TUUMA 17

1Ba daa gaad Amfipolis ne Apolonia teensin n kenn Tesalonika teŋin na, zin'ikan ka Jew dim la'asug doog daa be. 2Ka Paul daa kpen' anina vu'usum daarnam atan', wuu on yiti maan si'em la, ka tu'ad ne ba dine be Wina'am gbauŋin 3n bigisidi ba li gbin nyain ye li daa a tilas ye Kiristo namis ka vu'ug kumin, ka yet ye, “Yesu on ka m mooni o yela tisidi ya la a Kiristo la.” 4Ka sieba daa siaki dol Paul ne Silas la'am ne Greek dim nidib bedego bane pu'usid Wina'am la'am ne po'ab bedego bane a tuon gatib la. 5Amaa ka Jew dim ben' fufum ka buol bugusum dim sieba bane be da'an n ka'a tuuma la. Ka ba la'as n a bedego ka maal tukpeedug n keŋ gilig Jason yir n ied Paul ne Silas ye ba more ba yi nidibin la na. 6Ka ba pu nyaŋe nyee ba ka gban'e Jason ne yadda niŋidib sieba n more ba keŋ teŋin kpi'emnam sa'an ka tans ye, “Nimbama nwa bo yela n daam dunia wusa. Ka nannanna ba kenn ti teŋin na, 7ka Jason di'e ba. Ba wusa ki'isid Room na'ab wada ka yet ye, na'aso' lem be, ka ba buon o Yesu.” 8Ka ban wum ne'eŋa la ka li zab nidib la ne teŋin kpi'emnam la. 9Ka ba di'e ligidi Jason ne bane dol o la sa'an, line ka ba na lebisi tisi ba, ba ya'a ti nye ka ba pu kpen' yelsi'a ni ya'ase, ka basi ba ka ba keŋ. 10Ka yu'uŋ sob ka yadda niŋidib la yiis Paul ne Silas ka ba keŋ Berea teŋin. Ka ba paae anina n keŋ kpen' Jew dim la'asug doogin. 11Ka Jew dim bama potenda nie gaad Jew dim bane be Tesalonika teŋin la. Ka ba di'e pian'ad la ne ba ya'am boodim, ka karem Wina'am gbauŋ la n zamisid daar wusa ye ba gos ye Paul n tu'asidi ba si'el la a sida bee li ka' sida. 12Ka Jew dim bedego niŋ yadda la'am ne Greek dim po'ab bane mor yu'ur nidibin ne dap bedego. 13Ka Jew dim bane be Tesalonika teŋin la wum ye Paul moon Wina'am pian'ad Berea teŋin la, ka ba keŋ anina daam nidib ka ke ka ba sunya pelig ne Paul ne Silas. 14Ka yadda niŋidib la kpelim ke ka Paul keŋ ateuk gbeug. Amaa ka Silas ne Timoti kpelim anina. 15Ka bane biel Paul la mor o paae Atens teŋin la ka lebid ka Paul tolimi ba ye ba ya'a paae ban yel Silas ne Timoti ye ba kenn nannanna na. 16Ka Paul daa guri ba Atens teŋin la ka nye ka teŋ la pe'el ne wina ne ba'a. Ka o sunf pelig. 17Ka o keŋ Jew dim la'asug doogin tu'asid Jew dim ne bane ka' Jew dim ka pu'usid Wina'am wenne ban la, ka tu'asid la'am ne da'an, daar wusa. 18Ka nimbane zamis ya'am hale ka ba buoni ba Epikurea dim ne Stoik dim, nye o. Ka sieba bu'os ye, “Bo ka yalim kaŋa nwa bood ye o yele?” Ka sieba yel ye, “Ti wum ye one moon win paala la suer yela ka pa'an Yesu yela, ne ku'um vu'ugir la yela men.” 19Ka ba mor o keŋ Areopagus zin'ig kan ba la'as nidib na, ka yel ye, “Kel ka ti baŋ pa'alsaaŋ kan ka fu tu'asid la; 20ka yel bama nwa ane yelsaaŋ n tisi ti ka ti bood ye ti baŋi li gbin.” 21Ka Atens dim ne saam bane zin'i anina bood ye ba tu'as yelpaala bee ka me wum yelpaala saŋa wusa. 22Ka Paul due zi'en Areopagus la'asug la tuon ka yel ye, “Atens nidiba, m baŋ ye ya si'el mekama wusa ni ya dol ba'a maalug yela su'uŋa. 23Man giligi ya teŋ la ka gos zin'is ban ni ka ya pu'usid la, m nye ya pu'usum maluŋ zin'ig ka li sob anina ye, ‘WINA'AM KANE KA TI ZI' LA.’ Lin ka ya pu'usid ka la'am zi' la, lin ka m yu'un mooni tisidi ya. 24“Wina'am one maal dunia ne line be li ni wusa, ka so'e saazug ne teŋ wusa la, pu zin'i dood bane ka ninsaalib me ma'aa nii. 25La'am ne lin wusa ka ninsaal tum tis o pu pa'alne ye si'el pasig oo. O meŋ mor nyovur ne vu'usum ne si'el mekama zan'asa n tisid nidib wusa. 26Nid yinni la ni ka o maal nidib buudi wusa n ke ka ba be dunia ni wusa. O meŋ mak saŋkan ne zin'is ban ni ka ba na zin'in. 27O tum ne'eŋa ye ba ie o zin'ig, ka daasi'ere ba na nye o. Amaa o pu lal ne tii. 28O ni ka ti be ka vu'usid ka ken wenne yanam Atens solima dim sieba n daa yel ye, ‘Tinam me ane o biis.’ 29“Tiname sagidim aa o biis la, ti da ten'es ye Wina'am beilim wenne wuu ba'a ban ka ninsaal nok salima bee anzurifa bee kuga, n ten'esi maal ne o nu'use. 30Wina'am da pu mugus ninsaalib saŋkan ka ba da zi' on a si'em la. Amaa nannanna o tis noor zin'is mekama ni wusa ye nidib wusa tiake ba tuumbe'ed sueya ni; 31ka o mak dabiskan ka o na ke ka nid kan ka o daa gaŋ la kad dunia nidib wusa saria ne asida. O pa'al ne'enam nyain n tis so' wusa on vu'ug nid kan kumin la zug.” 32Ban wum ye Paul pian'ad ku'um vu'ugir yela la, ka sieba la' o. Amaa ka sieba yel ye, “Ti bood ye ti wum ka o lem pian'a pian'akaŋa ya'as.” 33Ka Paul yi ba sa'an. 34Ka ninsieba la'as o ni n niŋ yadda. Dionisius one a Areopagus la'asug nid la daa be ba soogin, ne po'a ka o yu'ur daa buon Damaris, la'am ne ninsieba.

will be added

X\