2 PIITA 2

1Ka ziri nodi'esidib me da be nidibin la wenne ziri pa'anibi na be ya sa'an la. Ba na sua' mor ziri pa'ala line ken ne sa'uŋ, hale n ti ki'isid Zugsob one da'a ba la ka li ke ka ba nye sa'uŋ to'oto. 2Ka yadda niŋidib bedego na doli ba tuumyaalis la ka line na ke ka nidib pian'ad be'edne yelsida la. 3Ba kpian'asug na ke ka ba tisi ya ziri pa'ala ye ba nye nyood. Kudumin la sa ka ba koosug pun da deŋim guri ba ka ba sa'uŋ me nie guri ba. 4Ka Wina'am da pu tis maleknam bane tum tuumbe'ed la suguru, ka lobi ba bas bugum teŋin niŋi ba bumbok zuluŋ line a zibisug guri saria kadib daar. 5Ka me pu niŋ suguru ne kudumin dima ka lee tilig Noa one da moon yelsida la ne o yidim babayopoi, saŋkan ka Wina'am da ke ka ku'om uak dunia wusa ne nidib bane pu dol Wina'am. 6Ka me koos Sodom ne Gomorra teens be'ed ka ke ka bugum dii ba, ka ba lieb tampeligim ka li a sa'alug n tis bane pu dol Wina'am suer la. 7O tilig Lot one a yelsida sob, amaa o sunf da sa'am hale ne tuumbe'ed dim ne ba tuumyaalis la. 8Lot one a yelsida sob la n da be ne ba daar wusa ka nyet ka wum ba tuumbe'ed la, ke ne ka li sa'am o popielim sunf la. 9Li ya'a a wala Zugsob la mi' on na niŋ si'em faaenn bane dol o ameŋa, ba makir puugin, ka niŋ tuumbe'ed dim la namisugin n gur saria kadib daar. 10Ka li kas kas ane bane dol dian'ad ya'amleog boodim ka ne'es Wina'am kpi'euŋ laa. Ba mor nyeesim ne tita'alim ka pu zot dabiem ne ban na tu'u bane mor paŋ n bei agol la, 11hale ka maleknam bane mor paŋ n kpi'emi gati ba la pu tu'udi bane be agol la Zugsob la tuon. 12Ka nimbama nwa lee wenne bunkonbid ne. Ba mi'ilim bee ba niŋgbiŋin ka ba pu ten'esida, ka be ne ye saalib gban'e ba ku. Ba pian'ad be'ed ne lin ka ba zi', ka na sa'am wuu bunkonbid la ne. 13Ba na nye yelbe'ed ba tuumbe'ed la yela. Ba sunya malis ne lin ka ba niŋid ka li a ba niŋgbina boodim, paalo ni. Ba ane gbada ne dian'ad dim ban di'emid ka me la'am dit ne ya la. 14Ba ya'am gban'ene po'asa'uŋ ka pu tigid ne tuumbe'ede. Ba pan'asid bane sunya pu kpi'ema, ka mi' hale ban na niŋ si'em n di'e ba fufum be'ed boodim. Wina'am po noor ne ba. 15Ba bas suesuŋ la ne ka bodig, ka dol Balaam one a Beor biig la suer, one bood tuumbe'ed yood la. 16Amaa Balaam da nye sa'alug o tuumbe'ed la yela. O buŋ pian' o ne ninsaal kukor ka ke ka o bas zolim tuuma la. 17Nimbama wenne bulnoya bane pu bun ku'om, ka wenne kpaandug line ka sisi'em da'ad. Ka Wina'am ti'eb zin'ig kane a lik tita'ari n guri ba. 18Ba mor ne pian'a yood nwe'edi nyo'od ka mor tuumyood ya'amleogo pan'asid nimbane pin'il ye ba yi nimbane ka ba beilim a tuumyood zin'igin la. 19Ba yeli ba ye ba na nye yolisim amaa ban bane yel la tum line ke ka sa'uŋ kuli ba ka ke ka ba a yamis, bozugo line mekama kul so' ket ka o liebidi li yamug. 20Ba ya'a baŋ Yesu Kiristo one a ti Zugsob ne ti Faangid la ka baŋir la yiisi ba line ket ka saalib a dian'ad dim la ka ba lem kpen'e li ni, ba beilim na maligim sa'am hale n gaad yiigin la. 21Li naani aan su'um n tisi ba ka ba pu baŋin popielim suere, n gat ban baŋi li ka lem bas Wina'am noyelug kan ka o tisi ba la. 22Li niŋi ba wuu siilis la yel si'em la ye, “Baa ya'a tinn, o lebidne dit,” ka lem ye, “Kukur kane ka ba suu o nyain la leb bian'ar nwe'ebin.”

will be added

X\