2 TESALONIKA DIM 1

1Man Paul ne Silvanus ne Timoti sobid gbauŋ kaŋa n tisid yanam Wina'am nidib bane be Tesalonika teŋin la n be ti Ba' Wina'am ne Zugsob Yesu Kiristo ni la. 2Ti Ba' Wina'am ne ti Zugsob Yesu Kiristo na tisi ya yelsum ne sumalisim. 3Ti ba'abiise, yanam yadda niŋir ne ya yinni yinni noŋilim ne taaba n nobugid bedego la zug, ka li nar ka a su'um ye ti pu'us Wina'am bareka saŋa wusa ya zug. 4Ka linzug ka tinam meŋ nwe'ed nyo'og ya yela Wina'am nidibi la'ased zin'ig si'a wusa. Ti nwe'ed nyo'og ya modigir ne ya yadda niŋir ne Wina'am, mugusug ne namisug line paadi ya la zug. 5Lina pa'al ye Wina'am kad saria ne yelsida ye o maali ya ka ya nar ne ya nam be o so'olimin la, ka li ane yanam be o so'olimin la zug ka nidib namisidi ya. 6Wina'am ane sida daan ka na namis bane namisidi ya la, 7ka ke ka yanam bane namisid la vu'us ne tinam, saŋkan ka Zugsob Yesu na ti yi arazana ni leb na, ka kena ne o malek bane mor paŋ tita'ar la, ne bugum pielim 8ka namis bane zi' Wina'am ne bane pu siak ti Zugsob Yesu labasuŋ la. 9Ba na di'e namisug line a sa'uŋ ka ka' naare ka na yi Zugsob la sa'an ne o na'am paŋ tita'ar la ni daar kan ka o na kena la. 10Saŋkan la ka ti na nye o, ka o na be o meŋ nidib ne bane wusa niŋ o yadda la ni. Ka ti na tis o na'asi. Bozugo yanam meŋi siak ti labaar la ka ya na ti bee ba sa'an. 11Linzug ka ti sosid Wina'am tisidi ya saŋa wusa ye o na ke ka ya nar ne yanam be o so'olimin la. Ka me sos o ye o paŋ na tisi ya popielim wusa line ka ya mor ya'amleog la, ka ke ka ya yadda niŋir tuuma na tum paae li ben, 12ye ti Zugsob Yesu bee ya ni ka yanam me bee o ni. Ka ya zan'asa na nye zun'or. Li wusa yine Wina'am ne Zugsob Yesu Kiristo ni na.

will be added

X\