TUUMA 11

1Ka Yesu Tumtumnib ne yadda niŋidib bane be Juuda so'olim la wum ye nidib bane ka' Jew dim buudi me di'e Wina'am pian'ad la. 2Ka Piita n leb Jerusalem na ka Jew dim yadda niŋidib bane bood ye yadda niŋidib wusa kpen'e baŋo la daa po'og Piita, 3ka yel o ye, “Bo niŋ ka fu la'as ne nidib bane pu kpen'e baŋo la n dit ne ba?” 4Amaa Piita daa pin'il n pa'ali ba bun line daa maal hale pin'ilugin sa ye, 5“M daa bene Joppa teŋin n sosid Wina'am ka li wenne zaansuŋ ne, ka m nye ka si'el sigid na n wenne pientita'ar ne n lo luas anaasi yi arazana ni n sigid na n paae mam be si'el la. 6Ka mam gosid li la, m nye yinkonbid ne sian'arkonbid ne bunvuuda ne niis. 7Ka m wum kukor ka li yel ye, ‘Piita, duom kuu li n di.’ 8“Amaa ka m yel ye, ‘Ayei, Zugsoba, bun line kis ka a dian'ad nam pu kpen' m noorine.’ 9“Ka kukor la lem pian' tisi m yi arazana ni ya'as ye, bun lin ka Wina'am yel ye li a bunsuŋ la m mit ka m yel ye li kis. 10Ne'eŋa daa niŋ ne ala noor atan', ka ba lebis li wusa arazana ni ya'as. 11“Saŋkan la ka nidib atan' ban ka ba daa tum m sa'an na la yi Sizerea teŋin n paae yir kan ka m daa be la. 12Ka Wina'am Siig Suŋ la yel m ye m doli ba n keŋ ka da bi'ese. Ka yadda niŋidib ayuobu bama biel m ka ti keŋ kpen' dau la yin. 13Ka dau la yeli ti on daa nye malek la ka o zi'e o yin ka ye o tum Joppa teŋin n buol Simon Piita na. 14Ka on na tu'as o labaar kane na tilig o ne o yidim wusa. 15“Ka man pin'il ye m pian' la ka Wina'am Siig Suŋ la sigi ba zutin na, wuu lin daa niŋ tinam si'em pin'ilugin la. 16Ka m tienn Zugsob la daa yel ye, ‘Joon daa suud nidib ne ku'om amaa ba na suu ya ne Wina'am Siig Suŋ.’ 17Alazug Wina'am sadigim tisi ba piini kan ka o daa tisi ti la, tiname daa niŋ Zugsob Yesu Kiristo yadda la, mam aa ano'one na ki'is Wina'am?” 18Ban wum ne'eŋa la ka sin, ka lee du'osid Wina'am yu'ur su'uŋa n yet ye, “Alazugo Wina'am me tis nimbane ka' Jew dim buudi la suer ka ba na tiake ba sunya ka nye nyovur.” 19Ka bane daa widig n keŋ zin'ig wusa ban nye namisug bedego Sitivin yela nya'aŋ la, ba daa keŋ hale n paae Fonisia ne Saipuros ne Antiok teensin n moon Wina'am labaar la n tisid Jew dim buudi gullim. 20Amaa dap sieba bane daa yi Saipuros ne Sairene so'olim daa keŋ Antiok teŋin n tu'as ne Greek dim ka mool Zugsob Yesu labaar la n tisi ba. 21Ka Zugsob la paŋ daa bee ba sa'an. Ka nidib bedego niŋ Zugsob yadda ka fendigi dol o. 22Wina'am nidib bane be Jerusalem la n wum labakaŋa nwa, ka tum Barnabas Antiok teŋin. 23Ka on paae n nye Wina'am bareka la, li niŋ o malisim hale. Ka o sa'ali ba wusa ye ba kpelim dol Zugsob ne sida ka da basi. 24O daa ane ninsuŋ ka Wina'am Siig Suŋ ne yadda niŋir bee o ni bedego. Ka nidib bedego me niŋ Zugsob la yadda. 25Ka Barnabas babes Saul Tarsus teŋin. 26Ka on nye o la o dol o leb Antiok na. Ka yuum mum wusa, ka ba la'ased ne Wina'am nidib la n pa'an nidib bedego. Antiok ni ka ba daa kieb n buon nya'andolib la ye Kiristo nidib. 27Saŋkan ni ka Wina'am nodi'esidib daa yi Jerusalem n keŋ Antiok. 28Ka ba nid yinni yu'ur buon Agabus. Ka o due n zi'e n tu'as yel kane be tuon sa yel ne Wina'am Siig Suŋ paŋ ye, ko'omtita'ar na ti lu dunia wusa zug. Li daa niŋne na'ab Klaudius zumaana ni. 29Ka nya'andolib la siak ye, so' wusa yiisim on mor si'el o paŋ ben n tis, ka li suŋ yadda niŋidib bane be Juuda so'olim ni. 30Ka ba daa niŋi ala, ka zaŋi li n niŋ Barnabas ne Saul nu'usin ye ba kem n tis yadda niŋidib kpeenmnam bane be Juuda so'olimin la.

will be added

X\