TUUMA 16

1Ka ba keŋ paae Derbe ne Listra teensin na. Ka Wina'am nya'andol daa be Listra ka o yu'ur buon Timoti, on daa a Jew dim po'a biig. Ka o ma daa a yadda niŋid. Amaa ka o saam daa a Greek nid. 2Ka Listra ne Ikonium yadda niŋidib daa pian'a o tuumsuma yela. 3Ka Paul n daa bood ye Timoti dol o la zug ka o kpen'es o baŋo, bozugo Jew dim wusa bane daa be zin'ig kan la daa mi' ye o saam daa ane Greek nid. 4Ka ba keŋ yi teŋ teŋ n tu'asidi tisid yadda niŋidib la Wina'am Tumtumnib ne yadda niŋidib kpeenmnam bane be Jerusalem gban'e si'em, ka yeli ba ye ba dol gban'ar kaŋa. 5Ka yadda niŋidib la yadda daa kpe'eŋ ka ba kal paasid daar wusa. 6Ka ba keŋ yi Frigia ne Galatia teensin, Wina'am Siig Suŋ la pu ke ka ba pian'ad Wina'am pian'ad Asia teŋin la zug. 7Ka ba paae Misia teŋ ben na n kpe'eŋ ye ba keŋ Bitinia teŋin. Amaa ka Yesu Siig pu siaki tisi ba suere. 8Ka ba doli gaad Misia teŋin n keŋ sig Troas teŋin. 9Ka li wenne zaansuŋ ne n kenn Paul sa'an yu'uŋ kan na, ka o nye Masedonia dim dau ka o zi'en belim o ye “Kem Masedonia na n suŋi ti.” 10Ka on nye zaansuŋ la ka ti ti'eb to'oto ye ti keŋ Masedonia teŋin, tiname gban'e ye Wina'am buoli ti ye ti tu'as labasuŋ la n tisi ba la zug. 11Ka ti kpen' aaruŋ anina n kpa'a titu'aa keŋ Samotires teŋin. Ka beog nie ka ti keŋ Niapolis teŋin. 12Ka ti yi anina keŋ Filipi teŋin line a teŋtita'ar Masedonia so'olim ni. Ka Filipi a Room dim so'olim. Ka ti zin'ini anina dabisa bi'ela. 13Ka vu'usum daar ka ti yi teŋin la n keŋ kolug baba, zin'ikan ka ti ten'es ye ba pu'usid Wina'am. Ka ti zin'i anina pian'a tis po'ab bane la'as na. 14Yinni one wum ti pian'ad daa ane Tiatira teŋ po'a ka o yu'ur buon Lidia. O daa kuosidne fuvenla ka pun pu'usid Wina'am. Ka Zugsob la yo'og o poten'er ka o kelis Paul n pian'ad si'el la su'uŋa. 15Ka ti daa suu on ne o yidim Wina'am ku'om. Ka Lidia yeli ti ye, “Ya ya'a siak ye m sid niŋ Zugsob la yadda, kemi na zin'ini m yin.” Ka ti siaki keŋ. 16Ka tiname daa wa'ae pu'usum zin'igin la, ka bipuŋ one a yamug ka kikirig dol la daa tu'os ti. O daa ane ba'abugud ka o bugub la ni ka o nyet kpan'am bedego tisid bane so'e o la. 17Ka o dol Paul ne tinam n tansid ye, “Nimbama nwa ane Wina'am one gaad bun zan'asa la tumtumnib, bane mooni yeti ya faangir la suer.” 18Ka o tum ne'eŋa dabisa bedego. Amaa ka li zab Paul hale, ka o fendigi yel kikirig la ye, “M yet uf ne Yesu Kiristo yu'ur zug ye fu yim ka bas bipuŋ.” Ka kikirig la yi o sa'an saŋkan la. 19Amaa bane so'e o la baŋ ye ti'ir kan ka ba daa mor ka nyet kpan'am la lem kae' la, dinzug ka ba gban'e Paul ne Silas n ve'egi ba kpen' da'an bane so'e teŋ la tuon. 20Ka ba more ba n keŋ one tu'asid antu'a la sa'an n yel ye, “Nimbama nwa ane Jew dim bane sa'ami ti teŋ. 21Ba pa'ane malima bane pu doli ti wadaa. Tinam a Room nidib la ti ku siaki dol malimbamaa.” 22Ka nidib bedego la'ase giligi ba ka one tu'asid antu'a la pidig Paul ne Silas fuud ne paŋ ka bas noor ye ba fi'ebimi ba. 23Ka ba bu'u ba bedego ka kpen'esi ba sarega ni ka yel one guri sarega doog la ye o gosimi ba su'uŋa. 24Ka ban yel ne'eŋa la ka o kpen'esi ba doog kane be poogin la, ka loo ba noba ta'al ne datitada. 25Amaa ka yu'uŋ tisoos saŋa ka Paul ne Silas pu'usid ka yuum yuuma n tisid Wina'am ka bane la'am be ne ba sarega ni la kelisid. 26Ka to'oto ka teŋ dam hale ka sarega doog eenbir la dam. Ka za'anoya wusa yo'og. Ka bana la yidig nidib la wusa ni. 27Ka sarega gur la due gbeemin ka nye za'anoya la yo'og la, ka ten'es ye ba su'ane yi, ka fue su'ug ye o ku o meŋ. 28Amaa ka Paul tans ne kukor kpi'euŋ ye, “Da poa'alim fu meŋa, ka ti wusa be kpela.” 29Ka sarega gur la buol ka ba mor fitla na. Ka o va' due kpen' kirid ne dabiem ka lu Paul ne Silas tuon. 30Ka more ba yi na ka yel ye, “Dapa, m na niŋ wala ka nye faangire?” 31Ka ba yel o ye, “Niŋim Zugsob Yesu yadda ka fun ne fu yidim wusa na nye faangir.” 32Ka ba tu'as Zugsob la pian'ad n tis on ne bane wusa daa be yin la. 33Ka o noki ba yu'uŋkan la, n piesi ba fen'ed la. Ka ba suu on ne o yidim wusa Wina'am ku'om. 34Ka o more ba du o yin ka tisi ba diib. Ka li niŋ on ne o yidim wusa sumalisim, ban niŋ Wina'am yadda la zug. 35Ka beog nie ka one tu'asid antu'a la tum o tumtumnib ye ba yel one gur sarega la ye, “Basim ka nidib ayi la n yi.” 36Ka sarega gur la tu'as labaar la n tis Paul ye, “Antu'a tu'ad la tis noor ye m ke ka ya yi. Dinzugo yiim keŋ baanlim.” 37Ka Paul yel tumtumnib la ye, “Tinam ane Room teŋ dim. Amaa ba bu'u ti nidibin ka pu wum ti noor pian'ade, ka kpen'esi ti sarega ni. Ka nannanna ba yu'un yiisidi ti, ka li wenne su'adimnee. Ayei, kel ka ba meŋ kena n yiisi ti.” 38Ka tumtumnib la keŋ yel antu'a tu'ad la ne'eŋa. Ka dabiem kpen' ba, ban wum ye Paul ne Silas ane Room teŋ dim la zug. 39Ka ba meŋ kena nwe'e ba nu'ug ka yiis ba ka belimi ba ye ba yim teŋin la. 40Ka ba yi sarega la ni n keŋ kaae Lidia ka nye yadda niŋidib la, ka pian'a pian'ad line kpe'eŋidi ba sunya, ka nyaan keŋ.

will be added

X\