TUUMA 19

1Ka Apollos daa nam be Korint teŋin la ka Paul doli teensin n gaadi keŋ Efesus teŋin. Anina ka o nye nya'andolib sieba, 2ka bu'osi ba ye, “Yanam n niŋ Yesu yadda la, ya di'e Wina'am Siig Suŋ laa?” Ka ba lebis ye, “Ayei, ti nan zi' wum ye Siig Suŋ bee.” 3Ka Paul bu'osi ba ye, “Bo ku'om suub ka ya di'e?” Ka ba lebis ye, “Li ane Joon ku'om suub la ka ti di'e.” 4Ka Paul yel ye, “Joon ku'om suub la pa'alne ye ya tiake ya tuumbe'ed sueya. Ka Joon daa pa'al Jew dim ye ba dol one na kenne on Joon nya'aŋ la na, ka o yu'ur buon Yesu.” 5Ban wum ne'eŋa la ka di'e ku'om suub Zugsob Yesu yu'ur zug. 6Ka Paul noki o nu'us pa'al ba zutin ka Wina'am Siig Suŋ la keenn ba sa'an na ka ba pian'ad pian'azuna ka di'e Wina'am pian'ad n tis nidib. 7Ba daa ane wuu nidib piina ayi. 8Ka nwadisa atan' ka Paul kpen'ed Jew dim la'asug doogin pian'ad n tisid nidib ne sukpi'euŋ ka tu'asidi ba Wina'am na'am yela n kpe'eŋid ye o fendigi ba. 9Ka sieba mor zukpi'euŋ ka pu siake, ka pian'ad pian'ayood Zugsob suer la yela paalo ni. Ka Paul ne nya'andolib sieba basi ba ka toom. Ka daar wusa ka o tu'asid nidib Wina'am yela, Tirannus pa'alug doogin, 10ka niŋ ne'eŋa yuma ayi. Ka nidib wusa bane be Asia teensin wum Zugsob pian'ad, Jew dim ne bane ka' Jew dim la wusa. 11Ne Wina'am paŋ Paul daa tum tuumnyalima hale. 12Hale ba daa nok pien ne fuud line si'isi o niŋgbina la more keŋ ban'adnam ni, ka ba paam laafe, ka kikiris yi ka bas sieba. 13Ka Jew dim sieba ban daa giligid n kat kikiris nidib sa'an la, daa makid ye ba kat kikiris ne Zugsob Yesu yu'ur n yet kikiris la ye, “M yeti ya ne Yesu yu'ur, on ka Paul moon o yela la, ye ya yim.” 14Ba daa ane Jew dim maalmaan kpeenm on yu'ure buon Seva la biisa ayopoi daa tum ne'eŋa. 15Amaa ka kikirig la lebis ye, “M mi' Yesu ka mi' Paul. Ka yanam a ano'onama?” 16Ka one mor kikirig la due paami ba nyaŋe ba, ka ba yi yin la biel ne sapo'at. 17Ka Jew dim ne bane ka' Jew dim wusa bane be Efesus teŋin wumi li yela. Ka dabiem kpen' ba wusa. Ka ba du'osid Zugsob Yesu yu'ur. 18Ka yadda niŋidib bedego keŋ nidibin na n peligi ba poosi tu'asi ba tuumbe'ed. 19Ka tiim dim sieba more ba gbana na la'ase nyu'e bugum ka li di so' mekama nini ni. Ka ba gelig gbana la ligidi ka li a anzurifa ligidi tusa piisnu. 20Ala ka Zugsob pian'ad la kpelim yadigid ka paasid ne paŋ. 21Ne'eŋa nya'aŋ ka Paul ten'es o sunfin ye o na gaadi yi Masedonia ne Akaia teensin n keŋ Jerusalem, ka ye, “M ya'a keŋ anina, asee ka m la'am keŋ Room teŋin.” 22Ka o tum o suŋidiba ayi ka ba yuda buon Timoti ne Erastus, Masedonia teŋin ka on meŋ kpelim Asia n yuug bi'ela. 23Saŋkan la Zugsob suer dolim daa ane yela hale Efesus teŋin. 24Dau so' daa be ka o yu'ur bun Demetrius. O da more anzurifa kunt si'elnam ka li wenne Artemis pu'usum doog ne. Ka li niŋ nyood bedego n tis anzurifa tumtumnib la. 25Ka o la'as o tumtum taab n yel ye, “Nidiba, ya mi' ye tuumbama nwa ni ka ti kpan'am yit na. 26Ya wumya ka ya meŋ nye Paul n niŋid si'em la. Li ka' Efesus teŋin ma'anee, amaa la'am ne Asia so'olim wusa, o kpe'eŋi nyaŋe fendig nidib bedego n yet ye wina ban ka nidib me ne ba nu'us la ka' winaa. 27Line pak ka'ane ti tuuma la sa'uŋ ma'ane, amaa Artemis paŋ me na sa'am, one mor paŋ ka Asia so'olim wusa ne dunia nidib wusa pu'usid la. Ba ya'a pu niŋ si'ela, o pu'usum doog la na lieb zaalim.” 28Ban wum pian'ad bama la ba sunya peligne ka ba tans ye, “Efesus dim win Artemis ane one mor paŋ la.” 29Ka tukpeedug yadig teŋin la wusa. Ka nidib la gban'e Gaius ne Aristarkus babayi bane a Masedonia teŋ nidib n dol Paul la, n zo ne ba keŋ antu'a doogin. 30Ka Paul bood ye o kpen' nidibin la amaa ka o nya'andol taaba pu siake. 31Ka kpeenmnam sieba bane aa o zuanam tum o sa'an na belim o ye o da kpen' antu'a doogin laa. 32Ka tukpeedug due nidibin la ka ba tansid kon'ob kon'ob, ba bedego zi' line ke ka ba la'as la zug. 33Ka Jew dim gaŋ Alekizanda ka o zi'e nidib la tuon, ka sieba ten'es ye one so'e antu'a la. Ka Alekizanda pa'al ne o nu'us n kpe'eŋ ye o pian'a n tis nidib la. 34Amaa ban baŋ ye o ane Jew nid la, ka ba wusa la'ase maal tukpeedug yuug hale yel ye, “Efesus dim ba'ar Artemis ane one mor paŋ.” 35Ka teŋ la kpeenm ma'ae ba ka yel ye, “Efesus nidiba, dunia nidib wusa mi' ye Efesus dim gur Artemis one mor paŋ la doog, ka la'am gur kugir kane naam saazug lu la na. 36So' ku nyaŋe ki'is yel bamaa. Dinzugo kel tukpeedug ka da niŋ sukpi'euŋ yoode. 37Ya mor nimbama kpela na ka ba me pu yel yelbe'ed n tisi ya ba'ar la bee maal yelbe'ed n tis o pu'usum doogo. 38Ka Demetrius ne o tumtumnib ya'a moren pian'ad ne so', antu'a dabisir be, ka bane mor kpi'euŋ be. Dinzug ya tun'e mor taaba paae antu'a tu'ad la tuon. 39Amaa ya ya'a lem bood si'el n paas, li na maal ne teŋ nidib la'asugin. 40Yanam maal si'el zina la zug, ti mor yel, bane ied zaba la ma'ad ziri. Ti ku nyaŋe yel lin ke ka ba maal tukpeedug bama. Ti me ku nyaŋe tu'asi li gbin nyainee.” 41On yel ne'eŋa naae la ka yeli ba ye ba widigim.

will be added

X\