TUUMA 10

1Dau so' daa be Sizerea, ka o yu'ur buon Konelus. O daa ane sogianam kobuga kpeenm ka ba buoni ba ye Itali sogianam. 2O daa ane ninsuŋ ka pu'usid Wina'am, on ne o yidim wusa, ka suŋid Jew dim bane a noŋ dim, ka pu'usid Wina'am daar wusa. 3Ka nintaŋ gbi'ir win ka li wenne zaansuŋ ne, ka o nye malek nyain. Ka malek la yi Wina'am sa'an n kpen' o sa'an n buol o ye, Konelus. 4Ka on nye malek la ka dabiem kpen' o ka o yel ye, “Naa, wala?” Ka o lebis n yel o ye, “Fu Wina'am sosug ne fu tuumsuma la paae Wina'am sa'an, n tienn Wina'am fu yela. 5Tum nidib Joppa teŋin ka ba mor Simon Piita na. 6O signe Simon one a gbanzab la yin. Ka o yir kpi'ene ateuk la.” 7Ka malek la n tu'as o naae ka keŋ la, ka Konelus buol o tumtumnib ayi ne sogiasuŋ yinni, one be bane tum o tuuma la sa'an, 8ka tu'asi ba si'el wusa n naae, ka tumi ba Joppa teŋin. 9Ka beog nie ka ba be sueren n li'el teŋ la, ka Piita du doog zug nintaŋ soos ye o sos Wina'am. 10Ka o ko'om daa zabid ka o bood diib ye o di. Ban nam be anina n maan diib la, ka li wenne o zaansim ne. Ka o nye 11ka arazana yo'og, ka si'el wenne pientita'ar ne n lo li luas anaasi sigid dunia ni na. 12Ka bunkonbid wusa la'am ne bunvuuda ne niis buudi wusa bee li poogin. 13Ka o wum kukor ka li yel ye, “Piita, duom kuu li n di.” 14Amaa ka Piita lebis n yel ye, “Ayei, Zugsoba, m nam zi' di line kisa ka a dian'ade.” 15Ka kukor la lem yel o ya'as ye, “Bun lin ka Wina'am maal su'uŋa la, mit ka fu ye li kisa.” 16Ka li niŋi ala noorimbutan', ka yu'un leb arazana ni. 17Ka Piita daa bi'esid o poten'erin bun lin ka o nye la gbin. Ka bane ka Konelus daa tum la, bu'os Simon yir zin'ig n kena zi'e yaŋirin, 18ka buol n bu'os ye ba baŋ ye Simon Piita la sig ne anina bee? 19Ka Piita nan ten'esid lin ka o nye yela la, ka Wina'am Siig Suŋ yel o ye, “Gosima, dap atan' bood uf. 20Duom sig n bieli ba ka da bi'esida; ka mane tumi ba na.” 21Ka Piita sig teŋin n keŋ dap la sa'an n yeli ba ye, “Mane la ka ya bood la. Ya ken labaar a bo?” 22Ka ba yel o ye, “Konelus on a sogianam kobuga kpeenm, ka a ninsuŋ n pu'usid Wina'am, ka Jew dim so'olim wusa pian'ad o yel su'uŋa la, ka Wina'am daa tum o maleksuŋ o sa'an n sa'al o ye, o tum buol uf na ka fu na tu'as o fun mor si'el.” 23Ka Piita di'e ba. Ka ba gbeenn o sa'an. Ka beog nie ka o due n doli ba. Ka yadda niŋidib sieba ban be Joppa la biel o n keŋ. 24Ka daba ayi daar ka ba paae Sizerea teŋin. Ka Konelus daa guri ba ka buol o du'adib ne o zuanam n la'as. 25Ka Piita n kpen'ed la ka Konelus tu'os o n igin o tuon n pu'us o wenne Wina'am. 26Amaa ka Piita due o ka yel ye, “Zi'enim, ka mam me ane dau wuu fun a si'em la.” 27Ka ban pian'ad ne taaba la ka kpen nye ka nidib bedego la'as taaba. 