1 Ka ti keesi ba ka kpen' aaruŋ n kpa'a titu'aa keŋ paae Kos teŋin. Ka beog nie ka ti paae Rodes teŋin, ka naami anina keŋ Patara teŋin. 2 Ka anina ka ti nye aaruŋ ka li wa'ae Fonisia teŋin. Ka ti kpen' keŋ. 3 Ka ti paae zin'isi'a na ka gosi nye Saipuros teŋ tuon sa ka bas teŋ la dagobug ka luak gaad Siriya so'olim n sig Taya teŋin, zin'ikan ka ba ye ba sigis aaruŋ la la'ad la. 4 Ka ti ie nye yadda niŋidib anina ka zin'in ne ba daba ayopoi. Ka ba yel Paul ne Siig Suŋ la paŋ ye o da keŋ Jerusalem. 5 Ka ti dabisiri daa paae la ka ti keesi ba ka wa'ae. Ka ban ne ba po'ab ne ba biis wusa bieli ti yi teŋ la kpukpeŋ. Ka ti wusa igin teŋin ateuk noorin n pu'us Wina'am ka kees taaba. 6 Ka tinam kpen' aaruŋin. Ka ban me lebidi kun. 7 Ka ti yi Taya teŋin n keŋ Tolemais teŋin n pu'us yadda niŋidib bane be anina, ka gbenn ba sa'an daar yinni. 8 Ka beog nie ka ti yi anina keŋ Sizerea teŋin n kpen' Filip yin n zin'ini anina. O daa ane one moon Wina'am labaar, ka a kpeenmnam ayopoi la ni yinni, ban ka ba daa gaŋ Jerusalem ni ye ba tot diib la. 9 O daa mor po'ayuos anaasi ka ba a yiwies ka me a Wina'am nodi'esidib. 10 Ka tiname daa be anina dabisa bi'ela la ka Wina'am nodi'es on yu'ur buon Agabus, yi Juuda paae na 11 ka kenn ti sa'an na n fue Paul sialoodiŋ n lo o meŋ noba ne o nu'us ka yel ye, awana ka Wina'am Siig Suŋ la yel, ye, “Sialoodiŋ kaŋa nwa daan, Jew dim na lo o awana Jerusalem teŋin n nok o niŋ bane ka' Jew dim la nu'usin.” 12 Ka tiname wum ne'e la ka tinam ne nimbane be anina la belim Paul ye o da keŋ Jerusalem. 13 Amaa ka o lebis ye, “Bo ka ya kaasid n sa'amidi m sunfo? M pu ti'eb ye ba lo m Jerusalem ni ma'anee, amaa m la'am na kpi ti Zugsob Yesu yu'ur zug.” 14 Ka ti pu nyaŋ o ka o siaki tisi tii. Ka ti bas o ka yel ye, “Zugsob boodim niŋim.” 15 Ka ti daa be anina dabisa bi'ela ka nyaan ti'eb keŋ Jerusalem. 16 Ka Sizerea teŋ nya'andolib sieba bieli ti more ti keŋ Mason yin, zin'ikan ka ti na zin'in. Mason daa ane Saipuros nid one daa a nya'andol pin'ilugin sa. 17 Ka ti paae Jerusalem na ka yadda niŋidib di'e ti ne sumalisim. 18 Ka beog nie ka Paul doli ti keŋ Jemes sa'an. Ka yadda niŋidib kpeenmnam wusa be. 19 Ka Paul pu'usi ba ka tu'asi ba Wina'am n maal si'el wusa bane ka' Jew dim ni o tuuma poogin. 20 Ka ban wum la ka du'os Wina'am yu'ur su'uŋa ka yel Paul ye, “Ti ba'abiiga, gosim lin a si'em. Jew dim tusa bedego niŋ Yesu yadda, ka mor wada kan ka Wina'am tis Moses la su'uŋa. 21 Ti wum ye fu pa'al Jew dim wusa bane zin'in bane ka' Jew dim teensin ye ba basim Moses wada, ka da kpen'es ba biis baŋo bee dol Jew dim malimaa. 