TUUMA 2

1Ka Pentekost daar n paae la, ka ba wusa daa be zin'ig yinni. 2Ka to'oto yim ka vuud yi arazana ni na n wenne sisi'em tita'ar ne, n pe'el doog kan ka ba be la. 3Ka ba nye si'el lin wenne bugum zilima ne, n pudug n zoon ba wusa yinni yinni zutin. 4Ka Wina'am Siig Suŋ daa pe'eli ba wusa, ka ba pin'il n pian'ad ne teŋzuŋ pian'ad wuu Siig Suŋ la n tisi ba si'em la. 5Ka Jew dim sieba ban yi dunia so'olim wusa na, daa be Jerusalem ni. Ba daa ane bane dol Wina'am suer su'uŋa. 6Ka nidib bedego n wum vuud la, ka ba la'as taaba, ka li lidigi ba bedego, bozugo so' wusa wum ban pian'ad o meŋ buudi pian'ad. 7Ka ba lidig n bu'osid taaba ye, “Gosima, nidib bane pian'ad nwa wusa ka'ane Galilee dim bee? 8Ka li niŋ wala ka ti wusa yinni yinni wum ka ba pian'ad tinam buudi pian'ade? 9Ti yi ne Partia ne Media ne Elam ne Mesopotamia ne Juuda ne Kapadosia ne Pontus ne Asia, 10ne Frigia ne Pamfilia ne Egipiti ne Libiya lin kpi'e Sairene ne saam ban yi Room teŋin la, Jew dim ne sieba bane ka' Jew dim buudi, ka lee doli ba malima, 11ne Krete dim ne Arabia dim. Ka li niŋ wala ka tinam wum ka ba pian'ad ti buudi pian'ad n yet tuumtitada ban ka Wina'am tum la?” 12Ka ba lidig n bu'osid taaba ye, “Yel kaŋa nwa gbin lee a bo?” 13Amaa ka sieba po'ogi ba, ka yet ye, “Nimbama nwa nune daam n kool.” 14Ka Piita due zi'en ne Tumtumnib piina yinni la, n yeli ba ne kukotita'ar ye, “Juuda dim, ne bane be Jerusalem nwa ni, ya wusa baŋim yelkaŋa, ka kelis man ye m tu'asi ya yel si'a la. 15Li nan ane beogin, dinzugo nidib nwa ku nu daam n kool wenne yanam ten'esid si'em laa. 16Amaa ne'eŋa ane bun lin ka Wina'am nodi'es Joel da pun sob li yela la ye, 17Wina'am yel ye, ‘Dunia naar ya'a ti li'el, m na bu'e m Siig Suŋ la n niŋ ninsaalib buudi wusa zut. Ka ba biribis ne ba bipumis na di'e Wina'am pian'ad n tis nidib. Ka ba dasam na nye Wina'am yela wuu zaansuŋ ne. Ka ba niŋkuda me na zaansim. 18Ka saŋkan la m na bu'e m Siig Suŋ la niŋ m tumtum dap ne m tumtum po'ab zutin. Ka ba na di'e m pian'ad n tis nidib. 19M na maal bunnyalima agol ka maal zanbina dunia zug. Ziim ne bugum ne walim ne nyo'os na ti be. 20Nintaŋ na ti lieb lik, ka nwadig mu'e wenne ziim ne, ka Zugsob lebig daar la nyaan paae. 21Ka lin saŋa la, on wusa buol Zugsob yu'ur, o na nye faangir.’ 22“Israel dim wusa, wumi pian'akaŋa nwa. Wina'am daa tum tuumnyalima ne bunnyalima ne zanbina Yesu sa'an, one a Nazaret dau la, ka pa'ali ba ye one tum o ba sa'an. Ya pun mi' ne'eŋa, bozugo li daa maali ya sa'an. 23Wina'am pun mi' si'el wusa. O boodim la zug, ka o zaŋ Yesu niŋ ba nu'usin ka ba ke ka nimbe'ednam gban'e o n kpa' o tabil dapuudir zug n ku. 24Ka Wina'am sa'am ku'um paŋ ka vu'ug o kumin, ku'um ku tun'e mor o la zug. 25David da pun tu'as o yela sa ye, ‘M nyet Zugsob