28Ka o yeli ba ye, “Ya meŋ mi' ye Jew dim kis ne ban na la'as ne nid so' one a buud zoŋ, bee ba kpen' o yin. Amaa Wina'am pun pa'al man ye m da buol nid ye o a dian'ad daana. 29Alazug ka fu tum buoli m ka m pu zan'ase, ka kena. Bo yela ka fu tum buoli ma?” 30Ka Konelus lebis n yel o ye, “Dabisa anaasi nwa gaad saŋkaŋa nwa win, ka m daa be yin n sosid Wina'am. Ka dau so' ye fuug ka li nie nyain n zi'e m tuon, 31ka yel ye, ‘Konelus, Wina'am wum fu sosug la, ka ten'es tuumsuma ban ka fu maan la. 32Dinzugo tum Joppa teŋin n buol Simon Piita na. O sig ne Simon yin, one a gbanzab ka o yir kpi'e ateuk la.’ 33Alazug ka m tum yimmo, ka fu maal su'um ka kena la. Ti wusa be Wina'am tuon kpela ye ti wum bun lin wusa ka Zugsob la yel ye fu tu'asi ti la.” 34Ka Piita ya'ae o noor n yel ye, “Yelmeŋir, m baŋ ye Wina'am pu gaansid nidiba. 35Amaa ye buudi wusa ni so' ya'a pu'usid o ka maan line a su'um, on daana paae o ya'am. 36Ya mi' labaar kan ka Wina'am tum Israel dim sa'an n moon sumalisim labasuŋ la Yesu Kiristo ma'asim zug, one a ti wusa Zugsob. 37Ya mi' tuum kane daa pun maal Juuda teŋin wusa la yela. Li daa pin'il ne Galilee teŋin Joon n daa moon ku'om suub yela la nya'aŋ. 38Ya mi' Yesu one yi Nazaret la yela, Wina'am daa tis o Siig Suŋ ne paŋ si'em ka o daa keŋ zin'ig wusa n tum tuumsuma, ka ma'ed ban wusa ka Sutaana daa namisid la. Ka Wina'am daa be o sa'an. 39“Ti nye bun lin wusa ka o tum Jew dim teŋin ne Jerusalem la. Ba daa ya'al o dapuudir zug n kuu o. 40Amaa Wina'am daa due o dabisa atan' daar la, ka ke ka o nie o meŋ paalo ni, 41tinam bane ka Wina'am daa gaŋ la sa'an. Ka ti tu'asid nidib bun lin ka ti daa nye la, tinam bane la'am di ka nu ne o la, o ku'um vu'ugir nya'aŋ la. O lee daa pu nie o meŋ nidib wusa sa'ane. 42O yeli ti ye ti moolim yel nidib ye on ka Wina'am zaŋ n zi'el ye o kat bane voe ne bane kpi la saria. 43Wina'am nodi'esidib la wusa da tu'as o yela, ye on mekama niŋ Yesu yadda, Wina'am na yiis o daana tuumbe'ed n bas o yu'ur poogin.” 44Piita n nan kpelim tu'asid ne'eŋa la, ka Wina'am Siig Suŋ la sig ban wusa wum pian'ad la zutin. 45Ka Jew dim yadda niŋidib bane kenn ne Piita la na lidig ne ban nye ka Wina'am tisid nimbane ka' Jew dim buudi la o Siig Suŋ la, 46ne ban wum ka ba pian'ad teŋzuŋ pian'ad n du'osid Wina'am yu'ur la zug. 47Ka Piita yel ye, “Nimbama nwa di'e Wina'am Siig Suŋ la wenne tinam daa di'e si'em la. Ka ano'one na kadi ba Wina'am ku'om suub di'ere?” 48Ka o yeli ba ye ba di'em ku'om suub ne Yesu Kiristo yu'ur. Ka ba sos Piita ye o kpelim ba sa'an dabisa bi'ela.

will be added

X\