22 Ba sid na wum ye fu kena. Bo ka ti na niŋe? 23 Niŋim tinam na yel uf si'em la. Nidib anaasi be ti sa'an kpela n po ye ba na maal si'el n tis Wina'am. 24 Doli ba la'ase pies fu meŋ ba maluŋ la zug, ka yoo ba sama, ka ba nyaŋe pun ba zuobid. Ne'eŋa na ke ka so' wusa baŋ ye lin ka ba pian' fu yela wusa ka' sidaa, ka fu dol Moses wada la. 25 Amaa bane ka' Jew dim ka niŋ yadda la, tinam daa sob gbauŋ n yeli ba ye, ‘Ba da di ba'ar diib ne ni'im kane mor ziim. Ka da onb bunkonbug kane ka ba sianki kuu. Ka dap ne po'ab da sa'am taabaa.’ ” 26 Ka beog nie ka Paul nok nidib la ka ba pie ba maluŋ dian'ad ka keŋ Wina'am pu'usum yin n kpen' zi'el dabis kan ka ba na pie naae ka ba so' wusa maali o maan n tis Wina'am. 27 Ka li kpelim bi'ela ka daba ayopoi la naae ka Jew dim bane yi Asia so'olim na nye Paul Wina'am pu'usum yin, ka ba ke ka nidib la sunya pelig ne Paul ka gban' o, 28 ka tans ye, “Israel dima, suŋimi ti. Dau kaŋa nwa giligid teens wusa n pa'an nidib ye ba da dol Israel dim ne Moses wada ne Wina'am pu'usum yir maluŋ laa. Hale o mor bane ka' Jew dim la n kpen' Wina'am pu'usum yin la na n miligi li.” 29 Ban daa nye Trofimus one yi Efesus na n dol Paul teŋin la zug, ka ten'es ye o dol o ne kpen' Wina'am pu'usum yin. 30 Ka teŋ la daa dam ka nidib wusa zo la'as taaba gban'e Paul n teeg o yiis pu'usum yin la. Ka yo za'anoya to'oto. 31 Ka ba bood ye ba ku Paul. Ka labaar paae Room sogia kpeenm sa'an na ye Jerusalem teŋ dim wusa dam ne. 32 Ka o due to'oto dol sogianam ne ba kpeenmnam ka ba zo keŋ nidibin la. Ka ban nye sogia kpeenm ne sogianam la ka bas Paul bu'ub. 33 Ka sogia kpeenm la keŋ gban'e Paul ka tis sogianam noor ye ba loom o ne bana ayi. Ka bu'os on a so' ne on niŋ si'el. 34 Ka sieba nidibin la lebis n tansid kon'ob kon'ob ka tukpeedug zu'e. Ka o ku nyaŋe wum line maale, ka tis sogianam noor ye ba nokim o du n kpen' ba yitita'arin la. 35 Ka ba mor o paae bane dut si'el kpen'ed doogin la ka sogianam la ze o, nidib bugusum la zug. 36 Ka ba wusa kenna n tansid ye, “Kuumi ne o.” 37 Ka ban ye ba kpen'es Paul sogianam yin la, ka o yel sogia kpeenm la ye, “M mor si'el ye m yel.” Ka kpeenm la bu'os o ye, “Fu wum Greek dim pian'ade? 38 Ala fu ka' Egipiti nid one daa zigid ye o kad gomena ka daa dol niŋkuudib tusa anaasi n keŋ moogin laa?” 39 Ka Paul lebis ye, “M ane Jew nid n yi Tarsus teŋin Silisia teŋgbauŋin na. M ane teŋtita'ar nid. M sos uf ye fu ke ka m pian' tis nidib la.” 40 Ka kpeenm la bas o noor. Ka Paul zi'e bane dut si'el kpen'ed doogin la zug, ka uk o nu'ug. Ka nidib la sin. Ka o pian' tisi ba ne Hibiru pian'ad ye:
