3 JOON 1

1Man one a kpeenm n sobid ne'eŋa n tisid fun Gaius, on ka m sid noŋ ameŋa la. 2M zua noŋire, m sos Wina'am ye fu si'el wusa na a su'um, ka fu na be laafe, ka mi' ye fu siig mor laafe Wina'am tuon. 3Li daa malisi m bedego ti zuanam sieba daa paae na ka yel fun dol yelsida la su'uŋa si'em la. Ti mi' ye fu beilim wusa fu a yelsida daan. 4Si'el pu niŋi m malisim gaad man wum ye m biis dol yelsida laa. 5M zua noŋire, fun a yelsida sob la, ne fun niŋ si'el n suŋ yadda niŋidib la hale la'am ne ban a saam la. 6Ba tu'asi fu noŋilim yela n tis Wina'am nidib bane be kpela. Suŋim ba ka ba keŋ tuon. Kel ka fun suŋi ba si'em la malis Wina'am. 7Bozugo Kiristo tuuma yela, ka ba yi ken, ka zan'as suŋir din ka nidib bane pu dol Kiristo la bood ye ba tisi ba la. 8Dinzugo li su'um ka ti suŋ ti tumtum taaba bama nwa ka ba mool sida pian'ad la n tis nidib. 9M daa sob si'el n tis Wina'am nidib bane bee fu teŋin la. Ka Diotrefes one bood ye o niŋi ba tuongat la pu siak man sob si'el la. 10M ya'a kena m na tu'asi ya on tum si'el ka ma'ad tisidi ti la. Ka lin pu sia'al oo. O me zan'as ti taaba di'er ka vi'id bane bood ye ba di'e ba, ka kadi ba yiis Wina'am nidib sa'an. 11M zuasuŋ, da tu'as line a bun be'ede. Tu'asim line a su'um. On mekama tum dine a su'um ane Wina'am nid. On mekama tum dine a bunbe'ed pu mi' Wina'am. 12So' wusa pian'ad Demetrius yela su'um, hale yelmeŋir dim la me pian'ade o yela su'um. Ka tinam me di o yelsida kaset. Ka fun meŋ mi' ye ti kaset la a sida. 13M mor pian'ad bedego na yel uf, ka pu bood ye m sobi niŋ gbauŋine, 14ka ten'es ka m na kena kaae uf dabisa ayi nwa ni, ka ti pian'a tis taaba. 15Sumalisim be ne uf. Fu zuanam wusa pu'usid uf. Pu'usimi ti zuanam yinni yinni tisi ti.

will be added

X\