TUUMA 20

1Tukpeedug la nya'aŋ ka Paul buol yadda niŋidib la la'as n kpe'emise ba ka keesi ba ka yi keŋ Masedonia. 2Ka kpemisid yadda niŋidib bane be teŋ bane wusa ka o daa doli gaad la, ka nan paae Akaia teŋin na 3zin'in anina nwadisa atan', ka ti'eb ye o kpen' aaruŋ n keŋ Siriya teŋin, ka wum ye Jew dim gban'e poten'ebe'ede o yela. Ka linzug ka o ten'esi gban'e ye o lebi yi Masedonia. 4Ka Pirus biig Sopata one yi Berea teŋin na la, daa dol o la'am ne Tesalonika nidiba ayi, Aristarkus ne Sekundus, ne Derbe teŋ nid ka o yu'ur buon Gaius, ne Tikikus ne Trofimus, babayi bane yi Asia teŋin na la, ne Timoti. 5Ka ba gaad tuon n guri ti Troas teŋin. 6Ka bodobodo kane ka' dabin maluŋ la'asug dabisa nya'aŋ la, ka ti kpen' aaruŋ n naam Filipi teŋin, ka daba anu daar ka ti paae bane be Troas teŋin la ka zin'in anina daba ayopoi. 7Ka Alasidaar yu'uŋ yinni ka ti la'as ye ti di Zugsob diib. Ka Paul daa bood ye o due beog kane nied la, ka pian'a tis nidib la ka yu'uŋ kena sodig. 8Ka fitla bedego daa be girimbiisa dokan ni ka ti la'as la. 9Ka dasaŋ so' on yu'ur daa buon Yutikus daa zin'i doog la takoro zug. Ka Paul kpelim pian'ad la ka gbe'um gban' o, ka o gbisi naam agol doogin la n lu teŋin na. Ka ba uk o due ka o pun kpi sa. 10Ka Paul sig teŋin keŋ to'oto bibug o ka ye, “Da ke ka li paki ya; ka o kpen vu'usid.” 11Ka o lebi du gben'es bodobodo di, ka sons ne ba yuug. Ka beog nie ka o basi ba ka keŋ. 12Ka ba dol dasaŋ la kul. Ka o voe. Ka li niŋi ba sumalisim bedego. 13Ka ti kpen' aaruŋ deŋ Paul tuon n keŋ Assos teŋin, on ye o keŋ ne noba la zug. 14On tu'osi ti Assos teŋin la o la'am kpen' aaruŋ la ne ti keŋ Mitilene teŋin. 15Ka beog nie ka ti yi Mitilene teŋin keŋ Kios teŋ baba. Ka beog nie ya'as ka ti paae Samos teŋin na. Ka li yimbeogun ya'as ka ti paae Miletus teŋin, 16Paul daa bood ye o be Jerusalem ka Pentekost daar naan paae la, o daa luak Efesus teŋin, on pu bood ye o yuug Asia so'olim ni la zug. 17Ka Paul naam Miletus ni tolim Efesus teŋin ye yadda niŋidib kpeenmnam la tu'os o na. 18Ka ban paae o sa'an na la, ka o yeli ba ye, “Ya mi' man daa tum si'em, man daa be ya sa'an saŋa wusa, lin yi daar kan ka m paae Asia so'olim ni la. 19M sigisi m meŋ tum Wina'am tuuma ne ninto'om, hale la'am ne mane nye makir bedego Jew dim sa'an la. 20M kpe'eŋi m meŋ n mool yela wusa line na suŋi ya ka pa'ali ya paalo ni ne ya yaan, 21ka pian' ne nimmua n tis Jew dim ne bane ka' Jew dim ye ba fendigim dol Wina'am ka niŋ Zugsob Yesu yadda. 22“Ka nannanna m siak Wina'am Siig Suŋ noor ye m wa'ane Jerusalem ka zi' line na niŋ m aninaa. 23M mi' ye teŋ kane ka m ken la wusa, Siig Suŋ la pa'ani m ye ba na lo m ka namisi m ka kpen'esi m sarega ni. 24Amaa m zaŋ m meŋ nyovur ka li ka' si'eli tisi ma, man naae m tuuma ban ka Zugsob Yesu tisi m ye m mool Wina'am popielim labasuŋ la. 25“M mi' ye baa ya yinni ku lem nye m ya'ase, yanam bane ka m mool Wina'am na'am yela ya sa'an la. 26Dinzug ka m yeti ya zinkaŋa ye ya yinni ya'a bodig m ba'a lem kae' o ni la. 27Mam mooli tisi ya Wina'am yela wusa ka pu sua' si'ela. 28Gu'usimi ya meŋ ka gur nimbane wusa ka Wina'am Siig Suŋ la gu'uli ya la. Guri Wina'am nidib ban ka o da' ne o Biig la ziim la. 29M mi' ye m ya'a basi ya, nimbe'ednam na kenn ya sa'an na n gban'e ya wuu zaŋkua'ar yiti gban'ad konbid si'em la. 30Ka saŋa na kena ka ninsieba ya soogin na ma' dama'am pi'e yadda niŋidib la keŋ ba sa'an. 31Dinzugo gu'usimi ya meŋ ka tenr ye yuma atan' nwa ka m sa'ane ya nintaŋ ne yu'uŋ wusa ne ninto'om ka pu base. 32“Ka nannanna m zaŋi ya niŋ Wina'am nu'usin ne o popielim pian'ad la yela line na paas ya yadda niŋir ka ke ka ya la'as ne Wina'am ninsoma n di'e yelsum. 33M daa pu mor ya'amleog ne so' anzurifa bee salima bee fuude. 34M tum ne m meŋ nu'us n diisidi m meŋ ne m dolim taas la. 35M pa'ali ya si'el mekama wusa ni ye, asee ka ya suŋ tadimnam ne ba tuuma poogin wenne man daa niŋ si'em la, ka tenr pian'ad lin ka ti Zugsob Yesu daa yel la ye, ‘Sumalisim bedego bene one tisid n gat one di'ed.’ ” 36Ka Paul n pian' naae la ka igin teŋin ne ba wusa pu'us. 37Ka ba wusa kaasi bibug Paul ka kees o. 38Ba sunya daa sa'am hale on yel ye, ba ku lem nye o la. Ka ba biel o keŋ aaruŋin la.

will be added

X\