2 TIMOTI 3

1Baŋim ne'eŋa. Li na toe hale n tis Wina'am nidib, dunia naar saŋa la, 2nidib na a bane noŋi ba meŋ, ne bane noŋ ligidi hale, ne bane nwe'edi ba nyo'og, ne bane mor nyeesim, ne bane tu'ud nidib, ne bane pu siakid ba saamnam ne manam noya, ne bane pu mor bareka pu'usum, ne bane pu dol Wina'am suere 3ne bane pu noŋ ban la'am kpin sieba, ne bane pu mor so' nyoogo, ne bane sa'ami ba taaba yuda ne bane pu gban'adi ba meŋa, ne bane ka ba taaba zoti ba dabiem, ne bane kis line a su'um, 4ne filim filim dim, ne haya dim, ne tita'alnam ne bane bood line na ma'edi ba meŋ sunya n gaad Wina'am la. 5Ba niŋidne wuu ba dolne Wina'am suer, amaa ka pu pa'ani li paŋa. Zan'asim nimban nam buudi. 6Ka ba sieba sua'adi kpen'ed yaani ma'ad po'ab bane ka' ya'am, ka tuumbe'ed pe'eli ba, ka ba ya'amleog nyaŋedi ba, 7ka ba kelisid so' mekama ka ku nyaŋe baŋ line a sida laa, 8ka li wen wuu Jannes ne Jambres da zan'as Moses si'em la. Ala men ka nimbama me zan'asid sida la, bane ka ba tuumbe'ed sa'ami ba ya'am, ka ba pu niŋ Yesu Kiristo yadda ne sidaa. 9Amaa nidib wusa na nye ka ba ane zon wuu Jannes ne Jambres ka ba tuuma ku keŋ tuone. 10Fu mi' m pa'alug la wusa ne m tuuma niŋir ne m beilim poten'er, ne m yadda niŋir, ne suguru ne m noŋilim ne m modigir, 11ne m namisug Yesu dollim yela, ne m fara. Fu mi' line niŋi m Antiok teŋin, ne Ikonium teŋin, ne Listra teŋin, ne ban namisi m si'em Yesu yela la. Ka Zugsob la faann m ne'eŋa wusa ni. 12Asida ka m ye bane wusa n bood ye ba dol Wina'am n a yinni ne Yesu Kiristo, ba na namisi ba. 13Ka nimbe'ednam ne zam dim tuumbe'ed na kpelim pe'esid hale, n ma'ad nidib ka ba kpen'esidi ba meŋ dama'amin. 14Amaa fu nee, kpelim tenr lin ka fu zamis ka siak la kiŋ kiŋ; 15ka fu mi' bane sa'an ka fu zamisi li. Ka fu biilimin sa fu baŋ Wina'am gbauŋ su'uŋa line na nyaŋe tis uf ya'am ye fu niŋ Yesu Kiristo yadda ka nye faangir. 16Ka Wina'am gbauŋ wusa yine o sa'an na ka suŋidi ti n tisidi ti popielim pa'alug ne sa'alug line bigisid be'ed ne su'um ne zamisug wusa. 17Dau kane dol Wina'am na naae o zamisug, ka ti'eb ne tuumsuŋ wusa.

will be added

X\