TUUMA 23

1Ka Paul gosid kpeenmnam la kii ka yel ye, “M zuanama, man poten'er a nyain Wina'am sa'an m biilimin sa paae zina.” 2Ka maalmaan kpeenm Ananias tis noor ye bane zi'e kpi'e Paul la n nwe'em o noor. 3Ka Paul yel o ye, “Wina'am na nwe' uf. Fu wenne zaŋguom kudug kane ka ba taae. Ka yiŋ venl, ka poogin ka'a su'um. Fu zin'i kad man saria, wada la yela, amaa fu sa'am wada la, fun tis noor ye ba nwe' man la.” 4Ka bane zi'e kpi'e Paul la yel o ye, “Fu tu'udne Wina'am maalmaan kpeenm.” 5Ka o lebis ye, “M ba'abiise, m zi' ye o a Wina'am maalmaan kpeenm. Bozugo Wina'am gbauŋin li sob ye, ‘Da pian' pian'abe'ed n tis kpeenm kane guri fu buudi.’ ” 6Ka Paul n baŋ ye sieba a Sadusii dim, ka sieba a Farisee dim la, ka yel kpeenmnam la'asugin la ye, “M ba'abiise, mam ne m yaanam ane Farisee dim. Man mor ti'ir ye bane kpi la na lem vu'ug la zug ka m be yela nwa ni la.” 7On yel ne'eŋa la ka Farisee dim ne Sadusii dim pin'il nwa'asid ne taaba, ka nidib la welig. 8Sadusii dim la pu siak ku'um vu'ugir ne maleknam ne siis yelaa, amaa Farisee dim siaki li wusa. 9Ka tukpeedug due Paul yela. Ka gbauŋmi'idib sieba bane a Farisee dim due nwa'as ne paŋ ye, “Ti pu nye dau kaŋa nwa tuumbe'ede. Daasi'ere li ane siig bee malek n pian' tis o.” 10Ka noŋgban nwa'ar la kena galis. Ka sogia kpeenm la zo dabiem ye ba na aans Paul zora zora, ka tis sogianam noor ye ba kem n faaenn o nidib la sa'an n mor o kpen' sogianam yin. 11Ka yu'uŋ kan ka Zugsob la kenn Paul sa'an na yel o ye, “Kpe'eŋimi fu sunf; ka li nar ka fu tu'as m yela Room teŋin, wuu fun tu'as m yela Jerusalem ni kpela si'em la.” 12Ka beog nie ka Jew dim sieba la'as taaba n po noor ye ba ku di diib bee nu ku'om asee ban na ti ku Paul. 13Bane daa la'as n gban'e ne'eŋa la daa gaad nidib piisnaasi. 14Ka ba keŋ maalmaan kpeenmnam ne kpeenmnam sa'an yel ye, “Ti la'ase po noor ye ti ku di si'ela asee tinam na ti ku Paul. 15Dinzug fun ne kpeenmnam la'asem ka tum sogia kpeenm la sa'an ye o mor Paul n kenn ya sa'an na, ka niŋ wenne ya bood ye ya wum o yela su'uŋa; ka tinam ti'eb ye ti ku o hale ka o nam pu paae naa.” 16Ka Paul taunn biig baŋ ban gban'e si'em ka keŋ sogianam yin la n yel Paul. 17Ka Paul buol sogia kpeenmnam la yinni yel o ye, “Dasaŋ kaŋa mor si'el ye o yeli ya kpeenm la. Dinzugo dol o keŋ.” 18Ka sogia kpeenm la mor biig la keŋi ba kpeenm la sa'an n yel ye, “Paul, one a sarega nid la, buole m ye m mor dasaŋ kaŋa keenn fu sa'an na; ka o mor si'el ye o yel uf.” 19Ka kpeenm la gban'e o nu'ug mor o yi kpukpeŋ n bu'os o ye, “Fu mor bo ye fu yeli ma?” 20Ka o lebis ye, “Jew dim gban'eya ye beog ba na sos uf ye fu mor Paul n keenn ba kpeenmnam la'asugin la na. Ka niŋ wenne ba bood ye ba wum o yela su'uŋa. 21Amaa da siake; ka ba nidib gaad piisnaasi su'a gur Paul. Ba wusa po noor ye ba ku di diib bee nu ku'om, asee ban na ti ku Paul. Ba ti'eb ne gur fun na lebis si'em.” 22Ka kpeenm la yel dasaŋ la ye, “Da yel so' ye fu yele m si'ela.” Ka o ke ka o keŋ. 23Ka o buol o sogia kpeenmnama ayi n yeli ba ye, “La'asem sogianam kobus yi, ne wedban'adib piisyopoi ne kpantoondib kobus yi, ka ba ti'eb yu'uŋ kaŋa karefa awai n keŋ Sizerea. 24Ka tis Paul widi ka o ban', ka mor o baanlim keŋ gomena Felik sa'an.” 25Ka o sob gbauŋ n yel ye: 26Naa, gomena suŋ Felik. Man Klaudius Lisias sob gbauŋ kaŋa n tis fun. M pu'usid uf. 27Jew dim daa gban'e dau kaŋa nwa ka bood ye ba ku o. Ka mam wum ye o ane Room nid, ka keŋ ne sogianam n faaenn o, 28ka bood ye m baŋ lin yela ka ba tu'adi o yela be'ed, ka mor o keŋ ba kpeenmnam la'asugin. 29M daa nye ka o yela ane Jew dim wada nwa'asug la zug, ka o pu niŋ si'el ka li nar ku'um bee ba yo o sarega nii. 30Ka ban yeli m ye Jew dim gban'e yelbe'ed o yela la, dinzug ka m tum o to'oto fu sa'an, ka tis noor ye bane zi'e o yela la kemi fu sa'an na n yiis ba noor pian'ad. 31Ka sogianam la niŋ on yeli ba si'em la, ka mor Paul yu'uŋ kan n paae Antipatris teŋin. 32Ka beog nie ka sogianam bane ken ne noba la leb Jerusalem na ka wedban'adib la dol Paul n keŋ. 33Ka ba mor o n paae Sizerea teŋin n nok gbauŋ la n tis gomena ka nok Paul n tis o. 34Ka o karem gbauŋ la ka bu'os on yi so'olim si'a na. On baŋ ye o yi ne Silisia so'olimin la, 35o yel o ye, “Bane more fu antu'a la ya'a paae na m na kelis fu antu'a.” Ka o tis noor ye ba kpen'es o na'ab Herod yin ka ba gur o.

will be added

X\