TUUMA 13

1Wina'am nodi'esidib ne pa'anib daa be yadda niŋidib la soogin Antiok teŋin. Ba a Barnabas, ne Simeon Niger ne Lusius on yi Sairene na la, ne Manaen on ka ba daa ugus o na'ab Herod yin la ne Saul. 2Ka ban daa lo noor pu'usid Zugsob la, ka Wina'am Siig Suŋ yeli ba ye, “Gaŋim Barnabas ne Saul ba gunni, ka ba tum tuum kan ka m gaŋi ba ye ba tum la.” 3Ka ban lo noor ka sos Wina'am la, ka zaŋ ba nu'us pa'ali ba zutin ka tumi ba ka ba yi keŋ. 4Ka Wina'am Siig Suŋ la n tumi ba la, ka ba keŋ Selusia teŋin n kpen' aaruŋ anina n keŋ Saipuros so'olimin, 5ka ba paae Salamis teŋin n mool Wina'am pian'ad la Jew dim la'asug doodin. Ka Joon Maak me suŋi ba ne tuuma la. 6Ka ban daa lo'oŋ Saipuros teŋ kane ka ku'om giligi li la ni n paae Pafos na la, ka nye ba'akolug daan ka o a Jew nid ka o ma' ye o ane Wina'am nodi'es, ka o yu'ur buon Bar-Yesu. 7O daa ane teŋ kan gomena la zua. Gomena la daa mor ya'am hale. O yu'ur daa buon Sergius Paulus. Ka o buol Barnabas ne Saul, on bood ye o wum Wina'am pian'ad la zug. 8Amaa ba'akolug daan Bar-Yesu bee Elimas line a Greek yu'ur la, daa kpe'eŋ o meŋ n ki'is Saul ne Barnabas ye o sa'am gomena la yadda niŋir. 9Amaa Saul on ka ba buon Paul la, daa pe'el ne Wina'am Siig Suŋ ka kpa' gosid ba'akolug daan la kii, 10ka yel ye, “Fun one a Sutaana biig ne tuumsuma wusa bi'em ne zam daana la, wala ka fu mood ye fu sa'am Zugsob la suesuŋ la? 11Gosima, Zugsob na namis uf. Fu na zu'om ka ku tun'e nyet saŋa bi'ela.” Ka o kpelim zu'om n due n babin n bood ye nid ve' o. 12Ka gomena la niŋ Zugsob yadda on nye bun line niŋ la wusa. Ka lin ka o zamis Zugsob la yela lidig o. 13Ka Paul ne o tumtum taaba kpen' aaruŋ n yi Pafos ni keŋ Perga teŋin line be Pamfilia so'olim ni. Ka Joon basi ba ka leb Jerusalem. 14Ka ba daa yi Perga n gaadi paae Antiok line be Pisidia so'olim la. Ka Jew dim vu'usum daar ka ba keŋ la'asug doogin n zin'in. 15Ka ban karem Wina'am wada ne Wina'am nodi'esidib gbana naae la, ka la'asug doog la kpeenmnam tumi ba sa'an n yeli ba ye, “Ti zuanama, ya ya'a mor sa'alug n na sa'ali nidib la, yanam tu'asimi li.” 16Alazug ka Paul due n zi'e ka yibisi ba ne o nu'ug ka yeli ba ye, “Israel nidib ne bane pu'usid Wina'am wenne tinam la, kelisimi. 17Wina'am one ka Israel dim pu'usid la da gaŋi ti yaanam n du'osi ti buudi la, ban daa nam be Egipiti teŋin n a saam la. Ka Wina'am da more ba ne o paŋtita'ar la n yiisi ba Egipiti teŋin na. 18Ka yuma piisnaasi ka o di suguru ne ba, ban daa be moogin la. 19Ka o da sa'am buudi ayopoi Keinan so'olim ni n tisi ba teŋ la ka ba so'e ka li a ba faar, 20hale wuu yuma kobusnaasi ne piisnu. “Ka lin nya'aŋ la, ka o tisi ba antu'a tu'adib n ti paae nodi'es Samuel saŋa. 21Ka ba sos ye ba boodne na'ab. Ka Wina'am tisi ba Kihi biig Saul, one a Benjamin yaaŋ, ka o di na'am yuma piisnaasi. 22Ka Wina'am n da pidigi Saul na'am la, ka gaŋ David ka o di na'am. Ka Wina'am yel ye, ‘M nye Jese biig David one paae m ya'am ka na tum line wusa ka m bood.’ ” 23Ka Paul lem ye, “Na'ab David yaas sisoogin ka Wina'am daa yiis faangid la n tis Israel dim, one a Yesu, wenne on da pun yel zi'el si'em la. 24On da nam pu kena la, ka Joon daa mool n tis Israel nidib wusa ye ba tiakemi ba sunya ka di'e ku'om suub. 25Ka Joon daa ti bood ye o naae o tuuma la, ka bu'osi ba ye, ‘Ya ten'es ka m aa ano'one? Mam ka' on ka ya gur laa. Amaa so' na ken mam nya'aŋ na, ka m pu su'um ye m pidig o ta'adaa.’ ” 26Ka Paul ye, “M zuanam bane a Abraham yaas, ne bane pu'usid Wina'am wenne tinam la, Wina'am tum faangir labaar la na n tis tinam. 