2 PIITA 1

1Man Simon Piita one a Yesu Kiristo yamug ne o Tumtum la sobid gbauŋ kaŋa tisid bane ka ti Faangid Yesu Kiristo ne ti Ba' Wina'am popielim ke ka ya niŋ o yadda, ka li a su'um ka wenne tiname niŋ o yadda si'em la. 2Wina'am na pe'esi ya yelsum ne sumalisim bedego, yaname baŋi one a ti Zugsob Yesu la. 3Wina'am paŋ la tisi ti si'el mekama line na ke ka ti be nyovur beilim line doli o suer, ka li yi ne tiname baŋ one buoli ti ye ti di'e o nyalima beilim ne o popielim la. 4Ka li yine ne'enamin ka o tisi ti o nozi'elug line a su'um hale ye ya luak sa'uŋ line be dunia ni ka yi saalib ya'ambe'ed boodimin, ka lee lieb bane a wuu Wina'am a si'em la. 5Dinzugo kpe'eŋimini ya meŋ ka popielim pa'asi ya yadda niŋir ni, ka baŋir pa'asi ya popielimin, 6ka meŋ gban'ar pa'asi ya baŋirin, ka modigir pa'asi ya meŋ gban'arin, ka Wina'am dollim ameŋa pa'asi ya modigirin, 7ka ya Wina'am dollim ameŋa pa'asi ya yelsum maalug ne ya ba'abitaaba, ka ya yelsum maalug ne ya ba'abitaaba pa'as noŋilim. 8Bozugo ya ya'a mor ne'enam wusa, li na ke ka ya kpi'em ne ya Wina'am tuuma ka li nobug ka ti baŋ Zugsob Yesu Kiristo yela. 9Ka one ka'a ne'enama wenne zunzoŋ one zi' yela ka tam ye Wina'am pun pie o tuumbe'ed la yiis nyain. 10Dinzugo m ba'abiise, kpe'eŋimi ne nimmua ka ke ka Wina'am buol ka gaŋi ya la niŋ ameŋa, ka ya ya'a niŋ ne'eŋa ya ku gu'uŋ baa bi'elaa. 11Ka ya na nye suer suŋ hale n na kpen' Yesu Kiristo one a ti Zugsob ne ti Faangid la so'olimin, lin ka li saŋa ka' ben la. 12Linzug ka m bood ye m tienn ya saŋa mekama ne yelbama, hale baa yaname pun deŋim baŋi li ka gban'e kiŋ kiŋ ne yelsida kan ka ya di'e la. 13Ka mam nam voe la, m ten'es ye li nar ka m tienn ya n laki ya ya'am, 14mam sadigim baŋ ye li kpelim bi'ela ka m niŋgbiŋ la bodig wuu ti Zugsob Yesu Kiristo pa'ali m si'em la. 15M na ke ka m ya'a ti kae' ka ya na nyaŋe tienn yelbama saŋa mekama. 16Ti pu dol solima line yi ninsaalib ya'aminee, saŋa kan ka ti yeli ya ti Zugsob Yesu Kiristo paŋ ne o ken la naa, amaa ti sid nye o na'am zu'e si'em la. 17Ka o di'e na'asi ne zun'or line yi ti Ba' Wina'am ni la, ka kukor yi Wina'am paŋ nyaluŋun na yel ye, “Oŋa a m binoŋir, one ka m sunf ma'ed ne o yela hale.” 18Ka ti la'am da be ne o zuer zug, ka wum kukor kaŋa line yi arazana ni la. 19Ka li maligim ke ka ti baŋ ye Wina'am nodi'esidib pian'ad la a sida. Li a su'um ka ya gu'usi ne yelbama; ka li wenne fitla line nie lik zin'igin n ti paae beog yiligir ka Kiristo one a nwaddar la yu'un nie ya sunya ni. 20Yelkane a yiiga ane ye ya baŋ ne'eŋa ye Wina'am nodi'esidib pian'ad line sob Wina'am gbauŋin la baa yinni pu yi ninsaal poten'erin naa. 21Li me da pu yi ninsaalib sa'an naa, amaa Wina'am Siig Suŋ ke ka ba pian' pian'ad line yi Wina'am sa'an na.

will be added

X\