TUUMA 1

1Teofilus, m daa yel uf m yiiga gbauŋ la poogin Yesu n daa pin'ili tum ka pa'al nidib si'el la wusa, hale 2n ti paae daar kan ka Wina'am zaŋ o n du arazana ni la. O daa mor Wina'am Siig Suŋ la paŋ ka pa'al Tumtumnib bane ka o daa gaŋ la ban na tum si'em. Ka Wina'am naan zank o n du arazana ni. 3Yesu namisug nya'aŋ la dabisa piisnaasi poogin, ka o nie o meŋ n pa'ali ba la, ka tum tuumnyalima bedego line pa'al ye o voe. Ka ban nye o la o tu'asi ba Wina'am na'am la yela. 4Ka ban la'as ne Yesu n dit la, ka o tisi ba noor ye, “Da yi Jerusalem nii, ka gur Wina'am Siig Suŋ one a o piini kan ka m da yel zi'el la. 5Ka Joon daa suudi ya ne ku'om. Amaa li ku yuuge ka man na suu ya ne Wina'am Siig Suŋ.” 6Ka tumtumnib la la'as taaba ne Yesu ka bu'os ye, “Zugsoba, fu na lem lebis Israel dim na'am la nannanna n tisi ba?” 7Ka Yesu yeli ba ye, “Ya ba'a kae' ka ya baŋ saŋa ne dabisa ban ka m Ba' Wina'am da zi'el ne o meŋ paŋ la. 8Amaa ya na di'e paŋ, Wina'am Siig Suŋ la ya'a keenn ya sa'an na, ka ya na tu'asi m yela Jerusalem ne Juuda ne Samaria ne dunia ben wusa.” 9On tu'asi naae la ka ba gosid o, ka Wina'am zaŋ o n dut ka saŋgbana ligil o. 10Ka ban nam kpelim gosid saa agol la, ka dapa ayi ye fupiela n zi'e ba sa'an, 11ka bu'osi ba ye, “Galilee dima, bozug ka ya zi'e n gosid agole? Yesu one yi ya sa'an n ken arazana ni la, o na ti leb na wuu yaname n nye o ka o keŋ si'em la.” 12Ka o Tumtumnib la yi Olives Zuerin n leb Jerusalem. Li pu lal ne Jerusalem. 13Ka ban paae Jerusalem la, ba du girimbiisa line a ba yir sigidirin. Ka bane daa be ani la daa a Piita ne Joon ne Jemes ne Andrew ne Filip ne Tomas ne Bartolomew ne Mateo ne Jemes one a Alfeus biig la ne Simon Zealot ne Judas one a Jemes biig, 14bama wusa ne po'ab ne Meeri Yesu ma ne Yesu pitib daa la'ased ne taaba n sosid Wina'am ne ba ya'am wusa. 15Ka dabisa bama ka yadda niŋidib la daa la'ased taaba ka ba kal a wuu kobuga ne piisi. Ka Piita due n zi'e ba sisoogin n yel ye, 16“M zuanama, li ane tilas Wina'am gbauŋ pian'ad kan ka o Siig Suŋ da pun yel ka li yi na'ab David noorin la lieb ameŋa ne Judas niŋ si'el la yela. 17O daa gaad tuon n dol nidib bane keŋ n gban'e Yesu la. O daa ane ti tumtum tiraan ka Wina'am gelig o la'as ne ti.” 18(Dau kaŋa nwa daa da' poog ne o tuumbe'ed yood. O daa lu teŋin anina, ka o poor pusig, ka o nyood wusa yi. 19Ka Jerusalem teŋ nidib la wusa n wum la, ba pud poog la yu'ur ne ba pian'ad ye Akeldama. Li gbin ane Ziim Poog.) 20Ka Piita ye, “Li sobne Wina'am yuuma gbauŋin ye, ‘Kel ka o yir na yo damzuunr, ka nidib ku lem be aninaa.’ Ka lem sob ye, ‘Kel ka so' di'e o tuuma tum.’ 21- 22“Alazugo li su'um ye nid yinni pa'asi ti ni. O a one daa nye ti Zugsob Yesu ku'um vu'ugir yela. Li su'um ka o ane one n daa pun bee ti sa'an saŋa wusa ti Zugsob Yesu daa goond ne ti, lin pin'il ne Joon n daa suud nidib ku'om la, n ti paae saŋkan ka Yesu daa yi ti sa'an n du arazana ni la.” 23Ka ba yiis nidiba ayi. Ka ayinni yu'ur buon Josef one ka ba lem buon ye Barsabas ka lem buon Justus. Ka ayinni la yu'ur buon Mattias. 24Ka ba sos Wina'am ye, “Ti Zugsoba, fun mi' ninsaalib poog. Pa'alimi ti nidiba ayi nwa fun gaŋ so' 25ye o di'e Judas zin'ig n tum tumtumnib la tuuma lin ka o bas ka keŋ o meŋ zin'igin la.” 26Ka ba bugulim ka li lu Mattias zugin ka ba zaŋ o la'as Tumtumnib piina yinni la kalin.

will be added

X\