27Nimbane daa be Jerusalem la ne ba kpeenmnam wusa daa pu baŋ ye one a faangid laa. Ka me pu baŋ nodi'esidib pian'ad la ka ba karem vu'usum daar wusa la gbin ne. Ban kadi o saria n koos be'ed la, ke ka nodi'esidib n da yel si'el la niŋ ameŋa. 28Hale ne ban pu nye yelbe'ed ne lin su'um ye o kpi la, ba kpelim sos Pilate ye o bas suer ka ba kuu o. 29Ka ban daa niŋ si'el wusa wenne lin pun sob o yela si'em n naae la, ka sigis o dapuudir la zug n pin' o yaugin. 30Amaa Wina'am daa vu'ug o kumin. 31Ka dabisa bedego ka o nie o meŋ n pa'al bane yi Galilee n dol o keŋ Jerusalem na la, ka ba nye o. Ka nannanna ba tu'as nidib ban nye o yela si'em la. 32“Ka tinam mor labasuŋ la n keenn ya sa'an na. Lin ka Wina'am da pun yel n zi'eli ti yaanam la, 33line nwa niŋ ameŋa n tis tinam bane aa ba yaas la, on vu'ug Yesu kumin la. Li wenne lin sob yuuma gbauŋin yuum ayi daan poogin si'em la ye, ‘Fu ane man Biig. Zina ka m lieb fu saam.’ 34Wina'am n daa vu'ug Yesu kumin la pa'al ye o niŋgbiŋ ku pun'e, ne'eŋa yela la ka o da pun yel o gbauŋ poogin la ye, ‘M na tis uf yelsum kan ka m da pun yel zi'el David la.’ 35Dinzug o lem yel o yuuma gbauŋ poogin zin'isi'a ya'as ye, ‘Fu ku bas fu ninsuŋ la ka o pun'e.’ 36“David da tum line paae Wina'am ya'am, o meŋ zumaana win la, ka kpi. Ka ba mum o o yaanam sa'an ka o niŋgbiŋ pun'e. 37Amaa on ka Wina'am vu'ug o kumin la, o pu pun'ee. 38“Dinzugo m zuanama, baŋim ye dau kaŋa nwa ma'asim zug ka tuumbe'ed yiisib yela mooni ya sa'an. 39On zug on mekama n niŋ o yadda Wina'am na yiis o tuumbe'ed lin wusa ka Moses wada daa ku tun'e yiis la bas. 40Dinzugo gu'usim ka yela ban ka Wina'am nodi'esidib da yel la da luu ya zutin ne. 41‘Gosimi yanam bane a niŋki'isidib la. Ya na vol ya'am n kpi. Man ya Wina'am na tum tuuma ya zumaana nwa ni ka ya ku siak ye li sid niŋeya, hale baa so' ya'a peligi o poog pa'ali yaa.’ ” 42Ka Paul ne Barnabas ti yit la, ka nidib la sosi ba ye ba lem vu'usum daar kane ken na la n tu'asi ba bun lin ka ba tu'asi ba la ya'as. 43Ka la'asug la widig la, ka Jew dim bedego ne bane ka' Jew dim buudi, ka lee dol Jew dim suer la, daa dol Paul ne Barnabas. Ka ba sa'ali ba ye ba kpelim be Wina'am yelsum poogin. 44Ka vu'usum daar lem paae ya'as la, ka teŋ la dim sieba bedego n la'as taaba ye ba wum Wina'am pian'ad la. 45Ka Jew dim la n nye nidib bedego la ka fufum gban'e ba. Ka ba ki'is Paul n tu'as si'el la, ka pian'ad o pian'abe'ed. 46Amaa Paul ne Barnabas tu'asi ba ne sukpi'euŋ n yeli ba ye, “Li su'um ka ti tu'as Wina'am pian'ad la n tisi ya yiiga. Amaa yanam zan'as li, ka kadi ya meŋ saria ye ya pu nar ye ya di'e nyovur line ka' naar laa. Din yela ti na fendigi keŋ bane ka' Jew dim buudi la sa'an. 47Ka noyelug kane ka Zugsob la yel tinam la dolne lin da sob ye, ‘M gaŋ uf ka fu na ke ka bane ka' Jew dim buudi la baŋ Wina'am yela nyain, ka dunia dim wusa na nyet faangir fu labaar moolug la ni.’ ” 48Ka bane ka' Jew dim buudi la n wum ne'eŋa la, li niŋi ba malisim hale. Ka ba du'os Wina'am pian'ad su'uŋa. Ka ban wusa ka Wina'am daa gaŋ ye ba nye nyovur line ka' naar la niŋ o yadda. 49Ka Zugsob pian'ad la daa mool so'olim kan wusa ni. 50Amaa Jew dim daa ke ka po'ab bane ka ba yu'ur du teŋin la ka ba ka' Jew dim buudi ka lee dol Jew dim suer la, ne dap bane a tuongatib teŋ la ni sunya pelig ne Paul ne Barnabas. Ka ba si'iŋe namisi ba n kadi ba n yiis ba so'olim la ni. 51Ka Paul ne Barnabas pisigi ba nu'us, ka li pa'al ye ba ba'a ka' ne baa, ka yi n keŋ Ikonium teŋin. 52Ka nya'andolib la mor sumalisim. Ka Wina'am Siig Suŋ bee ba ni.

will be added

X\