2 KORINT DIM 8

1Ti ba'abiise, ti bood ye ya baŋ Wina'am popielim tum si'el Wina'am nidib bane be Masedonia teŋin la sa'an. 2Ba daa nye makir bedego ba yeltood poogin ka o popielim la lee ke ka ba mor sumalisim bedego, ka sumalisim la ke ka ba nok ligidi bedego n tis ne ba sunf wusa ye ba suŋ Wina'am nidib la'am ne ban daa a noŋ dim la. 3M nyaŋe yeli ya ye ba daa tis ka li zemis ba paŋ tun'e si'em, hale ka li gaad ala. 4Ka ba daa sosi ti bedego ne ba meŋ boodim ye ti tisi ba suer ne yelsum ye ba la'am suŋ Wina'am nidib sieba la. 5Ka daa niŋ ka li gaad tiname ten'es si'em la. Ka yiiga ba daa zaŋi ba meŋ tis Zugsob la la'am ne tinam men, ka li dolne Wina'am boodim. 6Dinzugo ti kpe'eŋ Titus one pin'il ligidi la'asug tuuma ya sa'an la ye o suŋi ya ka ya naae popiel tuumkaŋa la. 7Ya mor yelsum bedego ya zut, ka niŋ Kiristo yadda bedego ka tun'e pian' Wina'am yela su'uŋa ka mor Wina'am mi'ilim bedego ka tia' ye ya suŋ nidib ka noŋi ti bedego. Kpe'eŋimi ya meŋ n me tum popiel tuumkaŋa bedego men. 8M pu yet nwa ne m paŋa. Amaa m zaŋ ne ninsieba n tum si'el la ye m maki baŋ ya sida noŋilim zem si'em. 9Ya mi' ti Zugsob Yesu Kiristo popielim a si'em. Hale la'am ne on daa a yelsum wusa daan la, o da lieb noŋ daan yanam su'um nyeeb zug. Ka li ane on lieb noŋ daan la ke ka yanam lieb yelsum dim. 10M ye m yeli ya man ten'es yelkaŋa si'em. Ye, li a su'um ka ya yu'un naae tuumkan ka ya daa pin'ili tum yuum sa la. Ya daa bood bedego ye ya pin'ili li. 11Ka li a su'um ka ya me bood nannanna ye ya naae li, ka li zemisi ya pin'ilugin boodim la. Keli ka ya tisib la zemis yaname mor si'em. 12So' ya'a mor boodim ye o tis piini, Wina'am di'ed o piini si'em la dolne one na tis ka li zemis on mor si'em, ka ka'ane one pu mor si'em laa. 13Ti boodim ka'a ye ti yiis sieba ba namisugin ka li lebig pakir tisi yaa. Amaa li su'um ye li zem taaba. 14Ka yaname mor bedego nannanna la, suŋim bane a noŋ dim la. Ban me na ti mor bedego ka suŋi ya, ya boodim saŋa. Ka anwa ka ya wusa na zem taaba. 15Li dolne lin da sob Wina'am gbauŋin si'em la ye, “Niŋkane vaae bedego la pu mor ka li zu'e galise. Ka niŋkane vaae bi'ela la pu mor ka li pood galise.” 16Ti pu'us Wina'am bareka one ke ka Titus mor poten'er ye o suŋi ya wuu tiname mor poten'er si'em la. 17O daa siaki ti kpe'eŋir la ka me daa mor poten'er ye o suŋi ya, ka gban'e ne o meŋ boodim ye o keenn ya sa'an na. 18Ka ti ye ti tum ti ba'abiig so' ye on ne Titus kena. O ane on ka Wina'am nidib wusa na'asid o on tum si'em ka moon labasuŋ la zug. 19Ka la'am ne ne', ba me gaŋ o ye o giligid ne tinam ka suŋidi ti ne popielim tuumkaŋa. Ti tum popielim tuumkaŋa ye ti tis Wina'am na'asi, ka sid pa'al ye ti bood ye ti suŋ. 20Ti gu'usidi ti meŋ ye so' da pian' be'ed tinam niŋ si'el ne piintita'ar kaŋa la yelaa, 21ka bood ye ti niŋ line a su'um Wina'am tuon ne ninsaalib sa'an men. 22Ka ti ye ti tum ti ba'abiig so' ya'as ne ba. Ti daa nye on tum si'em saŋa bedego ka baŋ ye o tia' ye o suŋ. Ka nannanna o mor poten'er bedego ye o suŋi ya, on mi' su'uŋa ye ya na niŋ tiname yeli ya si'em la zug. 23Ka li ya'a aa ti ba'abiig Titus yela, o ane m tumtum tiraan one tum ne man ye ti suŋi ya. Ka li ya'a aa ti ba'abiis bane ye ba dol o la yela, ba ane bane ka Wina'am nidib tum la, ka ke ka Kiristo nyet na'asi. 24Pa'alimini ba ya noŋilim, ka Wina'am nidib nye ka baŋi li, ka me baŋ ye tinam yiti nwe'ed nyo'og ya yela la a sida.

will be added

X\