TUUMA 22

1“M saamnam ne m zuanama, kelisimi ka m yiisi m meŋi ya tuon.” 2Ban wum ka o pian'ade tisidi ba ne Hibiru pian'ad la ka ba sin baanlim, ka o ye, 3“Mam ane Jew nid ka ba du'a m Tarsus line be Silisia teŋgbauŋin. Amaa ba ugus man ne teŋ kaŋa. Ka Gamaliel zamisi m ka m za'aŋi ti yaanam wada la su'uŋa. M ti'a Wina'am su'uŋa wenne yanam niŋid si'em zina nwa. 4M da namis bane dol suekaŋa hale ye ba kpi, ka gban'e dap ne po'ab n kpen'esi ba sarega ni. 5Wina'am maalmaan kpeenm ne kpeenmnam wusa na nyaŋe di man kaset ye m pian'ad sida. M da di'e gbana ba sa'an n tis Jew dim bane be Damaskus, ka wa'ae anina ye m gban'e suekaŋa nya'andolib bane be anina n ba' ba ne bana n more ba leb Jerusalem na n namisi ba.” 6“Man da wa'ae ka tua'e Damaskus na nintaŋ sisoos la, ka neesimtita'ar yi saazug na nie nyain n gilig m. 7Ka m lu teŋin ka wum ka kukor buol m ye, ‘Saul, Saul, bo ka fu namisidi ma?’ 8“Ka m lebis ye, ‘Naa, fu a ano'one?’ “Ka o lebis ye, ‘M ane Yesu, one a Nazaret nid, on ka fu namisid la.’ 9Ka nimbane daa be m sa'an la nye neesim la, amaa ka pu gban'e kukor kane pian'ad la gbine. 10“Ka m bu'os ye, ‘Zugsoba, m na niŋ wala?’ “Ka Zugsob la yel m ye, ‘Duom, n keŋ kpen' Damaskus. Ka anina ba na yel uf lin wusa ka Wina'am zi'el tis uf ye fu niŋ.’ 11Ka m pu nyeta, neesim la zug. Ka bane dol m la ve' m. Ka ti keŋ kpen' Damaskus. 12“Dau daa be anina, ka o yu'ur buon Ananias, ka siaki ti wada la. Ka Jew dim bane be Damaskus wusa pian'ade o yela su'uŋa. 13Ka o kenn m sa'an na zi'eni kpi'en m, ka yel ye, ‘M ba'abiig Saul, lakim.’ Ka m nini lak saŋkan la yim ka m nyet. 14“Ka o yeli m ye, ‘Wina'am one ka ti yaanam da pu'usid la gaŋ uf ye fu baŋ o boodim ka nye one a popielim sob, ka wum ka o pian' ne o meŋ kukor. 15Fu na yel nidib wusa fun nye ka wum si'el la. 16Fu gur bo? Duom ka di'e ku'om suub, ka buol Yesu yu'ur ka o pie fu tuumbe'ed bas, fu ku'om suub di'er nwa yela.’ 17- 18“M da leb Jerusalem ka daa pu'usid Wina'am pu'usum yin. Ka Zugsob la nie o meŋi m sa'an na wenne zaansuŋ ne, yel m ye, ‘Niŋim to'oto ka yi Jerusalem; ka nidib bane be kpela nwa ku siak fun na yeli ba m yela si'em laa.’ 19“Ka m lebis ye, ‘M Zugsoba, nimbama mi' su'uŋa ye m daa keŋ la'asug doodin wusa n gban'ad bane niŋ uf yadda la, n bu'u ba ka kpen'esi ba sarega ni. 20Ka saŋkan ka ba daa ku Sitivin one tu'as nidib fu yela la, m daa be anina n ten'esid ye ba niŋ su'um, ka gur bane ku o la fuud.’ 21“Ka Zugsob yel m ye, ‘Kem, ka m na tum uf bane ka' Jew dim n be lalle sa la sa'an.’ ” 22Ka nidib la kelis Paul hale ka o pian' ne'eŋa. Ka ba pin'il tansid ye, “Kuumi no ka o pu nar ye o be dunia nii.” 23Ka ba tansid ka more ba fuudi yuulum agola ka gben'esid titan n yaarid agol. 24Ka sogia kpeenm tis sogianam noor ye ba nokim Paul n kpen'es o ba yin, ka yeli ba ye ba fi'ebim o ka bu'os baŋ lin yela ka ba tansid o yela la. 25Amaa ban lo o ye ba fi'eb o la, ka o bu'os sogia kpeenm one zi'e anina la ye, “Suer be ya wada ni ye ya fi'eb Room teŋ nid, ka ba nam pu kad o saria?” 26Ka sogia kpeenm la n wum ala la, ka o keŋ one so'e ba wusa la sa'an n bu'os o ye, “Fu ye fu maal bo? Dau nwa ane Room teŋ nid.” 27Ka sogianam la kpeenm keŋ Paul sa'an n bu'os o ye, “Fu ane Room teŋ nida?” Ka o lebis ye, “Eenn.” 28Ka sogia kpeenm la yel ye, “M meŋ yo ligidi bedego ka lieb Room teŋ nid.” Ka Paul ye, “Ba du'a man ne Room nid.” 29Ka bane pa'a ye ba fi'eb o la leb nya'aŋ to'oto. Ka sogianam kpeenm la zo dabiem, on baŋ ye Paul ane Room teŋ nid ka o lo o la zug. 30Ka beog nie ka o bood ye o baŋ li sida lin zug ka Jew dim zi'e o yela, ka o yidig Paul, ka tis noor ye Wina'am maalmaan kpeenmnam ne kpeenmnam wusa la'asem. Ka ba la'as. Ka o mor o keŋ zi'el ba tuon.

will be added

X\