TUUMA 15

1Ka nidib sieba yi Juuda teŋin n sig na n pa'an yadda niŋidib la ye, “Ya ya'a pu kpen'e baŋo wuu Moses wada la pa'an si'em laa, ya ku nyaŋe paam faangire.” 2Ka Paul ne Barnabas daa nwa'as nonwa'ar hale ne ba, dinzug ka ba gaŋ Paul ne Barnabas ne yadda niŋidib sieba ye ba keŋ Wina'am Tumtumnib la ne yadda niŋidib kpeenmnam bane be Jerusalem la sa'an n bu'osi ba nonwa'ar kaŋa yela. 3Ka yadda niŋidib la yiisi ba tum, ka ba doli yi Fonisia ne Samaria teŋin n yet nidib bane ka' Jew dim la tiaker la yela. Ka li niŋ sumalisim hale n tis Fonisia ne Samaria yadda niŋidib la. 4Ka ban paae Jerusalem la, ka yadda niŋidib la ne Wina'am Tumtumnib la ne ba kpeenmnam wusa di'e ba. Ka ba tu'as Wina'am maal si'el wusa ne ba. 5Ka yadda niŋidib bane a Farisee dim due zi'en ka yel ye, “Asee ka ba kpen'e baŋo, ka ti zamis ba, ka ba siak Moses wada la.” 6Ka Wina'am Tumtumnib ne yadda niŋidib la kpeenmnam la'as ye ba gban'e yel kaŋa nwa gbin. 7Ka nogban nwa'ar la yu'un galis la, ka Piita due zi'en ka yeli ba ye, “M zuanama, ya mi' ye pin'ilugin saŋa ka Wina'am daa gaŋ mam ya ni, ye m tu'asi o labasuŋ la n tis bane ka' Jew dim la ka ba wum ka siak. 8Ka Wina'am one mi' saalib potenda daa tisi ba o meŋ Siig Suŋ la wenne on daa tis tinam si'em la n pa'ali ti ye ba siak o noor. 9Bakir daa ka'a tinam ne ban soogin ne. Ba daa niŋ Wina'am yadda ka o yiisi ba tuumbe'ed n bas. 10Bo ka ya makid Wina'am ka tisid o nya'andolib malimkpi'ema lin ka tinam ne ti yaanam daa pu nyaŋe maale? 11Tinam siakiya ye tinam na paam faangir ne ti Zugsob Yesu popielim poogin, wenne lin na niŋ bane ka' Jew dim si'em la.” 12Ka nidib la wusa a baanlim, ka kelis Barnabas ne Paul n tu'asid tuumnyalima ban ka Wina'am tum buudi buudi sa'an ne ba. 13Ka ban n pian' naae la, ka Jemes yel ye, “M zuanama, kelisimi. 14Simon Piita yel n tienn ti Wina'am n daa deŋi pa'ali ye o bood ye o tis bane ka' Jew dim la yelsum, n gaŋ nidib ba sa'an ka ba lieb o nidib. 15Yel bama nwa dolne Wina'am nodi'esidib n sob si'em la ye, 16‘Zugsob la yel ye, “Ne'eŋa nya'aŋ m na leb na n tis tadimnam bane a David yaas la paŋ ye, 17nidib na ie m, buudi ban wusa ka m gaŋ ye ba aa m nidib la ne nidib wusa.” 18Zugsob la maal bun bama n yel ye o ke ka ba baŋ li wusa kudimin sa.’ 19“Alazug mam poten'er ane ye ti da daam bane ka' Jew dim buudi ka fendigi keenn Wina'am sa'an la naa, 20amaa ka lee sob gbauŋ n yeli ba ye ba da di ba'ar diibo ka li ka' nyainee. Ka dap ne po'ab da sa'am taaba. Ka da onb bunkonbid bane ka ba sianki kuu, ne ni'im kane nam mor ziim. 21Kudimin sa ka ba mool Moses pa'alug teens wusa ni ka karem o sob la la'asug doodin, vu'usum daar wusa.” 22Ka Wina'am Tumtumnib ne yadda niŋidib wusa ne ba kpeenmnam ten'es ye li a su'um ka ba gaŋ nidib ba soogin n tumi ba Antiok teŋin la'am ne Paul ne Barnabas. Ka ba gaŋ Judas one ka ba me buon Barsabas la ne Silas, nimbane ka yadda niŋidib la na'asidi ba, 23ka sob gbauŋ n tisi ba ye ba more n keŋ Antiok teŋin. Ka gbauŋ la yel ye, Tinam bane a Wina'am Tumtumnib ne yadda niŋidib la kpeenmnam pu'usid yadda niŋidib bane ka' Jew dim buudi, ka be Antiok teŋin ne Siriya ne Silisia teensin la. 24Ti wumya ye ninsieba yi ti sa'an na n daami ya ne pian'ad bane fendigidi ya ya'am, ka ti pu tisi ba noore. 25Alazug ka ti la'as taaba n gban'e noor yinni n ten'es ye li a su'um ka ti gaŋ ninsieba n tumi ba ya sa'an na. Ban ne ti zuanam Paul ne Barnabas na la'am kena, 26nimbane nyovur n daa be toog ni ti Zugsob Yesu Kiristo la zug. 27Dinzug ka ti tum Judas ne Silas ye ba meŋ yeli ya bun kan la ne ba noya. 28Li a su'um n tis Wina'am Siig Suŋ la ne tinam ka ti da zi'eli ya yela n gaad line nara. 29Ya da di ba'ar diibo, ka da onb ni'im kane nam mor ziim ne bunkonbid bane ka ba sianki kuu, ka dap ne po'ab da sa'am taabaa. Ya ya'a pu tum yel bamaa, ya na tum tuumsuma. Wina'am na tisi ya yelsum. 30Ban daa yiisi ba tum la, ka ba kenn sig Antiok teŋin n la'as yadda niŋidib la, ka nok gbauŋ la n tisi ba. 31Ka ba karem gbauŋ la ka li niŋi ba sumalisim bedego ne ban yel si'em n kpe'eŋidi ba la zug. 32Ka Judas ne Silas ban me daa a Wina'am nodi'esidib la, pian' hale n kpemis yadda niŋidib la. 33Ka zin'in ne yadda niŋidib la yuug bi'ela ka ba nyaan ke'esi ba ne sumalisim. Ka ba leb bane daa tumi ba la sa'an. 34Ka Silas gban'e ye o kpelim anina. 35Ka Paul ne Barnabas me kpelim anina ka ban ne pa'anib bedego bane be anina la pa'an ka moon Zugsob pian'ad la. 36Ka dabisa bi'ela nya'aŋ ka Paul yel Barnabas ye ba lem n kaae yadda niŋidib teens bane wusa ni ka ba daa mool Zugsob pian'ad la n gos ban a si'em. 37Ka Barnabas daa bood ye o dol Joon on yu'ure buon Maak la ka ba la'am keŋ. 38Amaa ka Paul ten'es ye li ka'a su'um ka ba dol one daa zo ka basi ba Pamfilia teŋin ka pu doli ba tum la. 39Ka ba nwa'as taaba pudug kon'ob kon'ob. Ka Barnabas nok Maak ka ba kpen' aaruŋ n keŋ Saipuros teŋin. 40Ka Paul gaŋ Silas. Ka yadda niŋidib la sos Wina'am n tisi ba ye o guri ba ne o yelsum. 41Ka ba keŋ n yi Siriya ne Silisia teensin n kpemisid yadda niŋidib la sunya.

will be added

X\