2 TIMOTI 2

1M biiga, kpe'eŋim fu meŋ ne popielim piini line be Yesu Kiristo ni la. 2Ka fun wum si'el mam sa'an nidib bedego tuon la, tolisimi li tis yelsida dim bane na tun'e pa'al sieba men. 3Di'em namisug line a fu din, fun a Yesu Kiristo sogia la zug. 4One tum sogia tuuma ba'a kae' ne bane ka'a sogianam yela nii, amaa o bood ye o ma'ae o kpeenm la sunf. 5Ka so' ya'a bood ye o di ya'an di'ema zin'igin, o ku nyaŋe di'e piini asee ka o dolis di'ema la wada suer. 6Li nar ka kpaad suŋ one tum tuuma hale deŋim di'e o zuud la nyood. 7Ten'esimi mam yel si'em la, ka Zugsob na ke ka fu baŋ si'el wusa gbin. 8Ten'esim Yesu Kiristo yela, one da vu'ug kumin la, one da a na'ab David yaaŋ wen wuu labasuŋ kan ka m moon la yet si'em la. 9Labasuŋ kaŋa zug ka m namisid ka ba gba' m ne bana wen wuu tuumbe'ed sob ne. Amaa Wina'am pian'ad la pu gba' ne bana. 10Ne'eŋa zug ka m modigid si'el wusa ni ye bane ka Wina'am gaŋ la me nye faangir line be Yesu Kiristo ni la, la'am ne na'asi line ka' naare. 11Yelmeŋir nwa ye, “Ti ya'a la'am kpi ne o, ti me na voe ne o. 12Ka ti ya'a modig, ti me na mor na'am ne o. Ti ya'a zan'as o, o me na zan'asi ti. 13Ti ya'a ka' yelsida dima, o na kpelim a yelsida sob, bozugo o ku tiake o meŋ a si'em laa.” 14Tienmi fu nidib la ne'eŋa, ka sa'ali ba Zugsob la tuon, ka ba da mor noŋgban nwa'ar pian'ad yelaa, line pu tum su'um ka kulim sa'amidne bane wum la. 15Kpe'eŋim ka fun noki fu meŋ n tis Wina'am ka fu tuuma paa Wina'am ya'am, ka me a one pu zot nyan ne o tuuma, ka sid pa'an pian'ad line a yelsida la. 16Zan'asim pian'ayood line pu dol Wina'am suere; ka li na kpen'es nidib suebe'edin ka ba suebe'ed dolim la na ke ka ba zan'as Wina'am yela. 17Ka ba pian'ad la, na wen wuu fen'ekudugu onbid niŋgbiŋ yaligid si'em la. Ka pa'aniba ayi bee ba soogin, ka ba ane Himeneus ne Piletus, 18bane bas yelsida la suer ka yet ye ku'um vu'ugir la gaadeya sa, ka me sa'amid ninsieba yadda niŋir. 19Amaa Wina'am eenbkpi'uŋ la zi'e kiŋ kiŋ, ka o zanbin la sobne anina ye, “Zugsob la mi' bane a o nidib,” Ka lem sob ye, “Bane wusa sid ye ba ane Wina'am nidib la, basimi ba tuumbe'ed.” 20Yir tita'ar pu mor salima bee anzurifa la'ad ma'aa ne, amaa daad ne ya'ad bunam me be, ka ba yiisid sieba dabis suma daar, ka sieba me a daar wusa tuuma la'ad. 21Ka so' ya'a pie o meŋ wuu ban pied la'ad la si'em la, o na lieb tuumsuma lauk, line ka ba gaŋ ka li nar ye yidaan noki li tumi o tuumsuŋ si'a. 22Zan'asim dasam boodim line a be'ed ka kpe'eŋ ne nimmua ye fu a yelsida sob ka mor yadda niŋir ne noŋilim ne sumalisim, la'am ne bane pu'usidi ti Zugsob ne popielim la. 23Zan'asim yalim bu'osyaalis ka fu mi' ye li more zaba. 24Mit ka Zugsob tumtum a one noŋ zaba. Amaa o na'asim nidib wusa ka a pa'ansuŋ ka me mor suguru, 25ka nok ya'am sa'al ne o dataas, ka daasi'ere Wina'am na ke ka ba tiak ka baŋ yelsida la, 26ka luak Sutaana bendugun la line ka o deŋi bend ye ba tumi o boodim la.

will be added

X\