TUUMA 14

1Ka Ikonium ni ka Paul ne Barnabas kpen' Jew dim la'asug doogin pian' hale ka nidib bedego, Jew dim ne bane ka' Jew dim la niŋ Wina'am yadda. 2Amaa ka Jew dim bane pu di'e pian'ad la daam bane ka' Jew dim la ye ba kis nidib bane dol Wina'am la. 3Ka Paul ne Barnabas zin'ini anina yuug ka pian'ad Zugsob la yela ne sukpi'euŋ. Ka Zugsob tisi ba paŋ ka ba tum tuumnyalima ka li pa'al nidib la ye Wina'am popielim labaar la ane sida. 4Ka teŋ la nidib pudug. Ka sieba bood Jew dim ka sieba bood Paul ne Barnabas. 5Ka Jew dim ne bane ka' Jew dim ne ba kpeenmnam bood ye ba diis Paul ne Barnabas nyan ka lobi ba ne kuga. 6Ka ba baŋ li ka zo keŋ Likaonia so'olim, Listra ne Derbe teensin ne ba teŋbibisin 7n mool labasuŋ la anina. 8Ka dau daa zin'i Listra ni ka pu tun'e kenna. O daa pon'olim ne o biilimin sa ka nam pu keŋe. 9Ka o kelis Paul pian'ad la. Ka Paul gos o kii ka baŋ ye o niŋ Wina'am yadda ka na tun'e nye laafe, 10ka yel o ne kukotita'ar ye, “Duom zi'en.” Ka dau la ianki zi'en ka keŋ. 11Ka nidib bedego la nye Paul n tum si'el la, ba tans ne Likaonia pian'ad ye, “Wina'amnam sigi ti sa'an na wenne nidib ne.” 12Ba daa pudi ba Wina'amnam bedego la yuda, ka yinni buon Zeus ka yinni la me buon Hermes. Ka ba buol Barnabas ye Zeus, ka buol Paul ye Hermes, on daa a pian'ad kpeenm la zug. 13Ka Zeus pu'usum doog daa be teŋ la tuon. Ka Zeus ba'amaan ne nidib la ten'es ye ba ane wina, ka mor na'araad ne tiis puum n keŋ teŋ la za'anoorin na n bood ye ba maal maana n tis Wina'am Tumtumnib Barnabas ne Paul. 14Amaa Paul ne Barnabas n wum ban niŋ si'em la, ba aanse ba meŋ fuud ka kpen' nidib la soogin tansid ye, 15“Ti zuanama, bo ka ya niŋid ne'enama? Tinam me ane nidib wenne yanam ne. Ti ye ti mool labasuŋ la n tisi ya ye ya bas line ka'a sidaa, ka fendigi dol Wina'am one voe ka maal saazug ne dunia ne mo'ar ne line be li ni wusa la. 16Kudumin la, Wina'am daa ke ka buudi wusa doli ba meŋ sueya, 17amaa ka lee niŋ tuumsuma ye nidib baŋ o yela. O tisidi ti saa, ne bunib saŋa ye ti dii tig ka mor sumalisim.” 18La'am ne pian' bama la, li daa toe ka ba giŋ nidib la ka ba ku maal maan la n tisi baa. 19Ka Jew dim yi Antiok ne Ikonium teensin kena nyaŋ ke ka nidib la doli ba n lobi Paul ne kuga, ka vuug o yiisi teŋin la, ka ten'es ye o kpine. 20Amaa ka nya'andolib la la'ase gilig o ka o due kpen' teŋin la. Ka beog nie la ka Paul ne Barnabas keŋ Derbe teŋin. 21Ka Paul ne Barnabas mool labasuŋ la Derbe teŋin, ka nye nya'andolib bedego anina, ka leb Listra ne Ikonium ka nyaan leb Antiok ni, 22ka kpemis bane niŋ Yesu yadda la n sa'ani ba ye ba kpelim niŋ Yesu yadda, ka yet ye, “Li nar ka ti namis yiiga ka naan kpen' Wina'am na'amin.” 23Ka ba gaŋ kpeenmnam tis yadda niŋidib bane la'as teŋ teŋ wusa ka lo noor n ka pu'us Wina'am, ka noki ba niŋ Zugsob one ka ba niŋ yadda la nu'usin la, 24ka gaadi yi Pisidia teŋin n paae Pamfilia teŋin na. 25Ka ban mool Wina'am pian'ad la Perga teŋin la ka gaadi sig Attalia teŋin. 26Anina ka ba kpen' aaruŋ n keŋ Antiok teŋin zin'ikan ka nidib la daa sos Wina'am yelsum n tisi ba la'am ne tuum kan ka ba naae la zug. 27Ka ba paae n la'as yadda niŋidib la ka yeli ba Wina'am tum si'el ne ba, ne on maal suer ye bane ka'a Jew dim niŋ o yadda la, 28ka zin'in ne ba yuug.

will be added

X\