaa bane due zi'en la ba pu nyaŋe yel on tum tuumbe'ed si'aa. 19Amaa ba nwa'as taaba ne o ba pu'usum suer yela ma'aa, ne dau so' one yu'ur buon Yesu, one kpi ka Paul yel ye o vu'ugiya la yela. 20Ka m pu nyaŋe gban'e man na niŋ si'em baŋ yel bama gbin ne, ka bu'os Paul ye o bood ye o keŋ Jerusalem ka m kad o saria aninaa? 21Ka Paul yel ye o bood ye o kpelim sarega ni, ka keŋ Room na'atita'ar koto ni ka o koosi o pian'ad la. Ka m naan tis noor ka ba mor o keŋ na'atita'ar la sa'an.” 22Ka na'ab Agrippa yel Festus ye, “M bood ye m meŋ wum dau kaŋa nwa pian'ad.” Ka Festus lebis ye, “Beog ya'a nie fu na wum o pian'ad.” 23Ka beog nie ka Agrippa ne Benis kena du'osid na'am bedego, ka kpen' pian'ad doogin ne sogia kpeenmnam ne teŋ la tuongatib. Ka Festus tis noor ye ba mor Paul na, 24ka yel ye, “Naa, na'ab Agrippa, ne bane wusa la'as na. Ya nye dau kaŋa, one ka Jew dim wusa yel o yela Jerusalem ni ne kpela, ka tansid ye o pu nar ye o kpelim voeya. 25Amaa mam pu nye on niŋ si'el ka li nar ne on na kpii. Ka o meŋ yel ye o bood ye ba ta'asi o pian'ad la na'atita'ar sa'an. Ka m gban'e ye m na ke ka o keŋ. 26Amaa m pu mor antu'a zug o yela na sob n tis na'atita'ar laa. Alazug ka m ke ka ba mor o ya sa'an na, fun na'ab Agrippa meŋ meŋ, ye ya ya'a bu'os o bu'osa naae, m na nye yel si'a o ni n sob. 27Ka m ten'es ka li ka' su'um tis m ka m zaŋ sarega nid n tis na'atita'ar ka pu pa'al su'uŋa ban gban'e o si'el yelaa.”

will be added

X\