2 TESALONIKA DIM 3

1Ba'asugo, ti ba'abiise, sosimi Wina'am tisi ti, ye ti Zugsob labaar la na kpelim yadigid to'oto ka nye na'asi wuu lin daa niŋ yanam ni si'em la. 2Ka sos o ye o na faann ti nimbe'ednam sa'an, ka li ka' nidib wusa siak Wina'am labaar laa. 3Ka Zugsob la lee a yelsida daan, ka na tisi ya paŋ ka guri ya, ka Sutaana da nyaŋe yaa. 4Ka Zugsob la ke ka ti mi' ya poog, ka mi' ye ya niŋid tiname yeli ya si'el la, ka na kpelim niŋid ala. 5Ti sosid Zugsob la ye o na ke ka ya sunya noŋ Wina'am, ka ya modig wuu Kiristo modig si'em la. 6Ti ba'abiise, ti yeli ya ne ti Zugsob Yesu Kiristo paŋ ye ya basi ya ba'abiis sieba bane zin'i ka mor gbanya'am, ka pu dol pa'alug kane ka ti tisi ya laa. 7Yanam meŋ mi' su'uŋa ye li nar ka ya tu'as tinam daa tum si'em la. Tinam daa be ne ya la, ti daa ka' gbanya'anama, 8ka pu dit so' diib zaalim ka pu yoo, ka lee tum bedego nintaŋ ne yu'uŋ, ka ti yela da daami yaa. 9Ti daa niŋid ala, ka li ka' ye ti pu mor li suere, ka lee ane ye ya nye tinam tum si'em la ka tu'asi li. 10Tinam daa nam be ne ya la, ti daa yeli ya ye, “One pu tum, on da dii.” 11Ti wum ye sieba be ya sa'an n zin'i ka mor gbanya'am ka kpen'ed nidib yela ni, ka pu tum na. 12Linzug ka ti yel nimbama, ka sa'ali ba ne Zugsob Yesu Kiristo paŋ ye ba tum ba tuuma baanlim, ka diisi ba meŋ. 13Ti ba'abiise, da genn ka bas tuumsuma maalugo. 14So' ya'a zan'as ka pu siak line ka ti yeli ya gbauŋ kaŋa ni laa, yanam baŋim o, ka luak ne o ka ke ka nyan di o. 15Da niŋ o wuu o ane ya dataa, ka lee sa'al o wuu ya ba'abiig. 16Ti Zugsob one a sumalisim daan la na tisi ya sumalisim saŋa wusa ne si'el wusa ni, ka na be ne ya wusa. 17M sobid ne m meŋ nu'ug ye, man Paul pu'usidi ya. Anwa ka m sobid ka zanbin m gbana ni wusa. 18Ti Zugsob Yesu Kiristo yelsum na be ne ya wusa.

will be added

X\