la m tuon daar wusa. On bee ne man la zug, so' ku nyaŋe niŋi m si'el la. 26Dinzugo m mor sumalisim, ka pian'ad sumalisim pian'ad. Ala men, m mor ti'ir, man na kpi, 27ka Wina'am ku basi m siig kpi'im teŋ la zug. O ku ke ka mam one a o Ninsuŋ la pun'e. 28On ke ka m baŋ o nyovur suer la zug, ka m mor sumalisim bedego o tuon.’ 29“M zuanama, keli ka m ansig n tu'asi ya, ti yaab na'ab David yela. O da kpine ka ba pin' o yaugin. Ka o yaug be ti sa'an kpela hale n paae zina. 30David da ane Wina'am nodi'es ka baŋ ye Wina'am po ne zi'el ye o na ke ka nid yinni yi o yaas la sisoog n zin'in o na'am gbauŋ la zug. 31Dinzugo David da pun deŋi nye Wina'am da ye o tum si'em la. Ka tu'as Kiristo ku'um vu'ugir yela ye, ‘Wina'am ku bas o kpi'im teŋ, bee ke ka o niŋgbiŋ pun'e.’ 32Yesu la nwa, one ka Wina'am vu'ug o kumin la. Ka ti wusa nye li, ka tu'asi ya li yela. 33Dinzug ka Wina'am du'os o n zi'el o datiuŋ, ka o di'e Siig Suŋ, line ka o pun yel zi'el la. Yanam wum ka nyet si'el nannanna la, a piini line ka o tisi ti. 34David meŋ da pu du arazana ni. Amaa o meŋ da yel ye, ‘Zugsob la yel m Zugsob ye, “Zin'inim m datiuŋ, 35n gur saŋa kan ka m na ke ka fu bi'emnam lieb fu noba kuk.” ’ 36“Dinzug, keli ka Israel dim buudi wusa baŋ yelmeŋir ye Yesu kan ka ba daa kpa' tabil dapuudir zug n ku la, on la ka Wina'am pa'ali ya ka o a Zugsob ne Kiristo.” 37Nidib la n wum pian'ad nwa la, ka li kpen' ba sunya ni hale, ka ba bu'os Piita ne Tumtumnib la ye, “Ti ba'abiise, ti na niŋ wala?” 38Ka Piita lebisi ba ye, “Tiakimi ya sunya, ka ya wusa yinni yinni di'e Wina'am ku'om suub ne Yesu Kiristo yu'ur, ka Wina'am na yiisi ya tuumbe'ed n bas. Ka ya na di'e Wina'am piini line a o Siig Suŋ. 39Noor zi'elug la ane ya din ne ya biis din ne bane be lalle, hale ne nidib bedego ban ka Zugsob la na ti buoli ba o sa'an la.” 40O daa pian' pian'ad sieba bedego n sa'ali ba ne nimmua n yeli ba ye, “Yiisim ya meŋ ne zumaaŋ kaŋa nimbe'ednam la sa'an.” 41Ka bane daa siak Piita pian'ad la daa di'e ku'om suub. Ka daar kan la, nidib bane daa pa'as ba ni la wenne tusa atan'. 42Ka ba daa kpelim zi'e kiŋkiŋ ne Tumtumnib la pa'alug. Ka mor noor yinni ka la'asedi dit diib ne taaba ka sosid Wina'am. 43Ka dabiem daa kpen' nidib la wusa, ka Wina'am ke ka Tumtumnib la tum tuumnyalima ne zanbina bedego. 44Ka nidib ban daa niŋ yadda la wusa daa mor noor yinni ka pudugid ban mor si'el wusa ne taaba, 45ka kuos ba la'ad ne ba araza'as wusa n pudug n tis on mekama nar ye o di'e si'em. 46Ka daar wusa ka ba la'ased Wina'am pu'usum yin, ka me la'ased yir yir n dit ne taaba, ka mor sumalisim ne poog yinni, 47ka du'osid Wina'am yu'ur su'uŋa, ka paam bareka nidib wusa sa'an. Ka Zugsob paasid bane ka o tilig daar wusa la n la'ased yadda niŋidib la sa'an.

will be added

X\