1 Ne'eŋa nya'aŋ ka Paul due Atens teŋin keŋ Korint teŋin. 2 Anina ka o nye Jew dim dau one yu'ure buon Akuila, ka ba du'a o Pontus teŋin, one nam kpelim yi Room n be Itali teŋin kena ne o po'a Prisila, gomena Klaudius tis wada ye Jew dim wusa duom Room teŋin la zug. Ka Paul keŋ ye o kaae ba, 3 ka kpelim anina ban a gbanzabnam la zug. Ka ba la'am tum. 4 Ka o pian'ad la'asug doogin vu'usum daar wusa n zigid ye o fendig Jew dim ne Greek dim ka ba siak o pian'ad la. 5 Ka Silas ne Timoti daa yi Masedonia teŋin paae na la, Paul daa nokne o meŋ ya'a wusa tu'asid labasuŋ la n yet Jew dim la ye Yesu la a Kiristo. 6 Ka ba ki'is o ka pian'a pian'abe'ed o yela. Ka o kpa'as o fuug n pa'ali ba ye li ka' su'uŋaa, ka yeli ba ye, “Ya ya'a bodig, li ane ya meŋ yel ka mam ba'a kae'. Lin yi saŋkan nwa wa'ae m na keŋ bane ka' Jew dim la sa'an.” 7 Ka o basi ba ka keŋ be one ka' Jew dim nid yin, one yu'ure buon Titius Justus ka pu'usid Wina'am, ka o yir daa kpi'e la'asug doog la. 8 La'asug doog la kpeenm daa ane Krispus ka on ne o yidim wusa niŋ Zugsob la yadda. Ka ninsieba bedego bane be Korint teŋin wum labasuŋ la ka niŋ yadda ka ba suu ba ku'om. 9 Ka yu'uŋ yinni ka Paul zaansim ka Zugsob yel o ye, “Da zot dabiem, amaa kpelim pian'am ka da base; 10 ka m be ne uf. So' ku nyaŋe daam uf bee poa'alime fo. Nimbane be teŋin nwa bedego ane m nidib.” 11 Ka Paul zin'in anina yuum ne pusuk n pa'an nidib Wina'am pian'ad. 12 Ka saŋkan ka Gallio daa so'e Akaia so'olim la, ka Jew dim due la'ase gban'e Paul n mor o keŋ koto ni 13 yel ye, “Niŋkaŋa nwa zigid ne ye o fendig nidib ka ba pu'us Wina'am, line pu dol ti wada.” 14 Ka Paul n daa nam bood ye o pian'a la, ka Gallio yel Jew dim la ye, “Ne'eŋa ya'a aane line ka'an su'um bee tuumbe'ed si'a ka o maalin, m naan modigin ne yanam Jew dim. 15 Amaa lin a pian'a nwa'asug ne yuda nwa'asug ne ya meŋ wada nwa'asug la, yanam gban'ami li; ka mam ku niŋ ne'eŋa sariakata.” 16 Ka o kadi ba n yiis koto la ni. 17 Ka ba wusa gban'e Sostenes one a Jew dim la'asug doog kpeenm, n bu' o koto la tuon. Amaa ka Gallio pu gos ban tum si'el laa. 18 Ka Paul kpelim zin'in Korint teŋin ne yadda niŋidib la ka li yuug. Ka o yu'un keesi ba ka kpen' aaruŋ ne Prisila ne Akuila n keŋ Siriya teŋin. Ka on daa nam pu kpen' aaruŋ Kenkiria teŋin la, ka pun o zug on daa pu'ulim n tis Wina'am la zug. 19 Ka ba paae Efesus teŋin, ka Paul bas Prisila ne Akuila anina ka keŋ kpen' la'asug doogin n tu'as ne Jew dim Yesu Kiristo labasuŋ la yela. 20 Ka ba sos o ye o kpelim ba sa'an n yuug. Amaa ka o zan'as, 21 ka keesi ba ka ye, “Wina'am ya'a siak m na leb ya sa'an na ya'as.” Ka o yi Efesus n kpen' aaruŋ 22 n paae Sizerea ka keŋ Jerusalem n pu'us yadda niŋidib bane be anina la ka nyaan keŋ Antiok. 23 Ka o yuug anina bi'ela ka yi n goond Galatia teensin ne Frigia teensin n kpemisid yadda niŋidib la wusa su'uŋa. 24 Ka Jew dau so' one yu'ure buon Apollos ka ba du'a o Alekizandria teŋin la kenn Efesus na n a pian' mi'ilim daan ka mi' Wina'am gbauŋ su'uŋa. 25 Dau nwa paam zamisug Zugsob la suer yela ka kpe'eŋid o meŋ pa'an Yesu suer su'uŋa, hale la'am ne on mi'i ne Joon ku'om suub ma'aa la. 26 Ka o pin'ili tu'asid ne sukpi'euŋ Jew dim la'asug doogin la. Ka Prisila ne Akuila wum o pian'ad la ka dol o keŋ bigis o Wina'am suer la yela su'uŋa n paas. 27 Ka o bood ye o keŋ Akaia teŋin ka yadda niŋidib bane be Efesus teŋin la kpemis o, ka sob gbauŋ tis yadda niŋidib bane be Akaia ni la ye ba di'em o su'uŋa. Ka o paae anina n suŋ bane ka Wina'am daa tisi ba o yelsum ka ba niŋ o yadda la. 28 Ka o tu'as ne Jew dim la hale n nyaŋe ba paalo ni n pa'ali ba Wina'am gbauŋ poogin ye Yesu ane Kiristo.
