TUUMA 24

1Ka daba anu daar ka maalmaan kpeenm Ananias kena ne kpeenmnam sieba ne kpeenm kane mi' antu'a, ka o yu'ur buon Tertullus. Ka ba zaŋ Paul antu'a tis gomena la. 2Ka ba buol Tertullus. Ka o pin'il tu'asid Paul yela ye, “Naa, na'asuŋ Felik. Fu ya'am suŋ la tisi ti yolisim, ka tiak bunbe'ed bedego ka li a teŋ la su'um. 3Ti siak ne'eŋa wusa zin'is wusa ka pu'usid uf su'uŋa. 4Na'aba, man pu bood ye m saans uf la, dinzug ka m sosid uf ye fu di suguru ka kelis m antu'a giŋ nwa, Paul yela. 5“Ti nye niŋkaŋa ka o ane nimbe'ug ne one bood yela. O tugul Jew dim nidib dunia wusa, ka ba zab. O ane bane dol Nazaret nid la tuongat. 6O zig ye o miligi ti Wina'am pu'usum yir. Ka ti gban'e o, 7ka gban'e gban'ar ye ti kad o saria ne tinam meŋ wada. Amaa ka sogia kpeenm Lisius kena ne paŋ n faaenn o ti sa'an, 8ka tis noor ye bane mor antu'a ne o la kemi fu sa'an na. Fu ya'a bu'os o, fu meŋ na wum o sa'an lin wusa ka ti pian' o yela.” 9Ka Jew dim me pa'as pian' o yela, ka yel ye, ne'eŋa wusa a sida. 10Ka gomena la tis Paul suer ye o pian'am. Ka Paul yel ye, “M mi' ye fu niŋ sariakat ne so'olim kaŋa nwa ni ka yuma lal. Alazug ka m siak ye m pian' yiis m meŋ. 11Li a na'ana ka fu na nyaŋe baŋ ye li pu gaad dabisa piinayi nwa ka m daa keŋ Jerusalem ye m pu'us Wina'am. 12Ka Jew dim la pu nye m ka m nwa'as ne so' Wina'am pu'usum yire. Ba me pu nye m ka m tugul nidib la'asug doodin bee teŋ la zin'isi'a nii. 13Ba me ku nyaŋe nie bigise m line ka ba yel ye m maaliyaa. 14Amaa m siak ne'eŋa ye m dolne suer kan ka ba ye li bee li gunni la, n pu'usid Wina'am on ka ti yaanam da pu'usid la. M siak lin wusa n sob Moses wada gbauŋin ne Wina'am nodi'esidib gbana ni. 15M mor ti'ir Wina'am ni wenne ban mor ti'ir si'em, ye nidib wusa, bane a su'um ne bane ka' su'um na vu'ug kumin la. 16Dinzug ka m kpe'eŋidi m meŋ saŋa wusa ye m poten'er nie Wina'am sa'an ne nidibin. 17“M daa yi Jerusalem ka yuma lal ka m mor ligidi leb ye m tis m meŋ nidib bane a tadimnam ka maal maana n tis Wina'am. 18M daa niŋid ne'eŋa ka ba nye m Wina'am pu'usum yin. Ka m naae pier maluŋ. Ka nidib bedego daa ka'a anina ka daauŋ me daa kae'. 19Amaa Jew dim sieba bane yi Asia so'olim daa be. Ba ya'a moren yela ne man, ba meŋ naani moren m antu'a keen fu sa'an. 20Nimbama ya'a nye m tuumbe'ed si'a saŋkan ka kpeenmnam la kat man saria la, ba yelim li nannanna. 21Asee yel yinni ma'aa yela ka m tans ba sa'an, line a ku'um vu'ugir yela, ka m zi'e ya tuon ka ya kat man saria la.” 22Ka Felik n mi' labasuŋ la suer su'uŋa la, o bas pian'ad la, ka yeli ba ye, “Sogia kpeenm Lisius ya'a paae na, m na gban'e ya pian'ad la.” 23Ka tis sogia kpeenm one gur Paul la noor ye o gosim o, amaa ka tis o yolisim bi'ela, ka ke ka o zuanam tis o, on bood si'el. 24Ka dabisa yuug bi'ela ka Felik ne o po'a Drusilla one a Jew nid kena. Ka o buol Paul ka ke ka o pian' Yesu Kiristo yadda niŋir yela. 25Ka Paul n pian'ad popielim ne meŋ luakir ne sariakadib line ken na yela la, ka dabiem gban'e Felik, ka o yel Paul ye, “Kem, ka m ya'a ti nye saŋa m na buol uf.” 26Ka lee mor ti'ir ye Paul na tis o ligidi dinzug ka tuom bi'ela ka o buol o, tuom bi'ela ka o buol o n sonsid ne o. 27Ka yuma ayi gaad ka Porsius Festus yu'un di'e Felik zin'ig. Ka Felik bood ye o maal line na malis Jew dim la zug, o ke ka Paul kpelim be sarega ni.

will be added

X\