2 TIMOTI 1

1Man Paul one ka Wina'am boodim ke ka m a Yesu Kiristo Tumtum ka li dol nyovur nozi'elug line be Yesu Kiristo sa'an. 2M sobid gbauŋ kaŋa tisid Timoti one liebi m binoŋir la. Ti Ba' Wina'am ne ti Zugsob Yesu Kiristo na tis uf yelsum ne nimbaanlzoor ne sumalisim. 3M pu'usid Wina'am bareka one ka m dol ne popielim wenne m yaaname da dol si'em la. Saŋa wusa m ten'esidi ya yela m Winsosugin. 4M pu tami fu susa'aŋ la yela, ka bood hale yu'uŋ ne nintaŋ wusa ye m nye uf ka mor sumalisim. 5M tenri fu yadda niŋir ameŋa la line deŋi be fu yaapo'a Lois ni ka me be fu ma Yunis ni la. M mi' ye li me be fu ni. 6Lin la ka m tiend uf ye fu ke ka Wina'am piini line be fu sunfin la, ka o da tis uf saŋkan ka m da pa'al m nu'usi fu zugin la maligim nie. 7Ka Wina'am tisi ti o Siig Suŋ ye ti mor paŋ ne noŋilim ne meŋ gban'ar ka ka' ye ti zo dabiem. 8Dinzugo da zot nyan ye fu yel line ka fu mi' ti Zugsob yela, ka me da zot nyan ne mam one a sarega nidi o yela laa, amaa me di'em namisug line aa fu din labasuŋ la yela, ka tia' ne Wina'am paŋ, 9one faann ti ka buoli ti ye ti a o ninsuma la, ka li ka'ane tiname tum si'el la zugo, amaa li ane o meŋ boodim ne o popielim piini line ka o tisi ti Yesu Kiristo ni, yuma bane gaad ka dunia nam pu pin'il la. 10Ka popielim piini la yu'un nie nyain Yesu Kiristo lebigin la, one faann ti ka sa'am ku'um paŋ, ka ke ka ti nye nyovur line ka kum kae', ka li yi Wina'am labasuŋin la na. 11Labasuŋ la yela ka o gaŋi m ye m a Kiristo Tumtum la ne one pa'an ka lem mooni li. 12Ka yelkaŋa zug ka m namisid amaa m pu zoti li nyan ne; ka m mi' one ka m niŋ o yadda, ka mi' ye o na nyaŋe guri line ka o gu'uli m la su'uŋa, n ti paae Wina'am saria kadib daar la. 13Dolisim pa'alsuŋ line ka m pa'al uf la ne noŋilim ne yadda niŋir line be Yesu Kiristo ni la. 14Guri yelsida line ka Wina'am Siig Suŋ gu'ul uf la, one be ti ni la. 15Ya pun mi' ye, bane be Asia la wusa basi m ne, ka Pigelus ne Hermogenes a nimbane bee ba soogin. 16Ti Zugsob na zo Onesiferus yidim nimbaanlig ka o yiti kaadi m ka m sunf ma'ed, ka pu zot nyan ne ban loo m ne baans laa. 17Ka on paae Room na la, o ia man ne nimmua ka nye m. 18Saria kadib daar la ka Zugsob na zo o nimbaanlig. Ka fu pun mi' suŋir kan ka o suŋim Efesus teŋin la.

will be added

X\