2 KORINT DIM 9

1Li pu len nar ka m sobi yeli ya piini lin ka ba tisid Wina'am nidib yelaa. 2M mi' ye ya mor poten'er ye ya suŋ, ka nwe'ed nyo'og ne Masedonia nidib ya yela, n yeli ba ye Wina'am nidib bane be Akaia teŋin la ti'eb ye ba suŋ yuum sa. Ka yanam mor poten'er ye ya suŋ la kpe'eŋi ba bedego sa. 3Ka m ye m tum ti ba'abiis bama ye lin ka m nwe'ed nyo'og ya yela yelkaŋa nwa ni la ku a pian'ad ma'anee, ka lee a sida, ka ya sid ti'eb ne ya piini la wuu man yel si'em la. 4Ka li ya'a ka' alaa ka Masedonia dim sieba ya'a doli m ka nye ka ya pu ti'ebe, nyan na dii ti bedego, ka m pu len yet yanam yelaa. Nyan na dii ti tiname daa ten'es ye ya na ti'eb ne ya piini la zug. 5Ka dinzug ka m gos ka li nar ka m kpe'eŋ ti ba'abiis bama ye ba gaad tuon ka deŋim ti'eb piini kan ka ya zi'el noor ye ya tis la. Ka ala ka m ya'a ti paa na, ya na pun ti'eb ne ya piini la. Ka li na pa'al ye ya tisidne ne ya boodim ka ka'ane ne mugusugo. 6Ten'esimi ne'. Niŋkane but bielim bi'ela ya'a ti bun, o ku nye bedegoo. Amaa one but bedego me ya'a ti bun, o na nye bedego. 7Keli ka ya so' mekama niŋ wuu on gban'e si'em la, ka ka'ane susa'aŋ bee so' mugusidi yaa. Wina'am noŋ one tisid piini ne sumalisim, 8ka na nyaŋe tisi ya ka li gaad yaname bood si'em. Ka ya na yiti mor yanam meŋi bood si'em la wusa, ka na nyaŋe tis piini ye ya suŋ tuumsuma wusa. 9Li dolne lin da sob Wina'am gbauŋin popielnam yela si'em la ye, “O nok piini bedego tis noŋdim, ka o popielim la na be yuma ka li ka' naare.” 10Wina'am one tisid bane but la bielim ka tisid diib ye ti di la, na tisi ya yelsum ka li zemisi ya boodim ka ke ka li nobug, ka me ke ka yanam mor si'el na tis la nobug. 11Ka ya na yiti mor bedego bedego n na tis nidib. Ka ya piini lin ka ti tolisid la, na ke ka nidib bedego pu'usid Wina'am bareka, ka li na yine tinam sa'an na. 12Suŋir kan ka ya tisid Wina'am nidib la pu suŋidi ban ma'ane, amaa li me ket ka nidib bedego pu'usid Wina'am bareka. 13Ka suŋir kaŋa pa'an yanam a si'em ka ke ka nidib nyet ka ya siaki dol Kiristo labasuŋ la. Dinzug ka ba na zun'e Wina'am ka pu'us o bareka yaname mor noor yinni ne ba n tisidi ba piintita'ar la, ka me mor noor yinni ne Wina'am nidib wusa la. 14Wina'am n tisi ya yelsumtita'ar la zug ka ba na noŋi ya bedego ka sos Wina'am tisi ya. 15Keli ka ti pu'us Wina'am bareka o piintita'ar line gati ti pian'ad ben la.

will be added

X\