2 JOON 1

1Mam one a kpeenm n sobid ne'eŋa n tisid fun po'a on ka Wina'am gaŋ la ne fu biis. M sid noŋi ya ameŋa. 2Li ane yelsida line bee ti sa'an la, ka na kpelim bee ti sa'an yuma dine ka' naar la zug, ka man ne bane wusa mi' sida la noŋi ya. 3Ti Ba' Wina'am ne o Biig Yesu Kiristo na tisi ti yelsum ne sumalisim ka zoo ti nimbaanlig, ka tisi ti o yelsida ne noŋilim. 4Li malisi m bedego man nye ka biis la sieba dol sida la wen wuu ti Ba' Wina'am da yeli ti si'em la. 5Ala m sos uf, m maa, kel ka ti noŋ taaba. Ne'eŋa ka' noor yelug paal ka m sobid tisidi yaa. Li ane noyelug kan ka ti da wum tinam da dol Yesu Kiristo pin'ilugin sa la. 6Noŋilim kan ka m pian'ad li yela la, gbin ane ye ti siakim Wina'am noyelug la wusa. Yelugkan ka ya da wum pin'ilugin sa la ane ne'eŋa ye, ya wusa noŋim taaba. 7Ziri dim bedego giligi dunia wusa, nidib bane pu siak nie paalo ye Yesu da lieb ninsaal la. Ninkan buudi ane ziri daan ka a Kiristo dataa. 8Baŋimi ya meŋ ka da sa'am lin ka ti daa tum tisi ya la, ka ya na di'e nyood wusa. 9On mekama pu dol Kiristo pa'alugo, ka paas o meŋ pa'alug, o pu dol Wina'am. On mekama dol pa'alug la, o dol ne ti Ba' Wina'am ne o Biig. 10So' ya'a keenn ya sa'an na ka pu mor pa'al kaŋa naa, yanam da di'e o ya yin ne, hale kudum da pu'us oo. 11One pu'us o na lieb ne o tuumbe'ed tiraan. 12M mor pian'ad bedego ye m yeli ya, ka pu bood ye m sobi li gbauŋin n tisi yaa. M ten'es ye m na kaae ya, ka pian'a tisi ya m meŋ. Ka ti na mor sumalisim bedego. 13Fu bier on ka Wina'am gaŋ la biis pu'usid uf su'uŋa.

will be added

X\