2 PIITA 3

1M zuanoŋa, ne'eŋa a m gbauŋ kane pe'esi ayi ka m sobi tisi ya. Gbana ayi la ni ka m bood ye m tienn ya line ka ya deŋim baŋ la ka nie ya poten'er soma. 2M bood ye ya tenr pian'aban ka Wina'am nodi'es soma da deŋim pian'a yumpokuda la, ne ti Zugsob one aa ti Faangid la noyelug kan ka o Tumtum bane ka o tum ya sa'an la da pian'a la. 3Ka yiiga line nar ka ya baŋ ane ye dunia naar saŋa la, zamdim na ti kena ka pa'an dine dol ba meŋ ya'amleog boodim. 4Ba na yel ye, “Yesu n daa yel noore zi'el ye o na leb na la be yaani? Hale ka ti yaanam ti kpi n ti paae saŋa nwa, si'el mekama kpelim nan ane ala wuu dunia pin'ilugin da a si'em la.” 5Ba maali pon'osim n tam ye li yi ne Wina'am pian'adin la ka o da maal saazug kudumin sa ka ke ka teŋ yi ku'omin ka lem ke ka ku'om maale li. 6Ne ku'okan la ka dunia line da pun be sa la, ka li uak n sa'ami li. 7Ka Wina'am kan zi'el noor ye dunia ne saazug line kpelim be la, gur ye bugum ti sa'ami li la'am ne tuumbe'ed dim la. 8M zuanoŋa, da tami yel sida kaŋaa, ye Wina'am poten'erin daar yinni wenne yuma tusir ne, ka yuma tusir me wen wuu daar yinni ne. 9Wina'am pu bugis ne line ka o yeli zi'el wuu sieba ten'esid si'em laa, amaa o niŋidi ya ne suguru, ka pu bood ye so' sa'am, ka lee bood ye so' mekama tiake o tuumbe'edin. 10Ka Zugsob la ken daar la na wen wuu na'ayiigi ken si'em la ne. Ka saazug na gaad naae ne vuud hale, ka bugum na kanb si'el wusa. Dunia ne bun line be li ni wusa me na dig zaalim. 11Ka ne'enam wusa sadigim na sa'am la, li nar ka ya beilim na a wala? Asee ka ya pesigi ya meŋ n tis Wina'am ka doli o suer, 12ka guri Wina'am ken daar la ka kpe'eŋi ya meŋ n tum ye li niŋ to'oto. Daakan la ka bugum na kanbi sa'am saazug ne dine be dunia ni wusa. 13Ka ti guri Wina'am n zi'el noor si'a la ye, “Saazug paal ne dunia paal na be, ka ani a popielim teŋ.” 14M zuanoŋa, yaname sadigim guri ne'enam yela la, kpe'eŋimi ya meŋ ka ya a nyain ka gba'a si'a da be ya ni, ka bei ne Wina'am ne sumalisim, 15ka geligid ye Zugsob la suguru diib ket ka ya nyet faangir. Ala men ka ti ba'abinoŋir Paul daa sobi tisi ya line yi ya'am line ka Wina'am tis o la. 16O sobidne ala o gbana la wusa ni. O sobir la ni ka o yel yelsieba, ka li toe ye ti baŋi li gbin, ka bane zi' si'el la ne bane pu kpi'em ne ba yadda niŋirin la nweligi li ka li a ba sa'uŋ, wenne ban niŋid si'em ne Wina'am gbana wusa la. 17M zuanoŋa, yaname pun deŋim mi'i li la, gu'usimi ka tuumbe'ed dim da ke ka ya yidig bee basi ya yadda niŋir laa. 18Amaa ke ka Wina'am yelsum ne baŋir nobug ti Zugsob Yesu Kiristo one aa ti faangid la ni. O yu'ur na nye na'asi nannanna ne saŋa kane ka' naare. Ami.

will be added

X\